Read Galela LUKAS 12 Bible Online

LUKAS 12 - Galela bible

LUKAS 12

¹Me umina te gakimake[3] kotuu timakijake okei kede akadaime tai. Jesus etope-taidoopa tiga oowegaate mana, „Parisi bageeja ka ejajawe-tai maida make ko ikii akaato munii, kou ko matabe dimi kodo.

²Apumita agijo ena ma beu, ewaida te kaita mana kodo, daana boonita mana ena ma beu, epi te kija mana kodo.

³Okai kouja ikii bunita duba wegata mana kodo awe tapa juwidoke taita, daana ikii kugu duba make gapa duba kitigi wegata mana owaimouda make pitokidoke taita.

⁴Ani kitii, ei, noogeima, má jato wagimakijake wadoutouga tumaana ma te kei timakija bagee weda te egai.

⁵Kodeja ikii weda egaja me kitiipiga: Okai kidi weda egai, okai wagijake kadaga bodija duba eemigimakija me kidi. Maa kou ani kitii, okai kidi weda egai.

⁶Beu, mee? piipaa ida idibi mijo mege wija age kaa tija. Daana Ugatame pekaida idaana ma adaku te tija.

⁷Kodeja ikiija migouda ka ijo epa gakimakita. Weda te gai. Piipaa wedaba ma ko ikii ke ibo age kojoka.

⁸Daana ani kitii: Me jumaapa naawega-tai me gakita me Joka maija Ugatame jaetigo-tai jumaapa mana jawegaitagi.

⁹Kodeja meija me jumaapa beu puga natipi, Ugatame jaetigo-tai bagee jumaapa beu puga etaita.

¹⁰Daana meija me Joka akaije mana mutoona godapi, ipa ejaikija; kodeja meija Rohulkudus eduwapi, ipa te ejaikija.

¹¹Okei sembahjang owaapa ma, maki jakimake-tai jumaapa ma, boko petai jumaapa ma ganeuto kigopai ko, kawe dani wo etija juwa, daana má mana wegaja juwa gaagaa te tai.

¹²Rohulkudus kodaa okai kou gaa kodo ikii etija mana kodo kitopaitagi kouja.”

¹³Me wedaba jupi kodaa me idaana ka eteete mana, „Ei, Kuduu, ani keneka naitaija nijajaikita agijo oowudi naaetii,” etii.

¹⁴Kodeja Jesus eteete mana, „Kowaa ke, meija boko kijapetai ma, kijawudii ma najaikita?” etii.

¹⁵Tijake okeepa eteete mana, „Epeepite gai. Kibigi dimi utoma kodoopa make akaato munii. Me umi-tou tija kodo okaija edepedeido maida epijadaa ko beu kouja,” etii.

¹⁶Tijake ena dani awe-tai manaida eteete mana, „Tonawi me idaana ka makiida weta agijo wedaba podomijawii.

¹⁷Tijake okai kegepa duba dimi gajake kei teete mana, ’Ani magijo kei tai? Ani taida ka gojawitaido ko makiida ma peu kouja,’ wegai.

¹⁸Tijake wegaate mana, ’Ani kou kei taipiga. Anija makijaida kebajawijake euga ibo migiita, tijake anija uta ma edepedeido ma makiita.

¹⁹Tijake ani akaato kei taita mana, Kowaa ke, aki taun inoudo maida make enaa agijo ewaga makeege. Ojaa todou, nai ma, ideide tai ma to, etiita kodo ko’ gai.

²⁰Kodeja Ugatameja eteete mana, ’Kowaa ke, dimi beu me! Ito kii uno ki maija akija dimi mana beu ma ko beu kaamotii. Tijake aki epeepi timakeetege agijoudo meija motiitai?’ etii.

²¹Okai kou dani akaato maida edepedeido tigi atii bagee, kodeja Ugatame jumaapa tonawi beu,” etii.

²²Etope-taidoopa Jesus eteete mana, „Okai kouja ani kitii: Ikiija umi-tou tija maida make ko gaagaa te tai, kawo ka naija agijo ko nai juwa, má maida ka makii agijo juwa, manaido kodo.

²³Naija agijo ma ko umi-tou tija kodo ko ibo kouja, daana makii agijo ma ko má jato ko ibo.

²⁴Buna bedo dimi gaawe tai. Okei pi kigii tai na beu, uta duwai na beu, makijaida na beu, kodeja Ugatameja emunai. Bedoudo kodo ma ko ikii ke epaago umina.

²⁵Meime ikii jupi gaagaa to tijake euga ume-wo tija?

²⁶Kou danite kou mijo mana kodo kaga ki-toojogo ko, magijo ka joko ka manaido gaagaa?

²⁷Pi kodo epeepite gai, ejaiga kodo. Okei kei tai na beu, daana gaa gonai na beu. Kodeja ani kitii, Suleman kipi maija diiti pagaadagaida ko, kei pi kei ena ma ena dani beu.

²⁸Kodeja kou danite Ugatameja gei tapa ka ba wagi diiti awipi ko, ito naago kidi tojake aweetaa naago bodija jookogai agijo kodo, beu ma ko beu, ikii agijo kijamakii, kowaa kei, epaapate maakodo gai beu bagee.

²⁹Kojoka ikii naine agijo te ubai, daana gaagaa te tai.

