Read Galela MATIUS 25 Bible Online

MATIUS 25 - Galela bible

MATIUS 25

¹Okai kou gaa kodo epaawado ka jakimakita makiida kou ko api jokaagaa gaati lampu dokijake waka bukeete me kidi ebukigou dani bukaa.

²Okei idibi dimi beu, daana okei idibi dimi jago.

³Dimi beu ka kodo lampu dokijake uwoutu dokii beu kouja;

⁴kodeja dimi jago ka kodo lampu ma, uwoutu awijaida ma dokii.

⁵Waka ebukeete me ipee tidoke tijake okei utoma uno kogi tijake uno umii.

⁶Kodeja wanee ejupi mana wuu tidoke, ’Edowei, waka bukeete kidi meete! Ebuki-miwei!’

⁷Tijake api jokaagaa gaati kodo utoma anigojake lampu epeepi timakai.

⁸Tijake dimi beu ka kodaa dimi jago kodoopa eteete mana, ’Ikiija uwoutu neewudiwei, iniija lampu dineete no.’

⁹Kodeja dimi jago ka kodaa wo eteete mana, ’Inii ma ikii ma te tiki. Ikii ka te-tai bageepa eda-uwei,’ etii.

¹⁰Okei eda-uweetigo gaa waka bukeete kidi mejake epeepi timakita ka kodo okai ma enaimo buka naineida jokoujo kai. Tijake damo jekamijawii.

¹¹Nemouga joko ka api jokaagaa kodo maija mejake manaateete mana, ’Ei, kowaa ke wou, kowaa ke wou, inii damo nijakebai.’

¹²Kodeja okai wo eteete mana, ’Beu maa kou ani kitii, ani kidou beu bagee.’

¹³Okai kouja, ikii doutou to tai, kou naago ma, kou wagi ma ewo kouja.

¹⁴Okai kouja kou mana kodo me idaana poto makijo uwija dani bukaa. Jakei te-tai bagee manaa-tijake okaija agijoudo okeija ganeida ekegajawii.

¹⁵Me idaana talenta idibi menii; daana me idaana wija; daana me idaana ena, okei gakita kei timakija danite menijawii. Tijake okai joko ka makiida uwii.

¹⁶Talenta idibi motita me kidi, okai kou gaa kodo munaa ti-motijake talenta abu idibi ma motimakai.

¹⁷Kou dani maija, talenta wija motita me kidi, talenta abu wija ma motimakai.

¹⁸Kodeja talenta ena motita me kidi maki utigojake okaija jakei tita me ka mege kodo boonimakai.

¹⁹Tou makii tijake wadouto jakei tita me kidi mejake ebé jaduwajawiine.

²⁰Talenta idibi motita me kidi mejake abu idibi ma dokii, eteete mana, ’Ei, kowaa ke, akija talenta idibi naimeetege. Dododou, talenta abu idibi ma motimakipa,’ etii.

²¹Tijake ibo kidaa eteete mana, ’Enaa kodo ko, jikoo ma enanauto ma nakei te-tai me! Mijo manaida aki enanaa kouja, agijo wedaba maida kajaikeega. Aki jakei te-tai me kidaa ideide duba wadoujo ki,’ etii.

²²Tijake talenta wija motita me kidi maija mejake eteete mana, ’Kowaa ke, akija talenta wija naimeetege; dododou, abu wija ma motimakipa,’ etii.

²³Tijake ibo kidaa eteete mana, ’Enaa kodo ko, jikoo ma enanauto ma nakei te-tai. Aki mijo manaida enanauto kouja, ibo agijo maida kajaikai. Aki jakei te-tai me kidaa ideide duba wadoujo ki,’ etii.

²⁴Tijake talenta ena motita me mejake eteete mana, ’Kowaa ke, ani epi aki ki boko me kidi wei beuda duwaige, daana kigii beuda kotuu teige.

²⁵Okai kouja ani weda gajake talenta maki duba boonigou. Dododou, aki ipuwe no,’ etii.

