Read Galela MARKUS 12 Bible Online

MARKUS 12 - Galela bible

MARKUS 12

¹Jesus ena dani awe-tai mana oowegai. „Me idaana uta buda táí wejake eda wagijawii. Utaadijo tigimaida utii ma, douto-tai owaa migii ma tijake mune-tai bageepa jajaikijake joko ka makiida uwii.

²Uta uwa kijake jakei te-tai me idaana mune-tai bageepa ebadikumii, mune-tai bageepa make taida ka uta motiine tijake.

³Tijake okei ejakimakijake kopa wagii, tijake agijo tagu eebakikumii.

⁴Okai wijaago jakei te-tai me idaana ma ebadikumii, daana kii me kidi okei migo maida kopa wagijake peepu umina etijawii.

⁵Daana me idaana maija ebadikumii. Kii me kidi okei wagimakai, daana me ino maija wedaba nemouga ebadikumijake kei bageido ino ke kopa wagii, ino ke umina wagimakai.

⁶Me idaana maija, kii ke jokame didé kidi; muumai jago kii kidi ebadikumii, kei teete mana, Ani joka okei ibo ejaikaitai, gajake.

⁷Kodeja mune-tai bageido kede wegaate mana, ’Kii ke okai komouto kaine me. Mewei, neewagei, jajaikaitagi agijo inii ipuwe ke-tita no,’ wegai.

⁸Okei ejakimakijake wagimakai, tijake taida make eemigimakai.

⁹Kojoka táí ipuwe me kidaa magijo kei etaitagi? Okai mejake mune-tai bagee kede wagimakijake táí kodo me inoopa jajaikaitagi.

¹⁰Ikii kii kapogeije ki ebatai beu mee? Owaa mige-tai bagee ka jamo jaikita mogo kodo Owaa butu ka kabo makita mogo pigu tijawita.

¹¹Kii ke Tuhanja kei tijake Inii pekaida apai agijo.”

¹²Okei Jesus ejakimakaine dimi gai, kodeja okei meido kodo weda egai. Kii ena dani awe-tai mana okei maida jawegata gamakai kouja. Okei Jesus ejaikijake uwii.

¹³Okei Parisi bagee ma, Herodes eepe-tai bagee ma wija wido ebadikumii, okaija mana maida ejakimakaine tijake.

¹⁴Okei Jesuspa mejake eteete mana, „Ei, Kuduu, inii epi aki maakidi me, daana me idaana ma ibo ejaikai beu; aki me ebepeka te witokai kouja, kodeja Ugatameja takaa doodoudaiga nitopeige. Kaisar mege menii pijo, mee? dá.

¹⁵Inii menii, mee? beu,” etii. Tijake okeija ka matabe dimi Jesus epi kouja eteete mana, „Magijo ka ikii nagaado tai? Mege aneepa naadoke-mewei, ani doune no,” etii.

¹⁶Jadoke-mejake Jesus eteete mana, „Meija ajá ma ebijamakita mana ma topi?” Etijake „Kaisar ipuwe,” etii.

¹⁷Tijake Jesus wo eteete mana, „Kaisar ipuwe agijo Kaisar wo menii, daana Ugatame ipuwe agijo Ugatame wo menii,” etii. Okei ego takuu-takuu umina etai.

¹⁸Saduki bagee okaapa mei; bokata bagee taanigou mana wega-tai bagee kede. Okei egaado teete mana,

¹⁹„Ei, Kuduu, Musaja nijaebijamakita mana ko: Kou danite me idaana kenekame bokajake jagamome tou, kodeja joka beu ki-toojogo, mijáá kodo wo bukijake kenekame maida make me ijoo jakebajawii.

²⁰Okei keneka pituwo toojogo. Ibouto kidi waka bukijake joka beu kidi bokai.

²¹Daana ipougame jagamo kodo wo bukijake joka beu kidi bokai. Daana mabiime maija kou kei tai.

²²Okei pituwo joka makii beu. Muumai jago jagamo kodomaija bokai.

²³Bokata bagee anigou naago kou jagamo kodo meija waka kaita? Okei pituwo ebukita kou no,” etii.

