Read Galela MARKUS 4 Bible Online

MARKUS 4 - Galela bible

MARKUS 4

¹Kigeena ma Jesus me wedaba iteida make etopai. Me wedaba okaapa kotuu timakijake okai koma matakai, uwo wado toune tijake. Me wedaba kede adaida peku watija kodaa tou.

²Okai mana muto inoudo ena dani awe-tai manaidaiga meido etopai, etopeete mana ko,

³„Juwidowei, pi kigii te-tai me kidi pi kigii taine podomai.

⁴Okai pi kigii teetigo pi ino ko ita watija gootidaa; tijake bedoudo mejake nojawigou.

⁵Ino ko mogo makiida gootidaa, maki beu daniida; tijake egaa kodo pakamai, maki beu dani kouja.

⁶Kodeja meuka wadoujo kijake denadaa tai; tijake mani beu kouja wei kogi tai.

⁷Ino ko dogo jupi gootidaa; dogo ejajake pi kodo mijo gapegape tai, tijake uta gou beu.

⁸Ino ko enaa makiida gootidaa tijake uta gojake abuma kidaa tai; ino ko jokagaati, ino ko mutoona, ino ko mepiija ka wija ajaago tidaa.”

⁹Tijake eteete mana, „Juwe-tijake gapa jago bagee juwii to tai,” etii.

¹⁰Jesus to kijake okai eepeete bagee ma, etope-tai wija ma gaati ma ka ena dani awe-tai mana kodo etidou.

¹¹Tijake Jesus eteete mana, „Ugatameja jakimakita makiida ka boone-boone mana kodo kinita, kodeja ojaa bageidoopa ena dani awe-tai manaidaiga kei manaido etii.

¹²Okei dojake te domake-tita; daana juwijake te gamaketita; okei tedemijake peu awita ipa ejaikai na kojoka.”

¹³Tijake eteete mana, „Ikii ena dani awei-tai mana ko gai beu, mee? Kawe dani tijake ino ka ena dani awe-tai mana gamakija?

¹⁴Pi kigii te-tai me kidi ki mana muto kodo kigii te-tai kidi.

¹⁵Kei ke ita watija ka mana muto kigii tita kede: Okei mana juwijake okai kou gaa kodo kegepa duba kigii tita mana kodo Teege mejake jamotigou.

¹⁶Kii dani maija, mogo makiida ka kigii tita kede ke, mana muto juwijake okai kou gaa kodo egaa ideide ma jakimakai.

¹⁷Kodeja okei duba mani wejawii beu kouja mijo gaa to jakimakai; tijake mana kodo maida make gaagaa juwa, peepu juwa eti-toojogo, okai kou gaa kodaa okei jaikidokii.

¹⁸Joko daniido kede dogo jupi kigii tita kodo ko, okei mana muto kodo juwita bagee;

¹⁹tijake makiida ka gai peu agijo ma, tonawi agijoudo eukai mana ma, tuma tumaija agijo kibigi gai ma kodaa mana muto mijo gape-gape tai, tijake uta gou beu.

²⁰Kodeja enaa makiida kigii tita kodo, kou ko mana muto juwijake jakimakita bagee; tijake uta gojake, jokagaati juwa, mutoona juwa, mepiija ka wija juwa ajaago tidaa.”

²¹Tijake Jesus eteete mana, „Me ka lampu doke-mejake kakate mijo makeigai, mee? Uno umii kejage mijo makeigai, mee? Beu, mee? lampu make-taida makija kodo ko.

²²Tumaana agijo ma te boonimakita, kodeja ewaa tapa ketita. Daana gabo agijo ena ma beu, kodeja ewaida ke-tita.

²³Meija juwe-tijake gapa jago kipi juwii to tai,” etii.

²⁴Daana Jesusja eteete mana, „Ikii juwija mana epeepite gai. Ikii jaebijadojake menii kodo danite, kijaebijadojake kiniitai kouja, daana abuma maija kijamakii.

²⁵Agijo jago bageepa euga menii kouja; daana agijo tagu bageepa make makita agijo kodo jamotii.”

²⁶Daana ino ka mana maija kii dani eteete, „Ugatameja jakimakita makiida kodo, me idaana makiida pi kigii tija danite.

²⁷Okai uno umii ma, anigou ma, wanee ma agapi ma, daana pi kodo pakamijake ejai, kodeja kawe danite ejapa ko ewo.

²⁸Maki kodaa uta podomijawii, edoga kidi pudu-pudu, tijake uta gobadaa. Gobadaa tijake miti ewaa kai uta duba kodo.

²⁹Uta kodo enáá kai wagi ko duwa-tai bagee ebadikumii, uta duwai wagi kidoke kouja.”

³⁰Daana Jesus eteete mana, „Inii kawe dani tijake Ugatameja jakimakita makiida ena dani awija? Má ena dani awe-tai mana ka ewaa tapa awija?

³¹Kou ko sesawi miteena dani bukaa; makiida wejake joko ka miti ma ko umina mijo daba kodeja,

³²we-toojogo ko ejajake naapoudo ma ko euga ibo kijake ibo kago makii. Tijake okai kou mijo kodaa epa bede maki bede ka bedoudo kede geka migii,” etii.

³³Okai kou dani okai ena dani awe-tai mana inoudo ka mana muto kodo oowegai, okeija gaja danite.

³⁴Ena dani awe-tai mana beudaiga okai oowegai beu. Kodeja etope-taido ma to toja gaa to, okai kou mana mutoudo kodo eti-menii.

³⁵Okai kou naago kodo uwaataa kijake Jesus etope-taido „Mewei, inii peku adii no,” etii.

³⁶Meido kodo Jesus uwei etijake, komaida toogi dani to etope-taido ka Jesus ouwii. Ino ka mijo koma maija okei ma enaimo.

³⁷Kou gaa kodo ukija ibo peijo mijouwe kijake ukija kodo koma adaawe tai, gaadi edidaa taine dani.

³⁸Jesus koma epaato eba maida uno umi-toojogo. Tijake okei matoki eteete mana, „Ei, Kuduu, inii bokaate kodo nigai beu?” etii.

³⁹Okai anigojake ukija kodo ewidogijake peku kodo eteete mana, „Gabo. Ipadoke ti,” etii. Ukija kodo duwadoke tijake umina ipadoke tai.

⁴⁰Tijake Jesus eteete mana, „Magijo ka ikii weda gaaga? Ikii maakodo gai beu, mee?” etii.

⁴¹Okei weda umina gajake okei kede wegaate mana, „Kii ke meime no? ukija ma peku ma jajuweega kou ko,” wegai.