Read Galela LUKAS 19 Bible Online

LUKAS 19 - Galela bible

LUKAS 19

²Kouda me idaana eka ki Zacheus, mege kotuu te-tai ka ibo kidi toojogo. Okai tonawi.

³Jesus kawe dani kipi gaa edoune kodeja me tipi ka te edomake, okai me pini kouja.

⁴Tijake okai tiga tibigi uwijake Jesus edoune tijake ara uta pija patikai. Okai kouda kuduuga jawiipagi kouja.

⁵Jesus kouda kodaa dakii tijake wado dojake eteete mana, „Ei, Zacheus, egaa mijouwe kai. Ito kii naago ki, beu ma ko beu, akija owaapa kaumiine ka,” etii.

⁶Tijake okai tibigi mijouwe kijake ideide ma ejakimakai.

⁷Me utoma kou mana kodo dojake kitigi motigi eteete mana, „Okai peu meepa oumiine uweegi!” wegai.

⁸Zacheus joonidoke tijake Tuhan kidiipa eteete mana, „Juwidou, Tuhan, ani edepedeija jupiidaiga wudijawijake daba bageepa meniipiga, daana me idaana jabokomijake jamotipa ko, kigi wii amo menii,” etii.

⁹Tijake Jesus eteete mana, „Ito naago ajii bokouto kii uguwoopa dakii teega, okai na Ibrahimja ekebata me kiija.

¹⁰Me Joka meta ko igata bagee eubajake ajii ti-meniine,” etii.

¹¹Meido kou mana juwijake Jesus ena dani awe-tai mana oowegai, okei Jerusalim kapauto kouja, daana okeija gai ko, Ugatameja jakimakita makiida egaa kodo ewaida kaita gajake.

¹²Okai kouja Jesus eteete mana, „Ekaago tuma me idaana jakimakita makiida go-motijake joko meine tijake poto makijo uwii.

¹³Okai jakei te-tai bagee me ida gaati manaa-tijake mege gaati menii, eteete mana, ’Ani meitaida to ikii munaa to wegagoo,’ etii.

¹⁴Kodeja okaija makijo ka bagee be egajake, me eepe-tita ebadikumii, wegaate mana, ’Inii kii me kidi nijakimake-tai kai ko be,’ etii.

¹⁵Okai joko mejake jakimake-tai boko jaduwajawijake mege menita bagee mewei etii, okeija munaa wegaateida kodo magoo motipai epi kaine tijake.

¹⁶Edoga ka kidi okai jumaapa mejake eteete mana, ’Kowaa ke, akija mege ena kidi wado gaati keegai,’ etii.

¹⁷Tijake ibo kidaa eteete mana, ’Enaa kodo ko, enaa nakei te-tai me! Mijo manaida aki enanaa kouja, aki maki gaati doutou kajaikeega.’

¹⁸Wijaago kidi mejake eteete mana, ’Kowaa ke, akija mege ena kidi wado idibi keegai!’

¹⁹Etijake ibo kidaa eteete mana, ’Kojoka aki maija maki idibi doutou kajaikeega,’ etii.

²⁰Tijake me idaana mejake eteete mana, ’Kowaa ke, kii ke akija mege kidi, ani kagaba ka tonijake kaamakeemega.

²¹Ani weda kagai kouja, aki kegepa bida me kouja; aki makii beu agijo moteige kouja, daana kigii tai beu agijo duwaige,’ etii.

²²Tijake ibo kidaa eteete mana, ’Kowaa ke, peu nakei te-tai me! Aki godaage mana kouja peu kaawii. Ani kegepa bida me mana kodo aki epi; ani makii beu agijo moteiga, daana kigii tai beu agijo duwaiga.

²³Keetigo magijo ka anija mege ko munaa wega-tai bageepa naamakii beu? ani joko mejake mege kou wado ma abuma joko motii te,’ etii.

