Read Galela MATIUS 8 Bible Online

MATIUS 8 - Galela bible

MATIUS 8

¹Dimiida make mijouwe kijake me wedaba kotuu kotuu timakijake eepei.

²Tomo jago dani me idaana mejake okai jumaapa migaakobe eteete mana, „Ei, Tuhan, kou danite aki enaa gape ko, aki bida jago kojoka naojawii,” etii.

³Tijake okai gane mapido atii. Ejakidojake eteete mana, „Ani ide. Aki oodoke ti, etii. Okai kou gaa kodo tomo dani kodo oodoke tai.

⁴Tijake Jesus eteete mana, „Epeepite gai; me idaana ma te etii, kodeja aki akaato imampa emuwake-uwijake menija agijo menii, Musaja nitimakita danite, okei dimi ga-tita tijake,” etii.

⁵Okai Kapernaum makijo woujo kijake serdado migougu me idaana mejake ediimai umina,

⁶eteete mana, „Ei, Tuhan, anija nake te-tai me owaapa ekogadaa tijake didi teete; umina maa kou gaduwaate,” etii.

⁷Tijake Jesus eteete mana, „Ani beu jaawiine jawiipiga,” etii.

⁸Tijake serdado migougu me kidi wo eteete mana, „Tuhan, ani nadou peu kou danite aki ani owaapa wadoujo kai ko. Kodeja mana kato to eni-jokai! Tijake nakei te-tai me kidi beu kaipagi.

⁹Ani na mana juwe-tai me kouja, daana serdadoudo maija najuwe-tai. Kou danite ani me idaana ’Uwi’ etipa okai uwii. Daana me idaana ’Mei’ etipa okai mei. Daana nakei te-tai me kidiipa ’Kii kei ti’ etipa okai kei tai to,” etii.

¹⁰Kou mana muto Jesus ejuwijake eepajake eepeete bageepa eteete mana, „Beu maa kou ani kitii, Israil bagee jupi kou dani maakodo gai ibo kodo ani dou beu.

¹¹Ani kitii, me wedaba awii jato uwai jato make mejake Ibrahim ma Isak ma Jakub ma enaimo epaawado ka jakimakita makiida animakaitai.

¹²Kodeja jakimakita makiida ka jokaane kede juwouda ka bunita tapa eemigimakai. Kouda kodaa jege ma egaagede ma to touda.”

¹³Tijake Jesus serdado migougu me kidiipa eteete mana, „Uwii. Akija maakodo gata danite kaakei tidoke keega,” etii. Okai kou gaa kodaa make jakei te-tai kidi didi beu kai.

¹⁴Peterus owaapa Jesus wadoujo kijake Peterus baakame gobi pakuti-toojogo edou.

¹⁵Gane ejakijake gobi kodo okai maida make beu kidoke tai. Tijake jagamo kodo anigojake eedadai.

¹⁶Uwaataa digii enija jago bagee me ka Jesuspa oomei. Mana mutoona to godajake enija jaemigimakai, daana didi bagee utoma beu jaawii.

¹⁷Kou kodo gokobaki tijawiidaiga wegai tita me Jesaja wegata mana koba-tijake, kou ko: Okai kidaa iniija debuu agijoudo nijamotii, Daana iniija didiido nijadokii

¹⁸Me wedaba ebobimakai Jesus edoumigijake etope-taido peku ade-tijake etimakai.

¹⁹Kapogeije epi me idaana okaapa mejake eteete mana, „Ei, Kuduu, aki uwiitageida kaapeita,” etii.

²⁰Tijake Jesus eteete mana, „Jina mugu topai, daana bedo maija geka topai, kodeja me Joka migo wo makijaida ma beu,” etii.

²¹Etope-tai me idaana ma eteete mana, „Ei, Tuhan, najaikai, naitai oka emake-uwii tiga taine kadiimai,” etii.

²²Kodeja Jesus wo eteete mana, „Ani naapei; bokata bagee kodaa bokata bagee emake-tita jajaikai,” etii.

²³Okai koma matakijake etope-taido maija eepei.

²⁴Tijake egaa kodo ukija ibu peijo pekuuda mijouwe kai. Koma kodo ukija adaawe tai; kodeja Jesus uno umi-toojogo.

²⁵Okei mejake matoki eteete mana, „Ei, Tuhan, needadai, inii bokaate,” etii.

²⁶Tijake eteete mana, „Magijo ka ikii weda gaaga? kowaa kei, epaapate maakodo gai beu bagee,” etii. Tijake okai anigojake ukija ma dokogaa ma ewidogijake umina ipadoke tai.

²⁷Meido kede ego takuu-takuu tijake eteete mana, „Kii ke meime? ukija ma peku ma jajuweega kou ko,” wegai.

²⁸Auwaato adijake Gadara bagee ka makijo dakii tijake enija jago me wija ma akado tai, me okaapa make aameetigo. Enija ebepeka tita umina kouja kou itaiga kodaa me idaana ma te jawimake.

²⁹Tijake kei wija kede emeeme aeteete mana, „Aki ma inii ma má imee? ei, Ugatame Joka. Putu beu gaa aki peu neewiine meege, mee?” etii.

³⁰Okeepa make poto dani ekina ibo imouto kigi nootigo.

³¹Tijake enijaido Jesuspa ediimeete mana, „Kou danite aki neemigimakaine gape ko, nijaiki ekinaido dubo amoujo kaine no,” etii.

³²Tijake okai uwii etijake enijaido kodo podomijake ekina duba amoujo kai. Tijake ekina imouto kodo egoudaiga begakapu tidaa tijake pekuuda kenapune tijake bokai.

³³Ekina ooto-tai bagee kede tibigi uwijake maki okogoopa wadoujo kijake kou mana muto wegakumii; enija jago me kede maida make mana maija.

³⁴Tijake kou makijo maki utoma podomijake Jesus edou uwii. Edomakijake iniija makiida nijajaikai ediimai.