Read Galela MATIUS 7 Bible Online

MATIUS 7 - Galela bible

MATIUS 7

¹Ikii me ijeije te etai; ikii maija ijeije ti kite-tita.

²Ikii ijeije tita kidi danite, okeija maija ijeije kitai, daana ikii jaebijadojake menii kodo danite kijaebijadojake kiniitai kouja.

³Magijo ka aki keneka ka peka duba jimu puugee jadomakai, kodeja aki kidaa peka duba ka kemoma dou beu?

⁴Juwa, kawe dani tijake aki kenekaapa eteete mana, ’Kowaa ke, aki peka duba jimu puugee kaadijawiine,’ etii. Tijake dodou, akija peka duba kemoma topi no.

⁵Kowaa ke, matabe bagee, akija peka duba kemoma badijawii tiga tijake ewaida dojake aki keneka peka duba ka jimu puugee kodo jaadijawii.

⁶Jikoo agijo dodi te menii; daana agakato agijo ekina jumaapa te emigimakai. Kou kei ti-toojogo bado ka daimijake jokouga kijake ego kigona tidoke na kojoka.

⁷Ediimidowei, ikii motiita no. Ubadowei, ikii domakaita no. Damo tugu-tugu tidowei; damo kijakebadoke taita no.

⁸Ediimija bagee utoma motii kouja, daana ubaja bagee domakai, daana damoutoopa tugu-tugu tija bageepa damo jakebadoke taita.

⁹Ikii jupi meime, kou danite jokame goti ediimi-toojogo mogo menii?

¹⁰Juwa, kou danite udi ediimi-toojogo ugenija menii?

¹¹Okai kouja kou danite ikii peu bagee ikii jokaaneepa enaa agijo menii epi kipa, beu ma ko beu, epaawado ka Ikiitai ediimija bageepa enaa agijo meniitagi.

¹²Okai kouja me ka kijakei tai ikii ide gai danite, ikii na jakei tai. Kii ke Musaja dijo douja mana ma, tikauwa ka gokobaki tijawiidaiga wegai tita bageeja ka kapogeije ma kouja.

¹³Ikii tipi damouga wadoujo kai. Damo ko ibo kouja, daana ita ko kapo kouja peu tapa uwe-tai; daana koudaiga me wedaba wakouja kai.

¹⁴Damo ko tipi, daana ita maija akakobome, ajii tai tapa uwetaida ko, daana me wija dani to domakai.

¹⁵Puja mana wude-tai bageidoopa make ikii akaato munii. Okei domba ebepeka dani ikeepa mei, kodeja okeija munouga kodaa wojake ego jago jina dani.

¹⁶Akiuta uta gojake gaja. Me ka edu maida poo duwaja, mee? Daana ijó pija maida ara uta duwaja, mee?

¹⁷Kou dani maija enaa uti gakita enaa uta goja. Kodeja peu uti peu uta goja.

¹⁸Enaa uti ka peu uta te goja; daana peu uti enaa uta te goja.

¹⁹Pija gakita enaa uta gojawii beu daniija kobimakijake bodija jookogai.

²⁰Okai kouja akiuta uta gojake gaja.

²¹Me gakita ko beu aneepa ’Tuhan, Tuhan’ naabate-tai bagee epaawado ka jakimakita makiida wadoujo kai. Kodeja epaawado ka Naitai kidaa gata dimi ekowa-tai bagee to.

²²Putu naago kodo me wedaba aneepa ’Tuhan, Tuhan’ eniitai; eneete mana ko, ’Beu, mee? akeeka dubaiga inii mana wudeetege, daana akeeka dubaiga enija jaemigimakeetege, daana akeeka dubaiga ego takuu-takuu agijoudo wedaba kei teetege kodo.’

²³Tijake ani okeepa ewaa tapa etiita, ’Ani ki ikii kidou beu bagee. Aneepa make uwijake tei, kowaa kei, peu kei te-tai bagee.’

²⁴Okai kouja meija anija mana muto najuwijake dijo dopi, okai dimi jago me idaana ka mogo wado owaa migita dani bukaa.

²⁵Tijake edi epaipo ma uwo degii ma, jajaukija umina puu tijake ma owaa kidi wagigoo. Kodeja okai bogomai beu, mogo maida kabo makijawita kouja.

²⁶Daana meija anija mana muto juwijake dijo te dopi, okai dimi beu me idaana ka i wado owaa migita dani bukaa.

²⁷Tijake edi epaipo ma uwo degii ma, jajaukija umina puu tijake ma owaa kidi wagigoo. Tijake bogomijake umina bogomigo-makidoke tai.”

²⁸Jesus kei mana muto wegajawijake okaija etopita mana muto kodo meido ego takuu-takuu umino tai.

²⁹Okaija etopita kodo bida jago me bukaa danite etopai kouja, kapogeije epi bagee dani bukaa ko beu.