Read Galela MATIUS 4 Bible Online

MATIUS 4 - Galela bible

MATIUS 4

¹Tijake Jesus Roh ka me beuda ouwii, Teege ka egaado te-tijake.

²Okai naago mepiija uno mepiija nai beu tijake naidi gai.

³Kii egaado te-tai kidi okaapa mejake eteete mana, „Kou danite aki ki Ugatame Joka keetigo ko, kei mogoudo kei goti kidaa tei eti,” etii.

⁴Kodeja okai wo eteete mana, „Kapogeije ebijamakita no: Goti ka to me tuma umi-tou te tija, Kodeja e mana te mana Ugatameja ebeidaiga godajawita kodo ka,” etii.

⁵Tijake Teege kidaa jimubeu makijoopa ouwijake Ugatameja owaa ka wado tí titaida kodaa emakijawii.

⁶Eteete mana, „Kou danite aki Ugatame Joka keetigo ko, mijo gootidodou. Kapogeije ebijamakita kouja: Okai jaetigo-tai bagee kaaetiipagi, Gane wado kakatagi-toupigai, Bado mogouto tokoo tidoke na kojoka.”

⁷Tijake Jesus eteete mana, „Kapogeije ebijamakita kodo ko: Akija Tuhan Ugatame egaado te tai,” etii.

⁸Kigeena ma Teege kidaa wado tí tita bagouda ouwijake uwoje makije ka jakimakita makiido ma ajiipi agijo ma emuwakai.

⁹Eteete mana, „Kei utoma kaniita, kou danite aki mijouga kijake migaakobe natipe ko,” etii.

¹⁰Tijake Jesus eteete mana, „Ka! Teege! kapogeije ebijamakita kouja: Akija Tuhan Ugatame migaakobe etai, Daana okai to dijo jadou,” etii.

¹¹Tijake Teege kidi wo godoke tai. Ugatameja jaetigo-tai bagee mejake eedadai.

¹²Jahja ejakimakita mana Jesus Juwijake, Galilea dokoo wo uwii.

¹³Nazaret makijo jaikidokijake Kapernaum makiida tou, peku watija ka makiida, Zebulon ma Naftali ma ka dokoo kodo.

¹⁴Tikauwa ka gokobaki tijawiidaiga wegai tita me Jesaja kidaa wegata mana koba-tijake, kou ko:

¹⁵Zebulon ka makiida ma, Naftali ka makiida ma, Peku uwe-tai watija, Jarden amouwe jato; Kou ko Galilea dokoo, ojaa bagee ka makiida.

¹⁶Bunita duba ka to-tai bagee Awe peijo domakita. Boka ka apumita makiida ka tota bageepa Aweida jaganimakita.

¹⁷Kou gaa kodaa make wado Jesus mana wudii go-motii, eteete mana, „Ikii tedemiwei, epaawado ka jakimakita makiida kapa keega no,” etii.

¹⁸Galilea iteida ita uwina uwina teetigo me keneka wija edou. Kii ko Simon, Peterus eebatita me kidi ma, kenekame Andereas kidi ma ebai peku duba mijouwe aaweetigo gaa; okejai binei aamuga-tai bagee kouja.

¹⁹Tijake Jesus eteete mana, „Aamewei, aanaapewei, ani me mugai kijaikaita no,” etii.

²⁰Okai kou gaa kodaa okejai ebai aajaikidokijake aepei.

²¹Kouda kodaa make uwijake joko ka keneka wija maija edou; kii ko Zabdi joka Jakub ma, kenekame Jahja ma, komaida nakame Zabdi ma enaimo, ebai puumeetigo. Tijake Jesus manaa-tai.

²²Okai kou gaa kodaa maija koma ma, nakame ma aajaikidokijake Jesus aepei.

²³Jesus Galilea dokoo bobi-motii. Okeija sembahjang owaido duba meido etopai, daana Ugatameja jakimakita makiida ka ajii mana wegakumii, daana me ka didi tuma tumaija ma, okeija debuu agijo utoma beu jaawii.

²⁴Tijake okai maida make mana Sjam dokoo ugo uwidoke tai. Didi jago bagee utoma, didi ma gaduwai ma tuma tumaija ka tagi atita bagee kede me ka oomei. Enija jago bagee ma, enijaanija bagee ma, bado ekogadaa tita bagee ma, utoma okai beu jaawii.

²⁵Tijake Galilea ka ma, Dekapolis ka ma, Jerusalim ka ma, Judea ka ma, Jarden onee auwaato ka ma me wedaba okai to eepei.