Read Galela MATIUS 26 Bible Online

MATIUS 26 - Galela bible

MATIUS 26

¹Kei manaido wegajawijake, Jesus etope-taidoopa eteete mana,

²„Ikii epi, uno wija umijake wadouga etigajake petii tita ga-tou naago kodo. Me ka me Joka eekegajawiitai, pija boko maida edajawe-tijake,” etii.

³Tijake imam iboudo ma, me iboudo ma Ibo Imam eka ki Kajafas ibo owaapa kotuuu timakai.

⁴Okei kede mana amo wegai joko wegai, Jesus gabouga ejakijake wagiine mana kodo.

⁵Kodeja okeija ka wegaate mana, „Ibo naago kou ko beu, meido jupi tetepepe potu tidoke na kojoka,” wegai.

⁶Jesus Baitani makijo tomo jago dani me Simonja owaapa toojogo gaa,

⁷jagamo idaana okaapa mei; enauto mogo ka ebijata tapuja ibo age odijo awita kodo dokijake okaija dagi maida jatuumijawii, nootigo animakita gaa.

⁸Kodeja etope-taido kou kodo dojake emoge gai, kei teete mana, „Magijo ka peepu tikumeega?

⁹Kii odijo ki ibo age kaa tai naako daba bagee menii enaa kodaa,” etii.

¹⁰Kodeja kou mana kodo Jesus gajake eteete mana, „Magijo ka jagamo kodo gaagaa etijawii? Enauto agijo nakei teega kouja.

¹¹Daba bagee ikii wa enaimo to-tai kouja, kodeja ani ki keetou to ko beu.

¹²Odijo ani maida natuumeega kodo ani oka namakai epeepi tai kodo.

¹³Beu maa kou ani kitii, uwoje makije ajii mana kodo wegakumiitaida, kou jagamo kodo kei teega kou ko ega-tojake wegaitai,” etii.

¹⁴Tijake wija ma gaati kede ka idaana eka ki Judas Iskariot kidi imam iboudoopa uwii.

¹⁵Eteete mana, „Magijo naimaipiga, ani kijaekegajawipa ko?” etii. Tijake okei mege[10] jokagaati menii.

¹⁶Kou gaa make wado eekegajawiine tijake enaa wagi ubai.

¹⁷Goti ejajawii beu naagoudo ka edoga naago kodo etopetaido Jesuspa mejake eteete mana, „Kaija ide naineida epeepi katijawii ko?” etii.

¹⁸Tijake joko eteete mana, „Ikii makiida wadoujo kijake kii me kidiipa naaetii, ’Kuduuja kateegi, Anija putu kapa keega. Aki owaapa anija etope-tai ma enaimo ibo naago dijo doune, kateegi’ naaetii.”

¹⁹Tijake etope-taido Jesusja etita danite kei tai; tijake wadouga etigajake petii tita ga-tou naago epeepi timakai.

²⁰Wanee kijake okai etope-taido ma enaimo naine animakai.

²¹Okei nootigo gaa Jesus eteete mana, „Beu maa kou ani kitii, ikii jupi ka me idaana naekegajawiipagi,” etii.

²²Okei gaagaa umina tijake meena meena egaado teete mana, „Ei, Tuhan, ani, mee?” etii.

²³Tijake wo eteete mana, „Ani ma enaimo no-taida goti uwo duba tokami-moteegi me kidaa naekegajawiipagi.

²⁴Me Joka kapogeije ebijamakita danite kidi uwii, kodeja me Joka eekegajawiipagi me kidi peu kugouto dokidoke no! Kii me kidi te epamakita naako enaa.”

²⁵Eekegajawita me Judas kidi wo eteete mana, „Ei, Kuduu, ani, mee?” Etijake Jesusja „Aki eneege dani,” etii.

²⁶Okei nootigo gaa Jesus goti motijake mobu ediimai. Okai goti utijake etope-taidoopa meneete mana, „Moti-nowei; anija má jato ki,” etii.

²⁷Uwaawe maija motijake nigajaweege etijake meneete mana, „Ikii utoma nowei.

²⁸Kii ke anija kijatogijawita mana kodo emo kodo, me wedaba maida make jatuumijawita, peu awitaido ipa jajaike-tijake.

