Read Galela MARKUS 10 Bible Online

MARKUS 10 - Galela bible

MARKUS 10

¹Kouda kodaa make uwijake Judea dokoo ma, Jarden onee auwaato ma dakii tai. Me wedaba kotuu timakeigai danite kotuu timakai. Tijake okai etopeigi danite etopai.

²Parisi bagee okaapa mejake egaado teete mana, „Me idaana jagamome ejaikai pijo, mee?” egaado tai.

³Tijake Jesus wo eteete mana, „Musaja kawe dani kitimakita?” etii.

⁴Tijake okeija ka eteete mana, „Musaja mana, mege badii kapogeije jaugajawijake ejaikai enita,” etii.

⁵Tijake Jesus eteete mana, „Ikiija ka kegepa bida kouja kou mana muto kijaebijamakita.

⁶Kodeja edoga kidi uwoje makije ugajawita gaa, Ugatameja jame ma jagamo ma eugajawita.

⁷Okai kouja jame idaana nakame ukame ejaikijake jagamome ma enaida aakai,

⁸tijake okejai wija ena emo ena tine kidaa tai. Kojoka okejai wija ko beu, kodeja ena tine kidi to.

⁹Okai kouja Ugatameja tawajawita kidi ki me ka ko okaakai te tijawii,” etii.

¹⁰Okai owaapa dakii tijake okai kou mana kodo etope-taido kigeena ma egaado tai.

¹¹Tijake Jesus eteete mana, „Meija jagamome ejaikijake ino ka jagamo wo ebukipi, ejaikita me maida mogai.

¹²Daana kou danite jagamo idaana okaija jameme ejaikijake ino jameepa uwi-toojogo, okai maija mogai,” etii.

¹³Me ka jokaido Jesuspa oomei, jokaido kodo ejakido-tita, tijake etope-taido enogimai.

¹⁴Okai kou kodo Jesus edojake okai emoge gai, eteete mana, „Jokaido kei aneepa me-tita no naaejaikei. Wate-wate te etai; Ugatameja jakimakita makiida kei dani bagee ipuwe kouja.

¹⁵Beu maa kou ani kitii, meija Ugatameja jakimakita makiida joka dani tijake te jakimakipi, okai kouda kodaa umina wadoujo te kaitagi,” etii.

¹⁶Tijake jokaido kede ejupugijake okei maida gane jamakijake mobu menii.

¹⁷Okai ita maida uweetigo me idaana tibigi mejake okaapa mijouga kijake eteete mana, „Ei, enauto Kuduu, ani magijo kei tai, ajii taine no?” etii.

¹⁸Tijake Jesus wo eteete mana, „Magijo ka enauto naabateege? Meena ma enaa beu, kodeja Ena to, kii ke Ugatame kidi.

¹⁹Nitimakita manaido aki epi. Me te wagii, mogai te tai, oma te motii, puja mana te kubai, me puja te eukai, akaitai akuukai ibo ejaikai,” etii.

²⁰Tijake joko eteete mana, „Ei, Kuduu, kei utoma jokaida kodaa make dijo douga,” etii.

²¹Tijake Jesus jokaagaa kidi edojake ipa egajake eteete mana, „Tumaana to akeepa beu. Akija agijoudo kaa te-uwijake daba bageepa menii. Tijake aki epaawado ka agijo makiitage. Daana mejake naapei,” etii.

²²Okai kou mana kodo juwijake okaija ebepeka nogiwadoke tijake gaagaa ma uwii, okai agijo wedaba kouja.

²³Jesus wado doumigijake etope-taidoopa eteete mana, „Tonawi bagee Ugatameja jakimakita makiida wadoujo kai ko gaagaa umina no,” etii.

²⁴Etope-taido ego takuu-takuu umina kou mana kodo maida make. Tijake Jesus kigeena me eteete mana, „Kowaa kei, ani jokaaneido, tonawi agijoudo to dimi kotopijawii bagee Ugatameja jakimakita makiida wadoujo kai ko gaagaa no.

²⁵Tonawi me idaana Ugatameja jakimakita makiida wadoujo kai ma ko, unta idaana keipo mugu duba woujo kai ko euga ekowamakija,” etii.

²⁶Kodeja okei ego takuu-takuu umina tijake eteete mana, „Keetigo ko meime ajii tija?” etii.

²⁷Tijake Jesus edomakijake eteete mana, „Me ka te ekowamakija kodeja, Ugatame kou dani ko beu. Ugatame kidi utoma agijo utoma ekowamakija,” etii.

²⁸Tijake Peterus eteete mana, „Dodou, inii ke utoma agijo jaikidokijake kaapeetege,” etii.