²⁶Kodeja ibo kidaa wo eteete mana, ’Kowaa ke, peu nakei te-tai me ena peu kidi! Ani wei beuda duwaiga, daana kigii beuda kotuu timakeiga aki epi.

²⁷Okai kouja anija mege ko mege munaa wega-tai bageepa naamakii naako enaa, ani joko mejake mege kou wado ma abuma motii te.

²⁸Okai kouja talenta kodo jamotijake talenta gaati jago me kidiipa naamenii.

²⁹Agijo jago bageepa abuma menii kouja, tijake okai euga abuma ewaa kai; kodeja agijo tagu bageepa make makita agijo jamotii.

³⁰Tijake epa beu jakei te-tai kidi juwouda ka bunita duba eemigimakai. Okai kouda kodaa jege ma egaagede ma to touda.

³¹Me Joka okaija ajiipi dubaiga meitagiida, jaetigo-tai bagee ma enaimo, okai kou gaa kodaa okaija jegeenaka animakaida animakaitagi.

³²Okai jumaapa me tuma tumaija kotuu etimakijake wudijake taitagi, ooto-tai bagee ka domba kodo kamigiipa make okainiinii etijawii bukaa.

³³Dombaido kede etikaato amo jato kotuu etijawii, kodeja kamigi akaato amo jato kotuu etijawii.

³⁴Tijake jakimake-tai me kidi etikaato amo jato bageepa etiitagi mana, ’Mewei, Naitaija juma dege-dege kitita bagee; maki kabo pigu tijawitaida gaa ka epeepi kijatijawita jakimakita makiida go-motiwei.

³⁵Ani naidi gaa naija agijo naimai kouja. Ani gewe-gewe gaa uwo no-naimai. Ani duwa jawe tigou gaa nabukai.

³⁶Ani agijo tagu gaa ikii makii agijo naamakijawii. Didi gaa naadadigou. Ani wanee owaa duba tota gaa nadogou.’

³⁷Tijake enaa bagee joko etiitai mana, ’Ei, Tuhan, kawi ka gaa aki naidi teetigo inii kadojake naija agijo kaneetege? Daana gewe-gewe tijake inii uwo no-kaneetege?

³⁸Daana kawi ka gaa aki duwa jawe-tai kadojake kabukeetege. Daana agijo tagu tojake makii agijo kaamakijawii?

³⁹Daana kawi ka gaa aki didi juwa, wanee owaa duba juwa kadojake kadogootege?’

⁴⁰Tijake jakimake-tai me wo etiitagi mana, ’Beu maa kou ani kitii, anija keneka ka mijo me idaana jakei tita kou ko, kou ko ani nakei tita.’

⁴¹Tijake akaato amo jato tota bageepa eteete mana, ’Aneepa make bikimiwei, kowaa kei, peu kugouto dokita bagee, imo to togoo bodija duba kodo; Teege ma jaetigo-tai bagee ma epeepi jaatitaida kodo.

⁴²Ani naidi gaa naija agijo naimai beu kouja. Ani gewe-gewe gaa ikii uwo naimai beu.

⁴³Ani duwa jawe tigou gaa nabukai beu. Agijo tagu tijake ikii makii agijo naamakijawii beu. Ani didi ma, wanee owaa duba ma tijake nadogou beu.’

⁴⁴Tijake okei joko etiitai mana, ’Ei, Tuhan, kawi ka gaa inii kadou, naidi juwa, gewe-gewe juwa, duwa jawe-tai juwa, agijo tagu juwa, didi juwa, wanee owaa duba juwa, tijake inii kaadadai beu teetege?’

⁴⁵Tijake okai joko etiitagi mana, ’Beu maa kou ani kitii, mijo me idaana jakei tai beu kou ko, ikii ani maija te nakei tai.’

⁴⁶Tijake okei gaduwagoo imo to togoo kaitai, kodeja enaa bagee ajii tai imo to togoo.”