³⁰Kei utoma makiida ka ojaa bageido utoma bopi kepai agijo kouja. Kodeja kou agijouda ikiija gai peu kodo Ikiitai epi kidi.

³¹Kodeja okaija jakimakita makiida bopi kepajawii, tijake kei utoma ikeepa kijaawii.

³²Weda te gai, kowaa kei, mijo domba imouto kidi, Ikiitai kidi ideide ma jakimakita makiida kinijawiine.

³³Ikii maida ka agijoudo kaa tijake ojaa to menii. Peu te kija potó ewaa awii. Daana beu te kija ka tonawi agijo epaawado. Oma bagee wadoujo te kijaida, daana jina ka maija te nojaida.

³⁴Ikiija tonawi agijo to-taida kodaa ikiija dimi tadu atii kouja.

³⁵Ikiija piti tagi atiwei, daana pito ko wíí tijawei.

³⁶Daana ikii kii dani tiwei, me idaana waka bukitaida make meineegi gaa jakei te-tai me edoutoote dani bukaa. Okai mejake damo tugu-tugu tipi okei egaa kodo damo jakeba-tita tijake.

³⁷Ideide no, kei te-tai bagee utoma okeija ibo meitagiida edoutojake edomakai bagee. Ani maa kou kitii, okai kidaa piti tagi atijake naine animakiwei etiitagi; daana eedadaine mei.

³⁸Wijaago doutou wagi juwa, widaago juwa, mejake kou dani edomakipi, kei te-tai bagee kede ideide no!

³⁹Kodeja gai, oma me meipagi gaa owaa ipuwe me epi naako, okai douto-toja, owaa te jakeba-tijake.

⁴⁰Ikii na epeepi timakai. Ikii ewouda gaa me Joka meitagi kojoka,” etii.

⁴¹Tijake Peterus eteete mana, „Ei, Tuhan, ena dani awe-tai mana kodo inii gaagoo eneege, mee? utoma bagee gaagoo,” etii.

⁴²Tijake Tuhan eteete mana, „Enanauto ma dimi jago ma owaa douto-tai me ki meime? owaa douto-tijake jajaikaitagi me, okeija naija agijo didee menija gaa oowude-tita.

⁴³Ideide no! kei te-tai me kidi kei jate-tai me meitagiida okai kou kei teetigo edomakipi ko.

⁴⁴Beu maa kou ani kitii, okaija aagijo taagijo douto-tijake jajaikaitagi.

⁴⁵Kodeja kou danite kei te-tai me kidi kegepa duba kii dani mana wegapi: ’Anija kei jate-tai me mei ipee,’ tijake kei te-tai jame jagamo wageete go-motii, daana nojake utaadijo uneune kipi,

⁴⁶edoutou beu naago, daana gai beu wagi kei te-tai me kidi ibo kidi medoke tijake umina wegedege etijawijake ena peu bagee ma enaimo jamo ejaikaitagi.

⁴⁷Okaija ibo ka dimi kodo epi kodeja epeepi te tijake kei tai beu me kidi kopa nakuu timakai.

⁴⁸Kodeja ewo me kidi wagija mana kei tipi, okai mijo gaa to wagii. Umina menijawita meepa make beu ma ko beu umina joko ediimai kouja. Daana agijo wedaba maida jaekegajawita me, beu ma ko beu, wedaba joko ediimija.

⁴⁹Ani meta ko makiida bodija pii atiine, daana umina ideide kodaa, bodija kodo ito kou wíí ti-toojogo ko.

⁵⁰Ani baptis tai mana muto topa ani baptis natija, daana ani umina duwaa-duwaa, wo tiki atitaida to.

⁵¹Ani meta ko makiida muka-muka mejawiine nagaaga, mee? Ani kitii: Beu, kodeja akaije.

⁵²Ito make wado owaanaapa me ida idibi akaije akaate taitai; me ida wido ka me ida wija akaije akaate tai, daana me ida wija ka me ida wido akaije akaate tai.

⁵³Nakame ka jame joka akije ootai, daana jame joka ka nakame akaije ootai. Ukame ka jagamo joka akaije ootai, daana jagamo joka ka ukame akaije ootai. Daana jagamo akabaakaija akaije akaate tai.”

⁵⁴Tijake kotuu timakita bageidoopa Jesus eteete mana, „Uwai jato duguu meetigo ikii dopa ko, ikiija ka wegai ko, ’Edi weipiga’. Tijake kou kei tidoke tai.

⁵⁵Daana bou puu ti-toojogo ikiija wegai ko, ’Tani umina kaipiga’. Tijake kou kei tidoke tai.

⁵⁶Kowaa kei, matabe bagee! Ikii maki ma epa ma dou epi. Kawe dani tijake ito kii wagi ka kei teete mana kodo boko petai ewo?

⁵⁷Magijo ka ikii kede enaa agijo boko te duwajawii.

⁵⁸Akaije kateegi me ma enaimo boko peta-tai jumaapa auweetigo gaa, ita maida make okaapa make pipikadoke taine gaado tai, boko peta-tai jumaapa kaumigou na kojoka, daana boko peta-tai kidaa douto-tai meepa kaekegajawii, daana douto-tai kidaa wanee owaa duba kaemigai.

⁵⁹Ani katii, aki kouda kodaa make te podomaitage, ebé jamenijawiitageida to.”