Read Galela LUKAS 13 Bible Online

LUKAS 13 - Galela bible

LUKAS 13

¹Okai kou gaa kodo me wija wido mejake Galilea bagee mana muto Jesus eti-menii. Okeija jo-meneete agijo ma okei kedaa emo ma Pilatusja takabaka timakai.

²Tijake Jesus wo eteete mana, „Ikiija ka gai ko, joko ka Galilea bagee ma ko okei umina peu bagee egaaga, mee? okei kou dani didi gaduwata kouja.

³Ani kitii: Kou dani ko beu. Kodeja ikii te tedemipa ko, ikii utoma kou danite peu kaita.

⁴Juwa, me ida waguwo ma gaati Siloam ka wado mige amo mige tita owaa kodo okei maida bogomijake etagimita, ikiija gai ko okei joko ka Jerusalim makiida tota bagee ma ko umina peu egaaga, mee?

⁵Ani kitii: Kou dani ko beu. Kodeja ikii te tedemipa ko, ikii utoma koou danite peu kaita,” etii.

⁶Okai kii ena dani awe-tai mana oowegai: „Me idaana ara uta uti kodo buda uta taida weta. Pija maida uta ubaate uwigojake uta dou beu.

⁷Tijake buda uta mune-tai meepa eteete mana, ’Dododou, taun wido kii pija maida uta ubaine megoo, kodeja dou beu. Maijo taine maki peu kai? Kobimigii.’

⁸Etijake wo eteete mana, ’Ei, Ibo, ito kii taun kidi maija naajaikai, ani kou watija maki jugee tijake makoo makiine kojoka.

⁹Tijake wadoutouga uta gopa ko enaa. Beu kipa kobikumi te,’ etii.”

¹⁰Sabbat naago Jesus sembahjang owaanaapa etopeetigo gaa

¹¹jagamo idaana enija edojake dibuwe teete taun waguwo ma gaati umita toojogo. Okai matoka kodumidoke tijake doodoo kai kaga.

¹²Jesus edojake jagamo kodo manaa-tijake eteete mana, „Kowaa kau, akija dibuwe maida make aki pipikadoke,” etii.

¹³Okai maida gane jamakijake okai kou gaa kodo okai matoka doodoo kijake Ugatame muta etuwai.

¹⁴Kodeja sembahjang owaa douto-tai me kidi boko gai, Jesus Sabbat naago beu jaawita kouja, tijake meidoopa wo eteete mana, „Naago benumi kei tai pijo naago topai. Okai kou naago kodo mejake didi beu kijaawii, Sabbat naago ko beu,” etii.

¹⁵Kodeja Tuhan wo eteete mana, „Kowaa kei, ikii matabe bagee! Beu mee? ikii me gakita Sabbat naago sapi juwa, keledai juwa, mune-taida make eukajawijake uwoopa ouwii.

¹⁶Kodeja kou jagamo kodo, Ibrahimja ekebata me, Teege ka taun waguwo ma gaati egadimimakita kodo, beu mee? okai Sabbat naago buda jaekegajawija?” etii.

¹⁷Kou mana wegaatigo akaije ootai bagee ego gai, kodeja meido utoma okaija umina enaa kei tijawita agijo utoma ideide tai.

¹⁸Kou wadoutouga Jesus eteete mana, „Ugatameja jakimakita makiida magijo dani bukaa? Daana ani magijo ma ena dani awii?

¹⁹Kou ko sesawi miteena dani bukaa, me idaana motijake taida wejawii. Ejajake pija uti kijake epa bede maki bede ka bedoudo kago maida geka migii,” etii.

²⁰Kigeena ma eteete mana, „Ugatameja jakimakita makiida ani magijo ma ena dani tijawii?

²¹Kou ko goti ejajawe-tai agijo dani bukaa. Jagamo idaana motijake tepong ebijadou wido duba awijake utoma ejajawii,” etii.

²²Kou danite Jesus maki okogo ibo ma mijo ma uwina tai. Okai meido etopeetigo, Jerusalim doodouga uwii.

²³Me idaana eteete mana, „Ei, Tuhan, me wija dani to ajii tai bagee, mee?” Etijake wo eteete mana,

²⁴„Tipi damo wadoujo kaine epeepi tiwei. Ani kitii kouja, me wedaba wadoujo kaine kibigi gaitai, kodeja wadoujo te kimake.

²⁵Owaa ipuwe me joonidoke tijake damo jekamijawii, tijake ikii juwouda joonidaa tijake damoutoopa tugu-tugu tigoo, kei teete mana, ’Ei, kowaa ke wou, inii damo nijakebai.’ Etijake okaija wo kitiitagi mana, ’Ikii kaija make meega ani ki ewo no.’

²⁶Tijake ikii kou dani eteete go-motiita, eteete mana, ’Aki pekaida inii nootege, daana iniija makijo ka ita maida aki nitopina teetege.’

²⁷Tijake okaija kitiitagi mana, ’Ikii kaijaiga meega juwa ani ki ewo. Aneepa make uwijake tei, ikii peu kei te-tai bagee utoma.’

²⁸Okai kouda kodaa jege ma egaagede ma to touda; Ibrahim ma, Isak ma, Jakub ma, tikauwa ka gokobaki tijawiidaiga wegai tita bagee utoma Ugatameja jakimakita makiida ikii edojake, daana ikii kede juwouda keemigimakita kodo.

²⁹Okei awii jato uwai jato, waikaato wakaato make mejake Ugatameja jakimakita makiida buka naine animakaitai.

³⁰Juwei! Nemouga ka bagee me ino okei tiga kaitai, daana okei tiga bagee me ino nemouga kaitai.”

³¹Okai kou gaa kodo Parisi bagee wija wido mejake eteete mana, „Kiija make uwii, herodes kagiine kojoka,” etii.

³²Tijake Jesus wo eteete mana, „Ego jago jina kidi naaeteuwii, Juwidou, ani enijaido eemigimakai ma, didi bagee beu jaawii ma, ito naago ma aweetaa ma. Tijake widaago naago anija kei teete kodo boko duwajawii.

³³Ani ita uwii to-tigoo, ito naago ma, aweetaa ma, wijaume ma. Jerusalim wakouto make ko gokobaki tijawiidaiga wega-tai me idaana me te wagija kouja.

³⁴Ei, Jerusalim, Jerusalim, gokobaki tijawiidaiga wega-tai bagee wage-tai kodo, daana okaapa ebadikumita bagee mogo ka wagigoo te-tai! Kigi magoo aki jokaane aneepa ebukaine kodaa, ajam uka nakaido aa mijo eboomimakai danite, kodeja ikii be gai.

³⁵Beu maa kou, ikiija owaa ko kijajaikidokijake diitu daatu tidoke. Ani kitii, ikii wadaato te nadouta, tijake ikiija ka ’Tuhan eka dubaiga meete me kidi muta etuwai’ eniitaida to.”