Read Galela LUKAS 15 Bible Online

LUKAS 15 - Galela bible

LUKAS 15

¹Mege kotuu te-tai bagee ma, peu bagee ma Jesuspa mei, mana ejuwaine tijake.

²Parisi bagee ma, kapogeije epi bagee ma kitigi motigi eteete mana, „Kii me kidi peu bagee ebukijake okei wa enaimo noteigi,” wegai.

³Tijake Jesus ena dani awe-tai mana oowegai, eteete mana,

⁴„Meime ikii jupi domba mutoona[4] munijake idaana igadoke ti-toojogo ijee gaatibeu me beuda te jaikija, igata kidi euba-uwiine tijake edomakaida to?

⁵Daana edomakipi ko kodeida ideide ma edokijawii.

⁶Okai owaapa dakii tijake ogaane ma okaija makijo ka bagee ma manaa-tijake eteete mana, ’Ani ma ideide neetiwei. Anija igata domba edomakeega kouja,’ etii.

⁷Ani kitii: Kou danite maija te tedemija enaa bagee ijéé gaatibeu kede maida ma ko, peu me idaana tedemijake epaawado ideide wo etige.

⁸Juwa, kawo ka jagamo kodo mege gaati makijake ena igatoojogo lampu te ewakija, tijake owaa jimu deete epeepite ubai, domakaida to?

⁹Domakijake ogaane ma okaija makijo ka bagee ma manaa-tijake eteete mana, ’Ani ma ideide neetiwei. Anija igata mege domakeega kojoka,’ etii.

¹⁰Ani kitii: Kou dani maija Ugatame jaetigo-tai bagee jumaapa ideide umina, tedemita me idaana maida make.”

¹¹Tijake Jesus eteete mana, „Me idaana jame joka wija makijawii.

¹²Tijake amoje me kidaa nakameepa eteete mana, ’Ei, naitai, ani jato ka daniido naimi,’ etii. Tijake okaija aagijo taagijo kodo okejaapa jawudijawii.

¹³Iboopo umii beu gaa amojeme utoma agijo kotuu timakijake poto makijo uwii. Kouda kodaa peu kei teete aagijo taagijo utoopa mapugajawii.

¹⁴Utoma mapugamakijake kou makiida naidi uwa potu tidoke, tijake okai agijo beu kai.

¹⁵Tijake kou makiida ka me idaanaapa tawadoke tijake me kidaa gei tapa ekina naooto-tijake ebadikumii.

¹⁶Ekina ka noote kopu kodo okai naine kibigi gai, kodeja me idaana ka ma menii beu.

¹⁷Tijake okai wado gadoke tijake kei teete mana, Naitai jakei te-tai bagee me ida magoo naija agijo tiki tiki, kodeja ani ki jakai naidi bokaate! gai.

¹⁸Ani joonidoke tijake naitaipa uwiita, tijake kii dani etiita, Ei, naitai, ani peu me akeepa ma epaawadoopa ma.

¹⁹Ito kou ani joka naabatai ko nadou peu. Akija kakei te-tai me najaikai, etiita, gai.

²⁰Tijake okai anigodoke tijake nakameepa uwii. Kodeja okai poto make meetigo gaa nakame edojake ipa egai. Okai tibigi tijake ejupugimakijake unu ejumigoo.

²¹Tijake jokame eteete mana, ’Ei, naitai, ani peu me akeepa ma epaawadoopa ma. Ani joka naabatai nadou peu,’ etii.

²²Kodeja nakame kidaa jakei te-tai bageepa eteete mana, ’Egaa diiti kagaba jadoke-mewei. Jamakijawijake kagane ganeida jamakijawii, dedaana bado awii maija.

²³Daana epoo enaa sapi joka oomewei. Ogo duwajake inii ideide ma buka neenowei.

²⁴Ani joka bokajake ija keegi kouja. Daana igajake joko meegi,’ etii. Tijake okei ideide teete go-motii.

²⁵Iboutome taida toojogo. Okai meetigo owaa kapauto kijake nii nogee juwii.

²⁶Kei te-tai me idaana manaa-tijake magijo ewaa keega egaado tai.

²⁷Tijake wo eteete mana, ’Aki weneka wado meegi, daana akaitai epoo enaa sapi joka ogo duwaagi, kojáá na ka wado meegi kouja,’ etii.

²⁸Kodeja okai emoge gajake woujo te kai. Tijake nakame podomijake woujo ookaine jeu jeu etai.

²⁹Kodeja nakameepa wo eteete mana, ’Juwidou, ani taun inoudo kakei tigoo to tijake akaa mana kaekagumai beu. Kodeja aki kigeena ma kamigi joka naimai beu, noogeima buka oonotijake ko.

³⁰Kodeja aki joka wado mejake, akija edepedeido mogai jago jagamo ma mapugajawijake, epoo enaa sapi joka ogo jaduwaage!’ etii.

³¹Tijake wo eteete mana, ’Ei, ani joka, aki ani ma enaimo to tou, daana anija agijo utoma aki ipuwe to.

³²Inii ideide ma buka nai enaa, aki weneka bokajake ija keegi kouja. Okai igadoke tijake joko meegi,’ etii.”