²⁹Tijake Jesus eteete mana, „Beu maa kou ani kitii, ani maida make, daana ajii mana maida make me idaana ma owaa ma, kenekaane ma, panekaane ma, ukame nakame ma, jokaane ma, maki ma te ejaikidokii,

³⁰kodeja okai ito kii makiida kiija kigi mutoona[3] joko motiitagi, kou ko, owaido ma, kenekaane ma, panekaane ma, ukaane ma, jokaane ma, maki ma, daana ewidogai ma, tijake putuuda kodaa ajii tai imo to togoo.

³¹Kodeja okei tiga bagee wedaba nemouga kaitai, daana nemouga ka bagee okei tiga kaitai,” etii.

³²Okei ita maida Jerusalim wado uweetigo Jesus tiga ouwii. Okei ego takuu-takuu tijake eepeete bageido maija weda gai. Wija ma gaati kede ouwijake okai maida makeeniitai manaido okai etii,

³³eteete mana, „Juwidowei, inii Jerusalim wado uwii. Me Joka kidi imam iboudo ma, kapogeije epi bagee maapa eekegajawijake wagiine mana wegaitai; tijake ojaa bageepa eekegajawiitai;

³⁴okei ewidogaitai, daana epoge etuwaitai, daana godijai etijake wagimakaitai, tijake uno wido umijake anigoutagi,” etii.

³⁵Zabdi jokaaneija Jakub ma, Jahja ma aamejake aeteete mana, „Ei, Kuduu, inaija ide agijo aki nijakei tijawii kadiimai,” aetai.

³⁶Tijake Jesus eteete mana, „Ani kijakei tai magijo ide?” etii.

³⁷Tijake okejai aeteete mana, „Inai ke me idaana ki akija etikaato gebo, daana me idaana ki akija akaato gebo akija ajiipi duba aanimake-tijake niimai,” aetai.

³⁸Kodeja Jesus eteete mana, „Ikaija ka aanadiimeega agijo ikai aagai beu. Anija naita uwaawe ikai aanomake, mee? Daana anija baptis natai danite ikai maija baptis kitimake, mee?” etii.

³⁹Tijake okejaija ka aeteete mana, „Enaa, aakei taitage,” aetai. Tijake Jesus wo eteete mana, „Anija naita uwaawe ikai aanaita, daana anija baptis natai danite ikai maija baptis kitai,

⁴⁰kodeja anija etikaato gebo, akaato gebo aanimakai mana kou ko anija menija ko beu; kodeja epeepi jatijawita bageepa kaita,” etii.

⁴¹Joko ka gaati kede kou mana kodo juwijake okei Jakub ma, Jahja ma emoge egai.

⁴²Tijake Jesus okei utoma manaa-tijake eteete mana, „Ikii epi ojaa bagee ejakimakija bagee kedaa bida peu etimakai, daana okeija ka iboudo kedaa boko jaduwajawii.

⁴³Kodeja ikii jupi kou dani ko beu. Kodeja meija ikii jupi ibo kaine gapi, kijakei te-tai me kai enaa.

⁴⁴Daana meija ikii jupi okai tiga kaine gapi, okai utoma bagee jakei te-tai me kai.

⁴⁵Me Joka maija me ka jakei te-tijake mei ko beu kouja, kodeja meepa jakei tijake me wedaba komoka jaawiine tijake dimi mana ekegajawii,” etii.

⁴⁶Tijake okei Jericho makijo dakii. Jesus ma etope-taido ma enaimo me wedaba ma Jericho makijo podomeetigo gaa Timeus jokame Bartimeus kidi peka wanee diime-tai me kidi ita watija animaki-toojogo.

⁴⁷Jesus Nazaret ka me kidi jaweete mana juwijake okai emeeme teete mana, „Ei, Jesus, Daud Joka, ipa nagai,” etii.

⁴⁸Daana me wedaba ka ewidogijake gabo tou etii, kodeja umina kidi emeeme to tigoo, „Ei, Daud Joka, ipa nagai!” etii.

⁴⁹Jesus joonidoke tijake eteete mana, „Manaa-tiwei,” etii. Okei peka wanee me kidi manaa-tijake eteete mana, „Kegepa tipinimaki, jooni, mana kateete,” etii.

⁵⁰Daana eba jaikidokijake kii gaa kidi joonidoke, tijake Jesuspa uwii.

⁵¹Tijake Jesus eteete mana, „Aki magijo ide ani kakei tai ko?” etii. Tijake peka wanee me kidaa eteete mana, „Ei, Kuduu, peka nakadijawii kadiimai,” etii.

⁵²Tijake Jesus eteete mana, „Aki uwi, akija maakodo gai kodaa beu keege,” etii. Okai kou gaa kodo maija peka kadidoke tijake Jesus ita maida eepei.