Read Galela LUKAS 2 Bible Online

LUKAS 2 - Galela bible

LUKAS 2

¹Okai kou gaa kodo Kaisar Augustus bida mana podomijawii, jakimakita makiida maki utoma egakaine tijake.

²Kii ke edoga ka me egakita mana kodo, Kirenius kidi Sjam dokoo Gubernur toojogo gaa.

³Utoma bagee akija makijo makijo uwijake tai egakaine tijake.

⁴Kou danite Jusuf maija Galilea dokoo Nazaret makiida make podomijake, daud ka makijo Baitlahim uwii, Judea dokoo kodo. Okai Daud epaidaiga ekebata kouja.

⁵Marjam wii ete-tai kodo ma enaimo eka aabijaine tijake. Marjam modaago kodo.

⁶Okejai kouda aatoojogo gaa Marjam pai agouda kai.

⁷Tijake jame joka idaana pai, ibouto kidi. Joka etonija kagaba ka etonijake munija agijo no-taida epiitimakai, duwa jawe owaa ko tipi kouja.

⁸Okai kou dokoo kodo domba ooto-tai bagee gei tapa to-jake wanee jato okeija ka domba imo ootoojogo.

⁹Tijake okai kou gaa kodo Tuhan jaetigo-tai me okeepa joonidoke tijake, Tuhanja ajiipi kodo eganimakai. Tijake okei weda umina.

¹⁰Tijake jaetigo-tai me eteete mana, „Weda te gai, juwidowei, ideide mana peijo kitiine meega, utoma bagee ipuwe.

¹¹Ito kii naago kidi ajii bokouto kijaduwa-tai me paagi kouja, Daud makiida; kii ke Keristus, e boko te boko duwa-tai me kidi.

¹²Kii ke ikii tegee doupiga agijo: Ajejoka etonija kagaba ka etonijake munija agijo no-taida epiitimaki-toupiga ikii edoupiga,” etii.

¹³Okai kou gaa kodo jaetigo-tai me kidi ma enaimo epaawado ka imouto ewaa kidaa tai, Ugatame muta etuwaate mana,

¹⁴„Utoma ajiipi Ugatame ipuwe Kii waiko Monika makijo; Daana muka-muka makiida kiija Juma dege-dege etai bageepa.”

¹⁵Jaetigo-tai bagee ejaikijake waiko epaawado uwijake, domba ooto-tai bagee kede wegaate mana, „Mewei, inii Baitlahim uwijake kei tidoke tipa mana dou no, Tuhanja eneegi kodo,” wegai.

¹⁶Tijake okei tibigi uwijake Marjam ma Jusuf ma edomakai, daana ajejoka kidi munija agijo no-taida epiitimaki-toojogo.

¹⁷Okei edojake joka kidi maida make etipai mana kodo ugo uwikumii.

¹⁸Juwita bagee utoma domba ooto-tai bagee ka mana kodo ego takuu-takuu umina.

¹⁹Kodeja Marjam kei manaido utoma dimi dubaiga to gaawe tai.

²⁰Domba ooto-tai bagee amo uwii. Ugatame muta etuwai ma ibo ejaikai ma to tigoo, juwii ma dou ma tipai mana maida make, etita kidi danite.

²¹Uno waguwo umijake okeitodo duwai gaa, eka Jesus eebatijawii, jaetigo-tai me ka etita kidi danite, modo ma beu to.

²²Musaja dijo douja mana dijo dojake Joka kidi Jerusalim makiida ouwii, Tuhan maida wado eekegajawiine tijake.

²³Tuhanja dijo douja mana ebijamakita kouja: Ibouto ibouto daniija edoga pajake kidi Tuhanpa eekegajawii.

²⁴Tijake jo-menii agijo jo-meniine, Tuhanja dijo douja manaida ebijamakita kouja: Wonou tumaana bugaija juwa, wonou tokooboga ida wija juwa.

²⁵Jerusalim makiida me idaana eka Simeon toojogo. Kii ke enaa me kidi, daana Ugatame umina dijo dou to. Israil bagee ideide eewii mana okai douto-tai, daana Rohulkudus okai maida tou.

