Read Galela MARKUS 5 Bible Online

MARKUS 5 - Galela bible

MARKUS 5

¹Okei peku auwaato adijake, Gadara bagee ka makijo dakii.

²Jesus komaida make mijouwe kijake okai kou gaa kodo maija enija jago me idaana me okaapa make mejake okai ma akado tai.

³Okaija touda ko me okaapa to. Me idaana ka ma te egadimimakija, pute ka keetigo maija.

⁴Kigi inoudo pute buda ka bado egadimimake-tai; umina bida egadimimakai kodeja, pute buda kodo okai duwamigetai. Umina bida egadimimakita buda maija juwagii te-jamo. Tijake me idaana ka ma daba taawija.

⁵Agapi beu wanee beu me okaapa ma, dimiida ma, emeeme to te-tai. Okai akaato mogo ka dedomai ma.

⁶Kodeja Jesus poto make edojake tibigi mejake migaakobe etai.

⁷Kuutakaa emeeme teete mana, „Ei, Jesus, Monika Ugatame Jokaibo, aki ma ani ma má imee? Ugatame pekaida baita makii, ani peu te naawii,” etii.

⁸Jesusja, „Enija, me kidi duba make podomi,” etijake kouja.

⁹Tijake Jesus egaado teete mana, „Akeeka meime?” Etijake „Aneeka ko Legion. Inii wedaba kodaa,” etii.

¹⁰Tijake okai Jesus bida peu ediimai, kou makiida make te ebakikume-tijake.

¹¹Kotuuda kodaa ekina ibo imouto kigi nootigo.

¹²Enijaido kodaa Jesuspa ediimeete mana, „Inii ekina duba amoujo kaine no,” etii.

¹³Tijake okai ejaikai. Enijaido kodo podomijake ekina duba amoujo kai. Ekina imouto kodo egoudaiga begakapu tidaa tijake pekuuda gootidaa, ekina muto muto to ko jokagaati. Tijake okei uwo duba kodaa kenapune tijake bokai.

¹⁴Ekina ooto-tai bagee kede tibigi uwijake kou maki okogo ma, kou maki dokoo ma mana kodo wegakumii. Meido kede kei tidoke tipa mana doune tijake mei.

¹⁵Meido Jesuspa mejake enija jago me kidi kagaba makijake dimi enaa kijake animaki-toojogo edou; te gakimake enija ka awidaa tita me kidi ki. Tijake okei weda gai.

¹⁶Edopai bagee kodaa enija jago me jakei tijawita mana kodo eti-menii, daana ekina maida make ka mana maija.

¹⁷Tijake meido kodaa iniija makiida nijajaikai ediimai.

¹⁸Jesus koma matakijake enija awidaa tita me kidaa ediimai, okai ma enaimo kaine tijake.

¹⁹Kodeja Jesus beu etii. Tijake eteete mana, „Akija owaapa ma, akoogeimaapa ma uwijake Ugatameja ibo kakei teegi mana kodo eti-menii, daana okaija umina ipa kagaagi kodo maija,” etii.

²⁰Okai uwijake Dekapolis maki dokoo kodo Jesusja ibo jakei tijawipi mana kodo wegaate go-motii. Tijake meido utoma ego takuu-takuu umina.

²¹Jesus metaato komaiga joko adijake me wedaba okaapa kotuu timakai, peku watija kodaa.

²²Sembahjang owaa douto-tai me idaana eka Jairus mei. Okai Jesus edojake okai jumaapa mijouga kai.

²³Okai ediimai umina eteete mana, „Anija jagamo joka bokaine dani teete. Gane okai maida jamakiine mei kadiimai, beu kijake ija ke-tita,” etii.

²⁴Tijake okai ma enaimo uwijake me wedaba eepeete tipi-tipi etai.

²⁵Jagamo idaana emo to ume-ume teete didi taun wija ma gaati umita toojogo.

²⁶Doktoda wedaba ka gaduwai umina etijawii, daana kou maida make okaija agijo utoma mapugajawii kodeja, beu te kijake didi kodo abuma kidaa.

²⁷Jesus maida make mana jagamo kodo juwijake okai meido kodo nemouga mejake Jesusja kagaba jawinikidou.

²⁸Okai kii dani gajake, okaija kagaba jawinikidopa ko ani didi beu kaipiga kouja, dimi gajake.

²⁹Okai kou gaa kodaa okaija emo ume-tai kodo duwadoke tai. Okaija má maida didi beu keega gai.

³⁰Okai kou gaa kodo maija Jesus duba make bida agijo podomeega gajake meidoopa wouga wakouga tijake eteete mana, „Meime anija kagaba nawinikidooga?” etii.

³¹Tijake etope-taido ka eteete mana, „Meido tipi-tipi kateete aki edooge kouja, kawe dani tijake ’Meime nawinikidooga?’ eneege kou ko,” etii.

³²Jesus kou watija doumigii, kei tipa me edoune tijake.

³³Tijake jagamo kodo okai duba kei tidoke tipa mana kodo gajake weda ma totome ma Jesuspa mejake okai jumaapa mijouga kai. Tijake akaato mana kodo epeepite eti-menii.

³⁴Tijake Jesusja, „Ani joka,” etii. „Akija maakodo gai kodaa didi kodo beu keege. Kojáá na ka uwii, daana didi kodo beu keege,” etii.

³⁵Okai mana wegaatigo gaa kodaa sembahjang owaa doutotai me ka owaapa make me wija wido mejake eteete mana, „Aki joka bokaaga. Magijo taine Kuduu dimi gaagaa etijawii kodo?” etii.

³⁶Kodeja Jesus kou mana dimi te gajake sembahjang owaa douto-tai meepa eteete mana, „Weda te gai. Maakodo gai to,” etii.

³⁷Jesus me idaana ma eepe-tijake ejaikai beu, kodeja Peterus ma, Jakub ma, Jahja ma, Jakub kenekame kidi to.

³⁸Me ibo kidaa owaapa dakii tijake nogee umina teetigo edou. Daana me wedaba jege ma, jiijii ma teetigo.

³⁹Jesus wadoujo kijake eteete mana, „Magijo ka jiijii ma, jege ma teete? Joka kodo bokai beu, kodeja uno umeete,” etii.

⁴⁰Tijake okei ewidogeete odijai etai. Meido kodo juwouda epodomijawijake nakame ma ukame ma okai ma enaimo meido ma ouwijake joka kodo bokapaida jokoujo kai.

⁴¹Joka kodo gane ejakijake eteete mana, „Talita kumi” etii. Me manaida awi-toojogo ko, „Joka dabaa, ani katii, anigodou,” etita mana.

⁴²Okai kou gaa kodaa okai anigojake uwina tai. Okai epajake ko taun wija ma gaati umita kodaa. Me utoma umina maa kou ego takuu-takuu timakai.

⁴³Tijake Jesus umina bida peu kidi kou mana kodo ugo te uwe-tijake etimakai. Tijake joka kodo naija agijo menii etii.