Read Galela LUKAS 22 Bible Online

LUKAS 22 - Galela bible

LUKAS 22

¹Goti ejajawii beu naago kodo, kou ko, wadouga etigajake petii tita ga-tou naago ebatita kodo kapa keega.

²Imam iboudo ma, kapogeije epi bagee ma Jesus kawe danite wagimakija dimi ubai. Okei meido kede weda egai kouja.

³Tijake Teege kidi Judas duba amoujo kai, eka ki Iskariot eebatita kidi, wija ma gaati kede ka idaana kidi.

⁴Okai uwijake imam iboudo ma, serdado iboudo ma enaimo mana oowegai, Jesus okeepa eekegajawiine mana kodo.

⁵Okei eepajake mege kaniitage kojoka etii.

⁶Judas enaa etijake eekegajawiine tijake enaa wagi ubai, me beuda gaa.

⁷Tijake goti ejajawii beu naago kidoke, wadouga etigajake petii tita ga-tou naago, domba joka wagija naago kodo.

⁸Tijake Jesus kidaa Peterus ma, Jahja ma ebadikumijake, eteete mana, „Ikai auwijake ibo naago naine kodo epeepi neetimakai,” etii.

⁹Tijake okejai aeteete mana, „Kaija ide naineida epeepi katijawii ko?” aetai.

¹⁰Tijake wo eteete mana, „Aajuwidowei, ikai makiida wadoujo aakijake uwo nogo-taipagi me ma akado aataipiga. Wadoujo kaipagi owaa duba aepei.

¹¹Tijake owaa ipuwe me kidiipa kii dani aetai, ’Kuduuja kateegi, Kawo kugu kouja anija etope-tai ma enaimo ibo naago kodo inii naipage? kateegi,’ aanaetai.

¹²Tijake wadouto ka ibo tigi atita kugu kimuwakaipagi. Okai kouda kodaa epeepi neetimakai,” etii.

¹³Tijake okejai auwijake okaija etita danite aadomakai; tijake wadouga etigajake petii tita ga-tou naago epeepi aatimakai.

¹⁴Kou wagi kodaa kijake Jesus animakai, daana eti-awitaido okai ma enaimo.

¹⁵Tijake eteete mana, „Ani umina ide gajake kii wadouga etigajake petii tita ga-tou naago kodo ikii ma enaimo nai, ani didi gaduwai beu gaa.

¹⁶Ani kitii kouja, ani kigeena ma te naita, Ugatameja jakimakita makiida kodaa boko duwadoke taitaida to,” etii.

¹⁷Okai uwaawe motijake nigajaweege eti-menijake, eteete mana, „Kii ke motijake wudiwei.

¹⁸Ani kitii kouja, ito kiija make wado ani utaadijo te naita, Ugatameja jakimakita makiida meitaida to,” etii.

¹⁹Tijake Jesus goti kodo motijake nigajaweege eti-menii. Okai utijake meneete mana, „Kii ke anija má kodo, ikii maida make kijaekegajawita. Kou dani naga-toote kei tigoo to tai,” etii.

²⁰Okai kou dani maija nojawijake uwaawe kodo motijake eteete mana, „Kii uwaawe kii ke ija kijatogijawita mana kodo anija emo duba, ikii maida make kijatuumijawita.

²¹Kodeja dodowei! Naekegajawiipagi me ka gane inii wa enaimo nooteida topi kiija.

²²Me Joka maida boko jaduwajawita danite uwii. Kodeja eekegajawiipagi me kidi peu kugouto dokidoke no!” etii.

²³Tijake okei kede akagaado go-motii, okei jupi kawi me ki kei taipagi mana kodo.

²⁴Okei jupi akaije mana potu tidoke, okei jupi kawi ki ibo eebatija mana kodo.

²⁵Tijake Jesus eteete mana, „Ojaa bagee ejakimake-tai bagee kedaa bida peu etimakai, daana okeija ka iboudo kede jowee me eebatija.

²⁶Kodeja ikii ke kou dani ko beu. Kodeja ikii jupi ka ibo kidi, mijo dani kai. Daana etimake-tai kidi, kijakei te-tai me dani kai.

²⁷Kawi ki ibo, naine animakita me kidi, mee? eedade-tai me kidi. Beu mee? naine animakita me kidi no. Kodeja ani ki ikii jupi kijakei te-tai danite.

²⁸Ikii ke anija nagaado tita gaa bida peu kidi neetou to.

²⁹Daana Naitai kidaa jakimakita makiida natogijawita danite, ani maija kijatogijawii,

³⁰anija jakimakita makiida ani ma enaimo no-tita. Daana ibo animakaida animakijake Israil epa wija ma gaati boko japetai.

³¹Ei, Simon, Simon! Teege ikii utoma umina bida peu gandum dani mapagi kitaine

³²kodeja ani sembahjang kajakimakeega, akija maakodo gai dimi kodo bego te te-tita. Daana aki ki wouga kijake akoogeima boko ooduwajawii,” etii.

³³Tijake Peterus eteete mana, „Ei, Tuhan, aki ma enaimo wanee owaa duba uwii na enaa, bokai na enaa,” etii.

³⁴Tijake Jesus eteete mana, „Ei, Peterus, ani katii, ito naago ajam mana te taipiga, aki nadouge mana kigi wido beu puga nataipageida to,” etii.

³⁵Tijake Jesus etope-taidoopa eteete mana, „Potó ma, agija ma, bado awii ma tagu kibadikumeetega gaa, ikii tumaana agijo beu keemega, mee?” Etijake „Beu” etii.

³⁶Tijake eteete mana, „Kodeja ito kou, meija poto awipi dokii to, daana agija maija. Daana meija kataana beu kipi, kagaba kaa tijake kataana edai.