²⁹Kodeja ani kitii, ito kiija make wado ani utaadijo te naita, Naitaija jakimakita makiida kodaa ija keenaitaida to,” etii.

³⁰Okei ebetaataa tijake podomai, tijake Zaitun Dimiidaapa uwii.

³¹Tijake Jesus eteete mana, „Itounu ikii utoma ani maida make duwaa-duwaa taipiga; kapogeije ebijamakita kouja: Ani ooto-tai me kidi wagiita, daana domba imo kodo kigipapa tidaa taitai.

³²Kodeja ani anigojake ani tiga Galilea dokoo uwiita,” etii.

³³Kodeja Peterus wo eteete mana, „Kou danite okei utoma aki maida make duwaa-duwaa tipai maija, ani ki beu,” etii.

³⁴Jesus wo eteete mana, „Beu maa kou ani katii, ito kii uno ki maija, ajam mana tai beu gaa, aki kigi wido beu puga natai-page,” etii.

³⁵Peterus wo eteete mana, „Aki ma enaimo bokapa maija, ani beu puga te kataipiga,” etijake etope-taido utoma kou kodo etii.

³⁶Tijake Jesus okei ma enaimo maki katouda eka Getsemani ebatitaidaapa mei. Tijake etope-taidoopa eteete mana, „Ikii jakai animaki-tou, ani ki wo dani sembahjang te-uwiine gaa,” etii.

³⁷Peterus ma Zabdi jokaaneija ma ouwijake okai gaagaa umina tijake didi gaduwai.

³⁸Tijake eteete mana, „Anija kegepa gaagaa umina bokaine dani. Ikii jakai tojake needoutou,” etii.

³⁹Wo dani kijake apaipu tidoke tijake sembahjang teete mana, „Ei, Naitai, kou danite enaa keetigo ko kii uwaawe ki aneepa make napipikajawii. Kodeja anija dimi ko beu, akija dimi to,” etii.

⁴⁰Etope-taidoopa mejake okei uno umi-toojogo edomakai. Tijake Peteruspa eteete mana, „Ei, ikii mijo gaa to ani ma nadoutou ko kaga keega, mee?

⁴¹Doutou ma sembahjang ma, gaadou tapa te ke-tijake. Dimi ko petee kodeja má jato debee,” etii.

⁴²Wijaago maija uwijake sembahjang teete mana, „Ei, Naitai, kou danite uwaawe ki beu te kijake ani nai beu kai peu keetigo ko, akija dimi kei tijawii to,” etii.

⁴³Kigeena ma mejake uno umi-toojogo edomakai, uno kogi umina kouja.

⁴⁴Kojoka kigeena ma ejaikijake uwii. Widaago sembahjang tai, kei teegi danite.

⁴⁵Tijake etope-taidoopa joko mejake eteete mana, „Ikii ito maija uno umijake uno kogi duwajawii. Dowei, putu kodo duwadoke keega. Peu bageepa me Joka euwadoke.

⁴⁶Anigowei, mewei. Edodowei, naekegaagi me kapauto keegi,” etii.

⁴⁷Okai mana wegaatigo gaa kodaa wija ma gaati kede ka idaana Judas kidi mei. Okai ma enaimo me wedaba kataana ma, kopa ma dokii. Okei imam iboudo ma me iboudo ma ka ebadikumita bagee kede.

⁴⁸Eekegajawita me kidaa tegee dou mana eti-menita, eteete mana, „Ani unu ejumidoupiga me okai kii kidi kijoka, ejakimakai,” etii.

⁴⁹Okai kou gaa kodo Jesuspa mejake eteete mana, „Ei, Kuduu!” etijake unu ejumidou.

⁵⁰Jesus eteete mana, „Ei, noogei, magijo taine meege?” etijake okei mei. Jesus maida gane mapido tijake ejakimakai.

⁵¹Jesus ma enaimo ka idaana kidi kataana juwi-motijake Ibo Imam jakei te-tai me wagijake gapa jaduwajawii.

⁵²Tijake Jesus eteete mana, „Akija kataana ko awijawii; kataana goja bagee utoma kataana ka eduwajawii.

⁵³Akija gai ko, ani Naitai ediimai naako, ito kii gaa kidi maija okai jaetigo-tai kotuu wija ma gaati te naimi-toja gaage, mee?

