Read Galela LUKAS 5 Bible Online

LUKAS 5 - Galela bible

LUKAS 5

¹Meido Ugatameja mana juwiine tijake Jesus maida tipi-tipi etai, Okai Genesaret peku watija jooni-toojogo gaa kodo.

²Koma wija peku watija mijijawi-toojogo dou; kodeja binei muga-tai meido kede mijouwe kijake ebai witogeetigo.

³Koma maana Simon ipuwe ka kodo matakijake mijo gaa jamo pojawii ediimai. Okai animakijake komaida make meido etopai.

⁴Okai mana muumai tijawijake Simonpa eteete mana, „Ukaida jamo pojake binei mugaine ebai mijaawii,” etii.

⁵Tijake Simon wo eteete mana, „Kuduu, inii wanee woja ee ma ubaate idaana ma mugai beu! Kodeja aki mana eneege kouja ebai mijaawiipiga,” etii.

⁶Okei mijaawijake binei kotuu to awidaa tai. Ebai kigibidaa taine ijeida kouja

⁷okei wa kei te-tai bagee joko ka komaida eedade-tita tijake ganaabegouda manaa-tai. Okei mejake koma wija kodo ebetume tijawijake gibu taine ijeida.

⁸Okai kou kodo Simon Peterus dojake Jesus jumaapa apaipu tidoke tijake eteete mana, „Ei, Tuhan, najaiki, ani peu umina kojoka,” etii.

⁹Okai ego takuu-takuu kouja, okai ma enaimo bagee maija, okeija ka binei mugata kodo maida make.

¹⁰Kou dani maija Zabdi jokaane Jakub ma, Jahja ma, Simon ma enaimo kei te-tai bagee kede. Tijake Jesus Simonpa eteete mana, „Weda te gai. Ito make wado me mugaitage,” etii.

¹¹Okei koma iteida mijimakijake utoma agijo utoma jaikidokijake Jesus eepei.

¹²Maki enaida tota gaa tomo jago dani kiipigi koupagi me idaana mei. Okai jesus edojake maki jato mijouga kijake bida peu ediimeete mana, „Ei, Tuhan, kou danite aki enaa gape ko, aki bida jago kojoka naojawii,” etii.

¹³Tijake okai gane mapido atii. Ejakidojake eteete mana, „Ani ide. Aki oodoke ti,” etii. Okai kou gaa kodo maija tomo dani kodo igadaa tai.

¹⁴Jesus etimakeete mana, „Me idaana ma te etii, kodeja aki akaato imampa emuwake-uwijake oodoke keege kouja menija agijo menii, Musaja nitimakita danite, okei dimi ga-tita tijake,” etii.

¹⁵Kodeja umina kodo okai maida make mana wudigi tidoke tai. Me umina wedaba ejuwaine ma, didi beu jaawe-tita ma okaapa kotuu to tigoo.

¹⁶Kodeja Jesus me beuda uwijake sembahjang tigoo tei tita.

¹⁷Naagoona Jesus etopeetigo gaa Parisi bagee ma kapogeije epi bagee ma kouda kodaa animaki-toojogo; okei Galilea dokoo ka e maki te maki make mejake, daana Judea make ma, Jerusalim make ma; Tuhanja bida agijo kodo okai maida, didi bagee beu jaawe-tijake.

¹⁸Me ka bado ekogadaa tita me idaana uno umii kejage maida edokai. Jesus jumaapa emakijawiine tijake woujo kaine ita ubai.

¹⁹Kodeja ita beu kijake me tipi kouja owaimouda wadouwe kai. Owaimo kebajawijake edokita kejage maida me jupiida Jesus jumaapa mijouwaawii.

²⁰Okeija ka maakodo gai kodo Jesus jadojake eteete mana, „Ei, me ki, akija peu awitaido ipa kajaikidokii,” etii.

²¹Kapogeije epi bagee ma, Parisi bagee ma mana go-motii, kei teete mana, „Kii ke meime Ugatame eduwaate mana godaate kidi? Meija peu awitaido ipa ejaikija? kodeja Ugatame kidaa to,” wegai.

²²Okeija ka dimi kodo Jesus epi kouja wo eteete mana, „Magijo ka kegepa duba mana wegaate?

²³Kawi ka ki ekowadoke, ’Akija peu awitaido ipa kajaikidokii’ etii ki, mee? ’Anigojake uwina ti’ etii ki.

²⁴Kodeja me Joka makiida kiija peu awitaido ipa ejaiketijake boko jaduwajawita me kidi ikii epi ke-tita” tijake bado ekogadaa tita meepa eteete mana — „Ani katii, anigou. Akija uno umii kejage dokijake owaapa uwii,” etii.

²⁵Okai kou gaa kodo okei pekaida okai anigojake uno umii kejage dokijake owaapa uwii, Ugatame muta etuwaate.

²⁶Okei utoma umina maa kou ego takuu-takuu tijake Ugatame muta etuwai. Okei weda umina gajake wegaate mana, „Ito naago inii gai beu mana dooge kodaa,” wegai.

²⁷Wadoutouga Jesus podomijake mege kotuu te-tai me idaana eka ki Lewi mege kotuu te-taida animaki-toojogo edou. Tijake okaapa „Naapei,” etii.

²⁸Utoma agijo jaikidokijake okai joonidoke tijake eepei.

²⁹Lewija owaapa ibo buka oonai. Mege kotuu te-tai bagee wedaba ma, joko ka bagee ma, me wedaba mejake oonai.

³⁰Tijake Parisi bagee ma, Parisi jaida kapogeije epi bagee ma Jesus etope-taido kitigi motigi eteete mana, „Magijo ka ikii mege kotuu te-tai bagee ma, peu bagee ma enaimo noote?” etii.

³¹Tijake Jesus wo eteete mana, „Bida bagee doktoda dim te egaja, kodeja didi bagee to.

³²Ani enaa bagee ebukaine mei ko beu, kodeja peu bagee ebukaine mei, okei tedeme-tijake,” etii.

³³Tijake okei wegaate mana, „Jahjaja etope-taido kigi inoudo te nai dijo do-tai ma, sembahjang ma; Parisi etope-taido maija kou dani, kodeja akija etope-taido nai to tigoo,” etii.

³⁴Tijake Jesus eteete mana, „Waka bukeete me kidi ogaaneido ma toojogo gaa kodaa, buka oonoote bagee kede te nai dijo dou etija, mee?

³⁵Kodeja putu naago kaita kodo, waka bukeete me okeepa make beu kijake, okai kou gaa kodo okei te nai dijo doutai,” etii.

³⁶Tijake ena dani awe-tai mana etii, „Me idaana ma ija kagaba kapoona te wigo-motija, doga kagaba maida puumaine tijake. Kou kei ti-toojogo, ija kagaba kodo wigodoke, daana ija wigomotita kapo kodo doga kagaba ena dani beu.

³⁷Daana me idaana ma ija utaadijo doga kado tapuja duba te wagaawija; ija utaadijo kodo potu tijake kado tapuja wigodoke kouja. Tijake utaadijo kodo tuumijake kado tapuja peu kai.

³⁸Kodeja ija utaadijo ija kado tapujaida wagaawija.

³⁹Daana meena ma doga utaadijo nojake ija utaadijo ide beu, ’Doga ka ko igi enaa no’ wegai kouja.”