³⁷Ani kitii kouja, ani maida make kapogeije ko kobadoke taipiga, kou ko: Okai peu bagee ma enaimo egakita mana kodo. Ani maida make ebijamakita mana kodo boko duwadoke tija,” etii.

³⁸Tijake okei eteete mana, „Dodou, Tuhan, kataana wija topai,” etijake Jesusja „Tiki no,” etii.

³⁹Jesus podomijake kei teigi danite Zaitun Dimiidaapa uwii. Etope-taido maija eepei.

⁴⁰Kouda kodaa dakii tijake Jesus eteete mana, „Ikii gaado tapa te ke-tijake sembahjang tiwei,” etii.

⁴¹Mogo wagi-toojogo anija daniida wo gaa kijake bado donimakijake sembahjang,

⁴²eteete mana, „Ei, Naitai, aki enaa gape ko, kii uwaawe kidi aneepa make napipikajawii. Kodeja anija dimi ko beu, akija dimi to kei tai,” etii.

⁴³Jaetigo-tai bagee epaawado make ewaida kijake bida eewii.

⁴⁴Totome umina kodo duba sembahjang umina tai, tijake awaata kodo emo dani maki maida totopo tidaa.

⁴⁵Okai sembahjang titaidaapa make joonidoke tijake etope-taidoopa uwijake, okei gaagaa ka uno umi-toojogo edomakai.

⁴⁶Tijake eteete mana, „Magijo ka ikii uno umeete? Anigojake sembahjang tiwei, ikii gaado tapa te ke-tijake,” etii.

⁴⁷Okai mana wegaatigo gaa me kotoona mei. Daana me kidi eka ki Judas, kii ko wija ma gaati ka kede me idaana kidaa migougu oomakii. Okai Jesus unu ejumidoune mei.

⁴⁸Kodeja Jesus eteete mana, „Ei, Judas, unu ejumidojake me Joka eekegajawiine, mee?” etii.

⁴⁹Jesus watija ka bagee kede potu taipiga mana dojake eteete mana, „Ei, Tuhan, inii kataana ka wagii, mee?”

⁵⁰Etijake okei jupi ka me idaana kidi Ibo Imam jakei te-tai me wagijake etikaato gapa jaduwajawii.

⁵¹Kodeja Jesus wo eteete mana, „Kii kidi to nijaikei.” Etijake gapa kodo jajakidojake titaaki jatijawii.

⁵²Tijake Jesus kidaa imam iboudo ma, Ugatameja owaa douto-tai bagee ma, iboudo ma, ejakimakaine meta bagee kedeepa eteete mana, „Ikii moonaa te-tai me akaije ootaine jaijo kataana ma kopa ma dokijake meega, mee?

⁵³Agapi gakita ani Ugatameja owaa duba keetou to teiga, tijake ikii najakimakai beu. Kodeja ito kou ikiija ka wagi, daana bunita ka bida bokouto kodo,” etii.

⁵⁴Okei Jesus ejakimakijake ouwii, Ibo Imam owaapa kodaa. Peterus poto make eepei.

⁵⁵Okei owaa juwouda bodija dagumijake animakai, Peterus maija okei ma enaida animakai.

⁵⁶Bodija wii tapa api idaana epeepite peka edootaa timakijake eteete mana, „Kii me ki maija okai ma enaimo me kidi,” etii.

⁵⁷Kodeja okai beu puga eteete mana, „Ei, jagamo, ani edou beu me,” etii.

⁵⁸Ibopo tou beu gaa me idaana edomakijake eteete mana, „Aki na kei kede idaana.” Etijake Peterus wo eteete mana, „Kowaa ke, ani ki beu,” etii.

⁵⁹Tota dani gaa kidaa me idaana ma bida peu eteete mana, „Beu maa kou, kii me kidi okai ma enaimo. Okai Galilea ka me kiija,” etii.

⁶⁰Kodeja Peterus eteete mana, „Kowaa ke, akaa eneege mana ko ani gai beu,” etii. Okai kou gaa kodo okai mana wegaatigo gaa, ajam mana tai.

⁶¹Jesus wouga kijake Peterus edomakai; tijake Peterus kidi Jesusja etipi mana kodo gadoke, kou ko, „Ito naago ajam mana tai beu gaa aki kigi wido beu puga nataipage,” etipi mana kodo.

⁶²Okai podomijake jege kodiimakii tai.

⁶³Jesus ejakimakita bagee kede ewidogijake wagigoo.

⁶⁴Okaija peka eepumijake egaado eete mana, „Douja nidodou, meija kageegi?” etii.

⁶⁵Okei mana wedaba ewidogeete godajake tai.

⁶⁶Abata digii meido ka iboudo kede kotuu timakai, kou ko imam iboudo ma, kapogeije epi bagee ma. Okeija ka pika-taida ouwijake eteete mana,

⁶⁷„Aki Keristus keetigo ko enidodou.” Etijake Jesus wo eteete mana, „Ani kitipa ko ikii maakodo te nagaipiga.

⁶⁸Daana kigaado tipa ko ikii joko te eniipiga.

⁶⁹Kodeja ito kiija make wado me Joka kidi Ugatameja bida bokouto etikaato gebo animaki-toutagi,” etii.

⁷⁰Tijake okei utoma eteete mana, „Keetigo ko aki Ugatame Joka, mee?” Etijake wo eteete mana, „Ikii eneega danite, ani okai kii kidi,” etii.

⁷¹Tijake okei eteete mana, „Magijo taine inii mana abuma wegai? Okai kidaa ebeida make mana inii ejuweege,” etii.