²⁶Rohulkudus ka ewaida etijake Tuhanja Keristus edou beu gaa okai te bokaitagi etita mana.

²⁷Roh ka gokobaki tijawijake Ugatameja owaa woujo kai. Joka Jesus kidi nakame ukame ka oomejake, dijo do-tijake ebijamakita mana jakei taine tijake.

²⁸Simeon Joka kidi ejupugijake Ugatame muta etuwai, eteete mana,

²⁹„Ei, Tuhan, ito kou kakei te-tai me kidi Kojáá peu wado uwiine tijake-najaikai, Aki mana eneetege danite.

³⁰Akaa ajii bokouto mana ani peka edomakeega kouja.

³¹Utoma bagee jumaapa kei tijaweetege kodo,

³²Ojaa bagee aweida jaganimakaine tijake, Daana akija uguupuguu Israil ka ajiipi kodo.”

³³Okai maida make wegata mana kodo nakame ukame ego takuu-takuu.

³⁴Simeon kidi muta etuwai, ukame Marjampa eteete mana, „Juwidou, kii Joka kiija Israil bagee wedaba egootijawii ma, eenigojawii ma; Daana okaija tegee dojake akaije to tigoo.

³⁵Kataana akija kegepa nokogi-motiita maija, — Tijake me wedaba ka kegepa duba ka gabo dimi ewaida awe-tita.”

³⁶Gokobaki tijawiidaiga wega-tai jagamo idaana maija toojogo, eka Hanna, Panuil joka, Asjir ka me. Okai adama umina. Api tota make wado waka uwijake jameme ma enaimo taun pituwo aumai.

³⁷Tijake mijáá kijake taun mutoona wado wii ma mepiina umii. Okai Ugatameja owaa jaikai beu, kodeja migaakobe teete te nai dijo dou ma, sembahjang ma to tigoo wanee agapi.

³⁸Okai kou gaa kodo maija okai mejake Ugatame muta etuwai, daana Jerusalim pipikajawii mana doutoote bagee utoma kii Joka kidi maida make mana oowegagoo.

³⁹Tuhanja dijo douja manaida ka mana utoma dijo dojawijake, okei Galilea jamo uwii, okeija ka makiida Nazaret kodaa.

⁴⁰Joka kidi ejajake bida kai. Okai dimi bokouto jago, daana Ugatameja jikoo bokouto okai maida tou.

⁴¹Ukame nakame taun gakita Jerusalim auwigou te-tai, wadouga etigajake petii tita ga-tou naagouda kodo.

⁴²Okai taun wija ma gaati umijake, kei teigai danite dijo doune tijake wado uwii.

⁴³Ibo naago dijo domakijake okejai jamo auweetigo gaa, Jokame Jesus kidi Jerusalim tou; nakame ukame ewoudaiga.

⁴⁴Kodeja me jupi megigaa gajake agapeena uwii, tijake okei ma bagee jupi ma, edota bagee jupi ma eubai.

⁴⁵Aadomakai beu tijake Jerusalim aubaine wado auwai.

⁴⁶Uno wido umijake Ugatameja owaa duba aadomakai, me etope-tai bagee jupi animakijake ejuwai ma egaado tai ma teetigo.

⁴⁷Ejuwita bagee utoma okaija dimi epi mana ma, amo etii mana ma ego takuu-takuu tai.

⁴⁸Nakame ukame aadojake ego takuu-takuu umina tijake ukame eteete mana, „Ei, ani Joka, magijo ka kou dani niteege? Dodou, akaitai ma ani ma gaagaa umina kaubaage,” etii.

⁴⁹Tijake amo eteete mana, „Magijo ka aanaubaaga? Ikai ewo, mee? ani Naitaija owaa duba tou beu kai peu,” etii.

⁵⁰Kodeja okejai aagamakai beu, okaija etita mana kodo.

⁵¹Okejai ma enaimo uwijake Nazaret dakii tai, daana okejaija ka mana ejuwidoke tai. Ukame kodo kei manaido utoma dimi dubaiga to gaawe tai.

⁵²Jesus kidi dimi bokouto kodo ma, má ma ejajake Ugatame ma, me ma ka juma dege-dege etai.