Read Galela LUKAS 17 Bible Online

LUKAS 17 - Galela bible

LUKAS 17

¹Tijake etope-taidoopa eteete mana, „Beu ma ko beu, peu agijo mejawii manaido meitai, kodeja mejawe-tai bagee peu kugouto dokidoke tai.

²Kou danite kei daba bagee kede idaana monoo etai kodo ma ko, ibo mogo ogo maida gadimijake maikai duba eemigimakai enaa.

³Epeepite gai! Aki keneka peu kei tipi etii to. Okai tedemipi ipa ejaikai.

⁴Naagoona kigi pituwo peepu katijake akeepa kigi pituwo wouga kijake, ’Ani tedemeega’ katipi, ipa ejaikai,” etii.

⁵Tijake eti-awitaido kedaa Tuhanpa eteete mana, „Iniija maakodo gai dimi kodo abuma nijaawii,” etii.

⁶Tijake Jesus eteete mana, „Ikiija maakodo gai dimi kodo sesawi miteena dani naako, ikii uu peu kidi ara uta uti kidiipa, ’Badidoke tijake maikaida wedoke ti’ eti-toja, tijake kijuwidoke tai.

⁷Meime ikii jupi kakei te-tai me maki utijake juwa, domba ooto-tijake juwa, kei teeteida make owaapa joko mejake etii ko, ’Egaa mei, no-te no.’

⁸Mee? okaapa eteete mana, ’Naija agijo epeepi natijawijake piti tagi atijake naadadai. Ani nojawijake aki nemouga nai.’

⁹Etita danite kei tai kouja kei te-tai me kidiipa nagajaweege etii, mee?

¹⁰Okai kou dani ikii maija kitita danite kei timakijake wegai ko: Inii ke epa beu kei te-tai bagee. Inii kei tija agijo to kei tai kodo.”

¹¹Jerusalim uweetigo Samaria ma Galilea ma wokaato kai.

¹²Maki katouda wadoujo keetigo tomo jago dani me ida gaati poto make joonidaa ti-toojogo edou.

¹³Tijake wuu eteete mana, „Ei, Jesus, ei, Kuduu, ipa nigai,” etii.

¹⁴Jesus edojake eteete mana, „Ikii uwijake akaato imam kidiipa emuwakai,” etii. Okei uweetigo gaa tomo kodo oodaa.

¹⁵Tijake okei jupi ka me idaana oodoke keega gajake wo uwijake emeemeida Ugatame muta etuwai.

¹⁶Jesus jumaapa maki maida mijouga kijake nagajaweege etii. Me kidi Samaria ka me.

¹⁷Tijake Jesus eteete mana, „Beu mee? me ida gaati oodaa keegai. Ijéé kei kaija?

¹⁸Me idaana ma Ugatame muta etuwaate joko te mei, mee? ojaa me ki ma ko,” etii.

¹⁹Tijake me kidiipa eteete mana, „Joonidoke tijake owaapa uwii! Akija maakodo gai kodaa kaojawii,” etii.

²⁰Ugatameja jakimakita makiida meita mana Parisi bagee egaado tijake Jesus wo eteete mana, „Ugatameja jakimakita makiida meita ko peka ka dou ko beu.

²¹Daana me ka te wegai, ’Gadowei, kiija topi’, juwa, ’Kouja topi’ juwa. Ugatameja jakimakita makiida ikii duba kouja.”

²²Tijake etope-taidoopa eteete mana, „Emino ikii me Joka ka naago kato doune tijake didi gaita, kodeja te domake.

²³Tijake me ka kitiitai, ’Dowei, kou no!’ juwa, ’Dowei, kii no!’ Ikii te uwijake te eepei.

²⁴Epa momogiida make epa momogiida to tekebego wakibego tija dani bukaa, okai kou dani maija me Joka ka putu naagouda.

²⁵Kodeja kou mana beu gaa kodaa, mana wedaba didi gaduwajake kii me kakade ka ekonai.

²⁶Nu tota wagiida kei tita danite me Joka kidaa wagi maija kou dani kaita.

²⁷Okei nogoo ma, waka bukii ma, waka eumai ma, Nu owaa jago komaida matakitaida to. Tijake uwo pegemijake okei utoma edamijawita.

²⁸Lut tota wagi maija kou dani. Okei nogoo ma, edai ma, kaa tai ma, ijoo wei ma, owaa migijawii ma.

²⁹Kodeja Lut Sodom makiida podomita naago kodo epa maida make bodija ma, bodija poke mogo ma edi weja danite okei utoma edamijawita.

³⁰Okai kou dani maija me Joka ewaida kaitagiida kodo.

³¹Okai kou naago kodo owaimouda toutagi me kidi edepede owaa duba tojake motiine mijouwe te kai. Daana taida toutagi me wo te uwii.

³²Lut waka kodo gai.

³³Meija okai akaato muniine gapi, okai akaato igajawiitagi. Kodeja meija okai akaato igajawipi, okai akaato madagajawiitagi.

³⁴Ani kitii, okai kou uno kodo jame ida wija enaida aumijake idaana wado ebuki-motijake idaana ejaikidokii.

³⁵Jagamo ida wija enaida uta jugee aateetigo idaana wado ebuki-motijake idaana ejaikidokii.

³⁶Daana jame ida wija taida aatojake me idaana ki ebuki-motijake idaana ejaikidokii.”

³⁷Tijake okei eteete mana, „Kaija, Tuhan?” Etijake Jesus wo eteete mana, „Katouda má jato topa ko, okai kouda kodaa bedowagija maija kotuu tigoo,” etii.