⁵⁴Kodeja kou danite kawe dani tijake kapogeije kobadoke tija, kii dani taita mana kodo?”

⁵⁵Okai kou gaa kodo me kotuu, kedeepa Jesus eteete mana, „Ikii moonaa te-tai me akaija ootaine jaijo kataana ma kopa ma dokijake najakimakaine meega, mee? Agapi gakita ani Ugatameja owaa duba animakijake kitopeiga, tijake ikii najakimakai beu.

⁵⁶Kodeja kei manaido utoma ewaa kidaa, tikauwa ka gokobaki tijawiidaiga wegai tita bageeja ka ugata kapogeije kobatijake.” Tijake etope-taido utoma ejaikidokijake okiimigii.

⁵⁷Tijake Jesus ejakimakita bagee kodaa Ibo Imam Kajafas kidi jumaapa ouwii, kapogeije epi bagee ma, me iboudo ma kotuu timakitaida kodaa.

⁵⁸Kodeja Peterus poto make eepejake Ibo Imam owaa juwouda dakii. Owaa watija jokoujo kijake douto-tai bagee ma enaida animakai, makeeniipiga mana doune tijake.

⁵⁹Imam iboudo ma, mana pika-tai kotuu ma Jesus wagimakaine puja mana jakubaine tijake ubai;

⁶⁰kodeja domakai beu, jakubaine bagee wedaba mei kodeja. Nemouga me ida wija aamejake,

⁶¹aeteete mana, „Kii me kiija kii mana godata, ’Ani ki Ugatameja owaa bogomijawijake naago wido to migijawija,’ wegaategi me” aetai.

⁶²Tijake Ibo Imam joonidoke tijake eteete mana, „Aki manaana ma wo te etii, mee? Okei má mana kateegai kou ko?” etii.

⁶³Kodeja Jesus gabo tou. Tijake Ibo Imam eteete mana, „Ajii bokouto jago Ugatame maida ani baita kadiimai. Aki ki Keristus, Ugatame Joka kidi beuje? joko enidou,” etii.

⁶⁴Tijake Jesus eteete mana, „Akija eneege dani. Kodeja ani katii, emino me Joka Bida Bokouto etikaato gebo animakijake epa maida ka tá kapagu maidaiga meete edoutage,” etii.

⁶⁵Tijake Ibo Imam okai kidaa kagaba kigibajake eteete mana, „Okai Ugatame eduwai. No, magijo taine inii mana abuma wegai? Okaija eduwata mana ikii ejuweega.

⁶⁶Ikii kawe dani dimi egai?” Etijake wo eteete mana, „Okai bokai beu kai peu,” etii.

⁶⁷Tijake okei ebepeka epoge etuwajake wagii; daana joko ka kede ganaadabe wageete mana,

⁶⁸„Douja nidodou, kowaa ke, Keristus, meija kageegi?” etii.

⁶⁹Peterus kidi juwouda animaki-toojogo. Kei te-tai api idaana mejake eteete mana, „Aki maija Jesus ma enaimo, Galilea ka me kidi,” etii.

⁷⁰Kodeja okei utoma jumaapa beu puga eteete mana, „Aki eneege ko ani gai beu,” etii.

⁷¹Okai juwouda wo dani tijake api idaana maija edojake kouda tota bageepa eteete mana, „Kii kidi Jesus ma enaimo, Nazaret ka me kidi,” etii.

⁷²Tijake kigeena ma beu puga etijake baita makijaweete mana, „Kii me kidi ani edou beu me,” etii.

⁷³Tota dani gaa kidaa kouda kodaa jooni-tota bagee Peteruspa mejake eteete mana, „Beu maa, aki maija okei jupi ka idaana, akija mana gimo ka ewaida keega kouja,” etii.

⁷⁴Tijake okai akaato peu dokijawijake baita makeete mana, „Kii me kidi ani edou beu me.” Etijake okai kou gaa kodo ajam mana tai.

⁷⁵Tijake Peterus Jesusja etipi mana kodo gadoke, kou ko, „Ajam mana tai beu gaa aki kigi wido beu puga nataipage” etipi mana kodo. Okai podomijake jege kodiinakii tai.