Read Galela MARKUS 8 Bible Online

MARKUS 8 - Galela bible

MARKUS 8

¹Okai kou gaa kodo maija me wedaba kotuu timakijake okei naija agijo tagu kojoka Jesus etope-taido manaa-tijake eteete mana,

²„Ani meido kei ipa egai, okei uno wido ani ma neetou kouja, daana naija agijo ena ma beu.

³Daana naidi ma okei owaapa uwei etipa ko, okei ita maida bobaa taipigai kodaa, poto bagee maija mejake kouja,” etii.

⁴Tijake etope-taido wo eteete mana, „Kaija make goti motijake kii me beuda kiija me wedaba kei ke mobu awiine ko?” etii.

⁵Tijake Jesus eteete mana, „Ikeepa goti kemo magoo topai?” Etijake wo eteete mana, „Pituwo topai,” etii.

⁶Meido kodo maki maida animake-tei etijake, goti kemo pituwo kodo motijake nagajaweege mana eti-menii. Okai utijake etope-taido menii, meido kodoopa jawude-tijake. Tijake meido kodoopa jawudina.

⁷Mijo binei wija wido maija topai. Sembahjang tijake binei kede jawudei etii.

⁸Okei nojake mobu kai. Utita abu kitaija kodo mo-motijake edu tapuja pituwo awimakai.

⁹Okei me ida muto muto to mutoona.[2] Okai meido uwei etii.

¹⁰Okai kou gaa kodo maija etope-taido ma enaimo koma matakijake Dalmanuta makijo dakii tai.

¹¹Parisi bagee mejake Jesus egaado tai, epa maida make dou beu agijo doune egaado teete ko.

¹²Okaija kegepa duba umina gaagaa tijake kei teete mana, „Magijo ka kii tuma ki dou beu agijo ubaate? Beu maa kou ani kitii, kii tuma kiipa dou beu agijo tumaana ma te emuwakaita,” etii.

¹³Okai meido ejaikidokijake koma kigeena ma matakijake metaato adii.

¹⁴Etope-taido goti adaku tijake dokii beu. Komaageida abuma beu, kodeja mijo goti ena to.

¹⁵Tijake Jesus etimakeete mana, „Epeepite gai, Parisi bagee ma Herodes eepe-tai bagee ma ka ejajawe-tai maida make ko ikii akaato munii,” etii.

¹⁶Okei kede akado wegene teete mana, „Inii goti beu kouja,” wegai.

¹⁷Tijake okeija dimi Jesus egamakijake eteete mana, „Magijo ka ikii akado wegene teete, goti beu mana kodo? Ikii gamakai beu, mee? Ikiija kegepa bida, mee?

¹⁸Ikii peka jago kodeja dou beu tipa? Ikii gapa jago, kodeja juwii beu tipa? Ikii gai beu, mee?

¹⁹Ani goti kemo idibi me ida muto muto to muto, daana abuma maija jauteetega gaa kodo, ikii utita abu kitaija edu tapuja magoo awimakeetega?” etii. Tijake okei eteete mana, „Wija ma gaati kodo ko,” etii.

²⁰„Daana kigeena ma goti kemo pituwo me ida muto muto to mutoona jauteetega gaa kodo, utita abu kitaija edu tapuja magoo awimakeetega?” Etijake joko eteete mana, „Pituwo kodo ko,” etii.

²¹Tijake Jesus eteete mana, „Ikii ito maija gai beu, mee?” etii.

²²Okei Baitsaida makijo mei. Peka wanee me idaana me ka oomejake ewinikido-tijake ediimai.

²³Peka wanee me kidi Jesus gane ejakijake kou makiida make ouwii. Peka maida epoge jatuwajake okaija gane me kidi maida jamakii, egaado teete mana, „Tumaana agijo aki dooge, mee?” etii.

²⁴Tijake doumigijake eteete mana, „Ani me edooga kodeja, okei pija uti danite uwina,” etii.

²⁵Kigeena ma peka maida gane jamakijake okai beu kijake epeepite domakai, daana utoma agijo ewaida kai.

²⁶Okaija owaapa uwii etijake eteete mana, „Maki okogoonaida wadoujo te kai,” etii.

²⁷Jesus ma etope-taido ma uwijake Kaisaria Pilipi maki dokouda ka makijoodaapa uwii. Ita uweetigo Jesus etope-taido egaado teete mana, „Me ka mana ko ani ki meime?” etii.

²⁸Tijake okei wo eteete mana, „Me ino ka ko, baptis tei tita me Jahja kidi; daana me ino ka ko Elias; daana ino ka ko gokobaki tijawiidaiga wegai tita me idaana wegaigai,” etii.

²⁹Tijake Jesus eteete mana, „kodeja ikiija ka ko, ani ki meime?” etii. Tijake Peterus wo eteete mana, „Aki ki Keristus kidi ki,” etii.

³⁰Okai umina bida peu kidi me idaana ma te ete-tijake etimakai.

³¹Me Joka gaduwai umina beu kai peu mana okai etopaine go-motii. Me iboudo ma, imam iboudo ma, kapogeije epi bagee ma ka ekonijake wagimakai, tijake uno wido umijake anigou.

³²Kei mana muto kei ewaa tapa wegai. Tijake Peterus kidi Jesus ouwijake akaije ootai.

³³Kodeja Jesus wouga wakouga tijake etope-taido edoumigii. Okai Peterus emoge eteete mana, „Kowaa ke, Teege, ani wakouto bikimi. Aki Ugatameja dimi gai beu keege kouja, kodeja me ka mana ko,” etii.

³⁴Okai meido kodo manaa-tai, etope-taido ma enaimo, tijake eteete mana, „Me idaana naapeine gapi, okai akaato dimi te gajake okaija pija boko dokijake naapei.

³⁵Meija okai akaato muniine gapi, okai akaato igajawiitagi. Kodeja meija ani maida make ma, ajii mana maida make ma okai akaato igajawipi, okai akaato madagajawii.

³⁶Kawo kou enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igadoke tai kou ko?

³⁷Daana dimi mana komoka tijawiine ko magijo menija?

³⁸Kii mogai te-tai ma, peu ma bagee jupi meija ani ma, anija mana muto ma ego nagapi, me Joka maija ego egaitagi, Nakameja ajiipiidaiga meitagiida, jimubeu jaetigo-tai bagee ma enaimo.”