Read Galela LUKAS 3 Bible Online

LUKAS 3 - Galela bible

LUKAS 3

¹Kaisar Tiberius maki jakimakita gaa idibi ma gaatijago taun kodo; Pontius Pilatus kidi Judea ka Gubernur ki-toojogo; daana Herodes kidi Galilea ka Gubernur; daana kenekame Pilipus kidi Ituria ma, Terachonitis ma ka Gubernur; daana Lisanias kidi Abilene ka Gubernur.

²Hannas ma Kajafas ma Ibo Imam aatoojogo gaa, Ugatameja mana Zakaria jokame Jahja maida kita, gei tapa make.

³Okai Jarden onee watija bobi-motii, tedemijake baptis tai mana pitokeete, peu awitaido ipa jajaike-tijake.

⁴Tikauwa ka gokobaki tijawiidaiga wegai tita me Jesaja kapogeije ebijamakita danite: Gei tapa mana emeeme tina: Tuhanja ita epeepi jawadijawii. Kago-pagooja maija doodoo jaawii.

⁵Dobaa dobaija wado edijake tai, Daana bago ma kotu ma mukajake tai, Ekoba dani kodo doodoo awii, Daana takuudo gakimijawii.

⁶Tijake me tuma tumaija Ugatameja ajii bokouto doutai.

⁷Baptis taine meta me wedaba kedeepa Jahja etei tita: „Kowaa kei, jina tuma, kumi dimi putu duwadoke taita kodoopa make okii mana kodo meija kitipi?

⁸Ikii tedemai mana ma utuutu ka uta gojawii, daana ikii kede kegepa duba ’Iniitai Ibrahim kidi’ mana kodo wegaate te go-motii. Ani kitii kouja, Ugatame kei mogoudo kei Ibrahim jokaane eewii bida jago kidi.

⁹Ito kou maija pija epaapa jika makijake topi. Okai kouja pija gakita enaa uta gojawii beu daniija kobimakijake bodija jookogai,” etii.

¹⁰Tijake me wedaba kede wo eteete mana, „Inii magijo kei tai?” etii.

¹¹Tijake meidoopa wo eteete mana, „Meija badju wija ewaa kipi, beu me kidi ena menii. Daana naija agijo makipai bagee maija, okai kii dani tai,” etii.

¹²Mege kotuu te-tai bagee maija baptis taine mejake eteete mana, „Ei, Kuduu, inii magijo kei tai?” etii.

¹³Tijake eteete mana, „Kitita agijo abuma te motii,” etii.

¹⁴Serdado maija egaado teete mana, „Inii ke magijo kei tai?” Etijake wo eteete mana, „Me peepu te etai, daana puja manaida make meido ijeije te etai. Daana ikiija kei tai age kodo tiki gai,” etii.

¹⁵Me utoma douto-douto teetigo, daana kegepa duba kei teete mana, Jahja kidi Keristus kidi kipi gaa, mee? gajake.

¹⁶Jahja kidi wo eteete mana, „Ani ki uwo ka baptis kitai, kodeja ani ma ko okai ki bida jago me meitagi. Okaija bado awii buda jaekegai ko nadou peu. Okai kidi Rohulkudus ma bodija ka ma baptis kitaitagi.

¹⁷Jimu mapagi te-tai agijo kodo okaija ganeida topi, uta epaida deekumijake gandum uta awimakijaida awimake-tita. Kodeja kopu jato ko te madinimake bodija duba jookogaitagi,” etii.

¹⁸Joko ka etopai mana kodoudaiga maija ajii mana kodo meido kodoopa japitokai.

¹⁹Kodeja wiijago kabuuda maki jakimake-tai me Herodes kidi Jahja ka ewidogita, kenekameja waka Herodiah maida make, daana joko ka peu agijo kei tita maida make maija.

²⁰Tijake kei manaido utoma abuma peu aweete Jahja wanee owaa duba amo eewii.

²¹Meido utoma kede baptis etita gaa, daana Jesus baptis etijake sembahjang teetigo gaa, epa damo kebadoke tai.

²²Tijake Rohulkudus okai maida mijouwe kai, wonou epoo dani bukaa. Tijake epa duba make ka mana wuu tijake eteete mana, „Aki ki ani Joka didé. Ani umina juma dege-dege katai,” etii.

²³Jesus kidi taun jokagaati dani umijake kei tai go-motita gaa. Me ka egai ko, okai Jusuf joka; Heli joka,

²⁴Matat joka, Lewi joka, Malchi joka, Janna joka, Jusuf joka,

²⁵Matatias joka, Amos joka, Nahun joka, Esli joka, Naggai joka,

²⁶Maat joka, Matatias joka, Simei joka, Jusich joka, Juda joka,

²⁷Juana joka, Resa joka, Zorubabil joka, Sjaaltiel joka, Neri joka,

²⁸Malchi joka, Adi joka, Kosam joka, Elmodam joka, Er joka,

²⁹Jusa joka, Eliazar joka, Jorim joka, Matat joka, Lewi joka,

³⁰Simeon joka, Jahuda joka, Jusuf joka, Jonan joka, Eljakim joka,

³¹Malia joka, Minna joka. Matata joka, Natan joka, Daud joka,

³²Jisai joka, Obed joka, Boaz joka, Sala joka, Nahsjun joka,

³³Aminadab joka, Arni joka, Ezrom joka, Paris joka, Jahuda joka,

³⁴Jakub joka, Isak joka, Ibrahim joka, Tarah joka, Nahor joka,

³⁵Saruch joka, Ragau joka, Palik joka, Abir joka, Sala joka,

³⁶Kainan joka, Arpaksad joka, Sem joka, Nu joka, Lamech joka,

³⁷Metusalah joka, Enoch joka, Jarid joka, Mahlalel joka, Kainan joka,

³⁸Enos joka, Set joka, Adam joka, Ugatame joka.