Read Galela MARKUS 16 Bible Online

MARKUS 16 - Galela bible

MARKUS 16

¹Kou Sabbat naago muumai tijake Marjam Magdalena ma, Jakub ukame Marjam ma, Salome ma unu enaa agijo edai; Jesusja má maida etuumijake-taine mei.

²Awe digii okai kou dá putu ka edoga naago kodo okei me okaapa mei, meuka wadoujo keetigo gaa.

³Okei kei teete mana, „Meija me okaapa ka taki atita mogo kodo nijabegokimake no?” wegai.

⁴Okei wado dojake mogo kodo begokidoke ti-toojogo dou, mogo kodo ibo kouja.

⁵Tijake okei me oka duba woujo kijake, jokaagaa idaana etikaato watija animaki-toojogo edou, pokadee kagaba makijawita. Tijake okei ego takuu-takuu umina.

⁶Tijake jokaagaa kidaa eteete mana, „Ego takuu-takuu te tai. Ikii Jesus eubaate, Nazaret ka me kidi, pija boko maida edajawita kidi. Okai anigopi; jakai beu topi; emakitaida dodowei.

⁷Kodeja ikii uwijake okaija etope-taido ma, Peterus ma eti-menii, okai tiga Galilea makijo uwiitagi mana. Okai kouda kodaa ikii edouta, okaija kiteetegi danite,” etii.

⁸Tijake okei podomijake me okaapa make tibigi okii, pigi pigi ma, ego takuu-takuu ma okei maida kidoke kouja. Tijake okei me idaana ma etii beu, weda umina kouja.

⁹Kou dá putu duba ka edoga naago kodo abata Jesus anigojake edoga kidi Marjam Magdalenaapa ewaa kai; enija pituwo jaemigimakita me kodo.

¹⁰Kou jagamo kodo meidoopa ete-uwii; Jesusja etope-taido gaagaa ma, jege ma teete bageepa.

¹¹Tijake okei Jesus ija kipi mana juwijake, daana jagamo kodaa edopa mana kodo, okei maakodo egai beu.

¹²Wadoutouga Jesus ino epoo dani okai kou bageido ka me ida wijaapa ewaa kai, okejai wija maki katouda auweetigo.

¹³Tijake kei me ida wija kede metaato amo auwijake okai kou mana kodo etope-taidoopa aetai kodeja, okei maakodo egai beu.

¹⁴Nemouga etope-tai ena ma gaati animakijake nootigo gaa Jesus okei jupi ewaa kai. Okei maakidi gai beu kodo, kegepa bida kouja, Jesus ewidogai, daana okai anigojake wadouto ka edoga edota bagee ka mana okei maakodo egai beu kouja.

¹⁵Tijake Jesus etimakeete mana, „Uwoje makije uwijake e tuma te tumaapa ajii mana wudikumii.

¹⁶Meija maakodo gajake baptis tipi ajii taitagi. Kodeja meija maakodo te gapi peu kaitagi.

¹⁷Kei ego takuu-takuu agijoudo kei ke maakodo gai bagee eepopaitai. Ani eka dubaiga okei enija jaemigimakaitai, daana okei mana gimo gimoudaiga wegaitai.

¹⁸Okei jina maija wado jaki-motiitai. Kou danite okei me bokaja uwo nopai maija, okei didi te taitai. Okei didi bagee maida gane jamakijake beu kaitai.”

¹⁹Tuhan Jesus kou dani mana etimakijake wado ebuki-motita epaawado, tijake Ugatameja etikaato gebo animakai.

²⁰Okei uwijake kiida kouda ajii mana wudikumii. Tuhan eedadai, daana dou beu manaido kodaa okeija mana kodo boko jaduwajawii.