Read Galela MATIUS 5 Bible Online

MATIUS 5 - Galela bible

MATIUS 5

¹Jesus me kotuu to kodo edojake dimi katouda patikai. Okai animakijake etope-taido okaapa mei.

²Okai mana godajawijake mana etopeete, kii dani etii:

³„Ideide no, mijo kegepa jago bagee; epaawado ka jakimakita makiida okei ipuwe kouja.

⁴Ideide no, dimi gaduwai bagee; okeija gaduwata dimi jamaipajawii kouja.

⁵Ideide no, debee kegepa jago bagee; okei makiida jakimakaitai kouja.

⁶Ideide no, maakodo bokouto naidi ma jowee ma bagee; okei nojake mobu kaitai kouja.

⁷Ideide no, ipa dimi gata bagee; okei ipa bokouto go-mo-tiitai kouja.

⁸Ideide no, kegepa jimubeu bagee; okei Ugatame edomakaitai kouja.

⁹Ideide no, dagi duwa-tai bagee; okei Ugatame jokaane eebataitai kouja.

¹⁰Ideide no, maakodo bokouto maida make peepu etita bagee; epaawado ka jakimakita makiida okei ipuwe kouja.

¹¹Ikii ke ideide no, me ka kiwidogipai ma, daana peepu kitipai ma, daana puja kijakubajawipai ma, ani maida make.

¹²Ikii ideide tiwei, umina ideide kodo; epaawado ikiija ka petege ibo kouja. Kou dani maija ikii beu gaa ka tikauwa ka gokobaki tijawiidaiga wegai tita bagee peepu etei tita kouja.

¹³Ikii ke makiida ka diga. Kou danite diga kodo igi beu ki-toojogo ko, kawe dani tijake digaigijo awija? Okai epa beu kidoke, kojoka emigimakijake me ka bado daimai to.

¹⁴Ikii ke makiida ka aweida. Dimiida ka maki okogoona te boonimake.

¹⁵Me ka lampu etakijake kakate mijo te makija, kodeja lampu make-tai wado makija. Tijake owaa duba tota bagee eganimakija.

¹⁶Kou dani maija ikiija ka aweida kodo me jumaapa eganimakai to. Tijake ikiija enaa kei te-taido kijadojake epaawado ka Ikiitai muta etuwa-tita.

¹⁷Musaja dijo douja mana ma, tikauwa ka gokobaki tijawiidaiga wegai tita bagee ka mana ma kou beu awiine ko ani meta dimi te nagai. Ani beu awiine mei ko beu, kodeja boko duwajawiine meta.

¹⁸Beu maa kou ani kitii, epa ma maki ma beu kaitaida to, mijo mana mutoona juwa, puugeena juwa te igaita; Musaja dijo douja mana utoma boko duwajawiitaida to.

¹⁹Okai kouja meija nitimakita mana mijo mana mutoona ekagumijake kou danite meepa etopipi, epaawado ka jakimakita makiida mijo daba eebataitai. Kodeja meija nitimakita mana dijo dopi ma, etopipi ma, epaawado ka jakimakita makiida okai ibo eebataitai.

²⁰Ani kitiine kouja, kou danite ikiija ka maakodo boko ko kapogeije epi bagee ma, Parisi bagee ma ka maakodo boko te etigadoki-toojogo, beu ma ko beu, ikii epaawado ka jakimakita makiida wadoujo te kaita.

²¹Tikauwa ka bageepa etita mana ikii juweetega, kou ko: Me te wagii. Daana meija me wagipi boko petadoke taitagi.

²²Kodeja ani kitii, me gakita gakita meija kenekame emoge egapi, okai boko petadoke taitagi. Daana meija kenekame ’Ei, dimi beu’ etipi, boko peta-tai kotuuda kaitagi. Daana meija kenekameepa. ’Aki enija’ etipi, boko petajake kadaga bodija duba kaitagi.

²³Okai kouja akija menija agijo mene-taida meniine ga-too-jogo ko, daana kouda kodaa aki keneka be kagata mana gadoke tipe ko,

²⁴Kouda kodaa akija menija agijo mene-taidaapa jaikidokijake keneka ma enaimo dagi duwai tiga tigou. Tijake joko mejake akija menija agijo menii.