²⁴Tijake kou watija joonidaa tita bageepa eteete mana, ’Mege okaapa make jamotijake mege gaati jago me kidiipa naamenii,’ etii.

²⁵Tijake me ka eteete mana, ’Ei, ibo, okaapa mege gaati topai,’ etii.

²⁶’Ani kitii, agijo jago bageepa abuma menii; kodeja agijo tagu bageepa make makita agijo jamotii.

²⁷Kodeja ani ma jape bagee kede, ani ejakimakai ko be nagata bagee, jakai oomejake ani jumaapa naawagii,’ etii.”

²⁸Okai kou mana wegajawijake okai tiga ita uwii, Jerusalim doodoo wado uweete.

²⁹Okei Baitfagi ma Baitani ma kapa kijake Zaitun ebatita dimiidaapa make etope-tai wija ebadikumii,

³⁰eteete mana, „Ikai doodouga maki okogoopa auwai. Wadoujo aakijake ko keledai joka egadimi-toupagi aadoupiga, me idaana ma edokai beu kidi; aekegajawijake aanaaoomei.

³¹Daana me ka ’Magijo ka buda aekegaate?’ kitipai, ikaija aetai ko, ’Tuhan gai peu kodaa’ aetai,” etii.

³²Tijake ebadikumitaija auwijake Jesus etita kidi danite aadomakai.

³³Okejai keledai joka buda aekegaatigo gaa ipuwe bagee ka eteete mana, „Magijo ka keledai joka aekegajaweete?”

³⁴Etijake okejai aeteete mana, „Tuhan gai peu kodaa,” aetai.

³⁵Okejai Jesuspa aaoomejake okei kedaa kagaba keledai joka maida mukajake Jesus kou wado eenimakai.

³⁶Okai uweetigo meido kede kagaba ita maida mukajake tai.

³⁷Okai kapa kijake, Zaitun Dimiida mijouwe kijaida etope-tai wedaba kede ideide go-motijake mana wuu kuutakaa Ugatame muta etuwai, ego takuu-takuu manaido dota kodo maida make.

³⁸Okei gaida-gaida teete mana: „Tuhan eka dubaiga jakimaketai ibo meete kidi muta neetuwawei! Epaawado muka-muka, daana monika to-taida ajiipi bokouto!” wegai.

³⁹Me wedaba kede jupi Parisi bagee wija wido Jesuspa eteete mana, „Ei, Kuduu, akija etope-tai kede gabo tou etii,” etii.

⁴⁰Tijake Jesus wo eteete mana, „Ani kitii, okei gabo kipai, mogo kou ideide taipiga,” etii.

⁴¹Okai kapa kijake maki kodo dojake jege etai,

⁴²eteete mana, „Ito naago kipi maija muka-muka bokouto mejawii manaido aki epi naako. Kodeja ito kou aki pekaidaapa make apumidoke!

⁴³Putu naago kodo aki ma jape bagee utoma kabo duwajawijake kabobimakaitai. Daana kii jato kou jato bagee ka takitaki katijawii.

⁴⁴Tijake makiida nakuu katimigijake aki ma akeepa ka jokaane ma maki to jaikai, daana aki duba mogo wado make titaida maija ena ma te jaikai. Aki kadou meta wagi kodo aki gamakai beu kouja,” etii.

⁴⁵Ugatameja owaa duba wadoujo kijake kaa te-tai bagee eebakeete go-motii.

⁴⁶Eteete mana, „Kapogeije ebijamakita: Anija owaa ko sembahjang te-tai owaa. Kodeja ikii ke oma bagee ka bijo jaikipa,” etii.

⁴⁷Okai agapi gakita Ugatameja owaa duba meido etopigoo. Imam iboudo ma, kapogeije epi bagee ma, me jupi ka iboudo ma wagiine dimi ubai.

⁴⁸Kodeja okeija gata kodo danite domakai beu. Me utoma okaija mana maida tawanii kouja.