²⁴Tijake Jesus eteete mana, „Beu, mee? okai kii maida make ikii uneune, ikii kapogeije ma, Ugatameja bida agijo ma ewo kouja.

²⁵Okei bokata bagee jupi make anigopai ko waka bukii na beu, waka eumai na beu, kodeja epaawado ka jaetigo-tai bagee dani bukaa.

²⁶Kodeja bokata bagee eenigojawii mana muto ko, ikii Musaja kapogeije ebatai beu, mee? Okogo manaida kodaa Ugatameja etita mana muto kodo: Ani ki Ibrahimja Ugatame, daana Isakja Ugatame, daana Jakubja Ugatame kidi.

²⁷Ugatame kidi bokata bagee ipuwe ko beu, kodeja ija bagee ipuwe. Ikii umina maa kou dimi uneune bagee,” etii.

²⁸Kapogeijo epi bagee ma idaana mejake akagaado teete mana kodo juwii. Jesus enaa mana etipi edojake okai egaado teete mana, „Kawi ka nitimakita mana ki epauto mana?” etii.

²⁹Tijake Jesus eteete mana, „Epauto ka ko kii dani: Juwidodowei, kowaa kei, Israil bagee, iniija Tuhan Ugatame kidi ki okai Ena to.

³⁰Akija Tuhan Ugatame kidi kegepa puki ka ei egai, daana dimi mana puki ka ma, daana dimi puki ka ma, daana bida puki ka ma.

³¹Daana wijaago ka ko kii dani: Aki watija ka bagee aki akaato danite ipa egai. Kei wija ma ko joko ka nitimakita mana ibo beu,” etii.

³²Tijake kapogeije epi me kidaa eteete mana, „Ei, Kuduu, aki eneege ko maakodo, Ugatame okai Ena to, daana ino beu, kodeja Ugatame kidi to.

³³Daana Ugatame kegepa puki ka ei egai, daana dimi mana puki ka ma, daana bida puki ka ma; daana aki watija bagee aki akaato danite ipa egai, kou ko nitimakita mana epauto puki, utoma jo-menija ma, wagi-menija ma ko beu,” etii.

³⁴Okai epeepite joko etii ko Jesus edojake eteete mana, „Aki Ugatameja jakimakita makiida make ko poto ko beu,” etii. Kou wado me idaana ma egaado tai uu beu.

³⁵Jesus Ugatameja owaa duba me etopeetigo eteete mana, „Kawe dani tijake kapogeije epi bagee ka Keristus kidi Daud Jokame wegaigai?

³⁶Daud kidaa Rohulkudus ka gokobaki etijawijake wegata kouja: Tuhan kidaa anija Tuhan kidiipa etita mana, Anija etikaato gebo animakai, Be kagata bagee akija bado mijouto tagi atijake Bado makijaida kaajaikaitaida to.

³⁷Daud kidaa Tuhan eebatita. Kawe dani tijake okai Jokame kai?” etii. Daana meido utoma Jesusja mana ejuwai ko ide umina.

³⁸Jesus etopeete mana duba eteete mana, „Kapogeije epi bagee maida make ikii akaato munii. Okei woja kagaba makijake ita uwina te-tai ide, daana akaada te-taida ibo ejaikai mana juwii ide.

³⁹Sembahjang owaa duba ibo animakaida ide; daana buka naida diiti pagaadagaida maija.

⁴⁰Mijáá jagamo jabokomimakai, daana utoopa sembahjang woja. Umina peu kugouto dokeenii,” etii.

⁴¹Jesus mege awijake te-tai watija animakijake me ka mege amaaweetigo okai edoutou. Tonawi bagee wedaba mege wedaba awijake tai.

⁴²Daba mijáá jagamo idaana mejake mijo mege wija amaawii; mijo mege wija kei sen ena age.

⁴³Jesus etope-taido manaa-tijake eteete mana, „Ani maa kou kitii, mege awe-taida kuuga ko amaaweete bagee utoma ko, kou daba mijáá kodo euga abuma amaaweega.

⁴⁴Okei utoma okeija abuma totaida ka amaaweegai kouja. Kodeja jagamo kou ko okai beu kodeja okaapa totaija kede amaaweega, okai umi-tou tija gaa ka kodo,” etii.