²⁵Aki egaa kodo akaije kateegi me ma dagi aaduwai, ikai enaimo ita auweetigo gaa. Tijake akaije kateegi me kidaa boko peta-tai jumaapa te kaekega-tita, daana boko peta-tai me kidaa douto-tai meepa te kaekega-tita, tijake aki wanee owaa duba kaawidoke na kojoka.

²⁶Beu maa kou ani katii, aki kouda kodaa make te podomaitage, ebé jamenijawiitageida to.

²⁷Kii dani wegata mana muto ikii juweetega: Mogai te tai.

²⁸Kodeja ani kitii, me gakita gakita meija jagamo idaana edojake okaija tine jigi ga-toojogo okai kegepa duba mogai teete.

²⁹Kou danite akija etikaato peka peu mejawipi, gobajake emigimakai. Akija má idikima kodo kadaga bodija kaemigimakai ma ko, aki má tineena igadoke tai ko enaa.

³⁰Daana kou danite akija etikaato gane ka peu mejawipi, duwajawijake emigimakai. Akija má idikima kodo kadaga bodijaapa uwii ma ko, aki ma tineena igadoke tai ko enaa.

³¹Daana kii dani etita: Meija jagamome ejaikipi, okai mege badii kapogeije tiga jaebijamakai.

³²Kodeja ani kitii, meija jagamome ejaikipi, kodeja mogai maida make ko beu, okai mogai te-tai jagamo eeweete. Daana meija ejaikita jagamo kodo waka ebukipi, okai maija mogai.

³³Daana tikauwa ka bageepa etita mana ikii juweetega: Puja mana baita te makii, kodeja akija baita utoma Tuhanpa eti-menii to.

³⁴Kodeja ani kitii, ikii baita te makido-tai, epa maida juwa, okai kou ko Ugatameja jegeenaka animakaida kouja;

³⁵daana maki maida juwa, okai kou ko okaija bado makijawijaida kouja; daana Jerusalim maida juwa, okai kou ko ibo jakimake-tai meja maki kouja.

³⁶Daana akija dagi maida maija baita te makii, akija dagi maida ka ijo ena ma apeijo awii juwa, buna awii juwa, aki kaga kojoka.

³⁷Akija wegaja mana kidi ii kipi ’ii’ wegai, beu kipi ’beu’ wegai. Abuma wega-toojogo peu epautouda.

³⁸Kii dani wegata mana muto ikii juweetega: Peka komoka ma, egó komoka ma mana.

³⁹Kodeja ani kitii, peu bagee ma akaije te ootai. Kodeja meija etikaato amaimu tabee kitipi, enakaato amaimu maija menii.

⁴⁰Kou danite me idaana ka ijeije katijake akija badju kagaba kaamotipi, akija egaupe-tai kagaba kaamote-tita ejaikai.

⁴¹Daana meija ita kaboona eumigo-tijake uwi-uwi katipi, wijaago ma eumigou.

⁴²Kadiimai bageepa menii to, daana kedaa gaa naimi katija bagee te ekonai.

⁴³Kii dani wegata mana muto ikii juweetega: Aki watija bagee ipa egai, daana be kigai bagee be egai.

⁴⁴Kodeja ani kitii, ikii ma jape bagee ipa egai, daana peepu kitita bagee sembahjang jatai.

⁴⁵Tijake ikii epaawado ka Ikiitai jokaane ke-tita. Okaija meuka ko peu bageepa ma, enaa bageepa ma jaganijawii kouja, daana okaija edi ko maakodo bageepa ma, utoopa bageepa ma jawejawii kouja.

⁴⁶Kou danite ikii ipa kigata bagee ipa egapa ko, má petege gouta? Mege kotuu te-tai bagee maija kou kei te-tai beu, mee?

⁴⁷Daana ikiija kenekaapa to kipo emotei tipa, joko ka bagee ma ko ikiija ka kei tai ko kawi ka ki ibo? Beu, mee? ojaa bagee maija kou kei te-tai kodo.

⁴⁸Okai kouja ikii enauto bokouto duwajawii to, epaawado ka Ikiitai enauto bokouto jago me danite.