Read Galela LUKAS 6 Bible Online

LUKAS 6 - Galela bible

LUKAS 6

¹Sabbat naago kigeena gandum taidaiga wokaato kai. Etope-taido gandum jukuuno kodo duwa-motijake nai, gane duba widigi tijake.

²Kodeja Parisi bagee wija wido ka eteete mana, „Magijo ka ikii Sabbat naago dijo beebu teete?” etii.

³Tijake Jesus wo eteete mana, „Ikii Daudja kei tita agijo kapogeije ebatai beu, mee? Okai ma, okai ma enaimo bagee ma naidi tijake

⁴okai Ugatameja owaa duba wadoujo kijake makita goti kodo motijake nai; daana okai ma enaimo bagee maija menita; nai ko dá kodeja; imam to pijo,” etii.

⁵Daana eteete mana, „Me Joka kidaa Sabbat naago boko duwajawita me kidi,” etii.

⁶Joko ka Sabbat naago Jesus sembahjang owaa duba woujo kijake meido etopai. Kouda kodaa etikaato gane bokata me idaana toojogo.

⁷Kapogeije epi bagee ma, Parisi bagee ma edoutou, Sabbat naago kodo me kidi beu jaawiipagi, mee? ijeije etaine takaa ubaate tijake.

⁸Kodeja okeija ka dimi kodo Jesus epi, tijake enakaato gane bokata me kidiipa eteete mana, „Me jupiida joonidoke tai,” etijake okai me jupiida joonidoke tai.

⁹Tijake Jesus eteete mana, „Ani kigaadou taine: Sabbat naago enaa agijo kei tai pijo, mee? peu agijo kei tai pijo. Daana ija eewii, mee? wagimakai,” etii.

¹⁰Jesus meido kede edoumigijake me kidiipa eteete mana, „Akija gane mapido ti.” Etijake okai kou kei tijake gane bida kidoke tai.

¹¹Kodeja okei emoge umina gajake Jesus maida magijo kei tai mana amo wegai joko wegai tai.

¹²Okai kou naagoudo kodo Jesus sembahjang taine dimiida uwii. Ugatameepa sembahjang teete awijawii.

¹³Abata digii okaija etope-taido manaa-tijake okei jupi make me ida wija ma gaati ewitoki-motii, okai eti-awita bagee eebatita bagee kede.

¹⁴Simon kidi, kii ke okai Peterus eebatita kidi ma, kenekame Andereas ma, Jakub ma, Jahja ma, Pilipus ma, Bartolomius ma,

¹⁵Matius ma, Tomas ma, Alpius jokame Jakub ma, Simon Zelotis eebatita kidi ma,

¹⁶Jakub jokame Judas kidi ma, Judas Iskariot ma, Jesus eekegajawita me kidi.

¹⁷Okei ma enaimo okai mijo mejake tadiida joonidoke tai; etope-tai bagee me wedaba, daana Judea ma Jerusalim ma me wedaba, daana maikai watija Sur ma Sidon ma me wedaba

¹⁸ejuwaine mei, daana didi agijo beu jaawe-tijake. Daana enija jago bagee maija beu jaawita.

¹⁹Kotuu timakita bageido utoma ewinikidoune, okai duba make bida agijo podomijake me utoma beu jaawii kouja.

²⁰Okai etope-taido edoumigijake eteete mana: „Ideide no, ikii daba bagee; Ugatameja jakimakita makiida ikii ipuwe kouja.

²¹Ideide no, ikii ito kou naidi bagee; ikii mobu kaita kouja. Ideide no, ikii ito kou jege bagee; ikii kijai taita kouja.

²²Ikii ideide no, me ka be kigai gaa, daana ikiiniinii kitijawii gaa, daana kiwidogijake ikiija ka eka ko peu kodo kijaikai gaa, me Joka maida make!

²³Okai kou naago kodo ikii ideide ma dogipogi tina tai. Epaawado ikiija ka petege ibo kouja. Okai kou dani maija okeija aijaane kedaa tikauwa ka gokobaki tijawiidaiga wegai tita bagee jakei tei tita kouja.

²⁴Kodeja peu kidaa no, ikii tonawi bagee, ikiija ka mobu agijo go-moteetega kouja.

²⁵Peu kojoka no, ikii ito kou mobu bagee; ikii naidi taita kouja. Peu kojoka no, ikii ito kou kijai teete bagee; ikii dimi gaduwajake jege taita kouja.

²⁶Peu kojoka no, me utoma muta kituwai gaa kodo; okai kou dani maija okeija aijaane kede puja mana wude-tai bagee maida jakei tei tita kouja.

²⁷Kodeja ikii juweete bageepa ani kitii: Ikii ma jape bagee ipa egai. Be kigai bageepa enaa agijo jakei tai.

²⁸Peu keewii bagee kojáá mana amo etii. Daana kiwidogai bagee sembahjang jatai.

²⁹Amaimu tabee kitai bagee enakaato maija emuwakai. Daana ikiija egaupe-tai kagaba kijamotii bagee ikiija badju kagaba maija kijamote-tita ejaikai.

³⁰Kidiimai bagee utoma menii to, daana ikiija ka edepede kijamotii bageepa make joko te ediimai.

³¹Me ka kijakei tai ikii ide gai danite, ikii na jakei tai.

³²Kou danite ikii ipa kigata bagee ipa egapa ko, ikii má epaago? Peu bagee maija ipa egata bagee ipa egai kouja.

³³Daana enaa agijo kijakei tai bageepa enaa agijo jakei tipa, má petege gouta? Peu bagee maija kou kei te-tai kouja.

³⁴Joko naimaipagi dimi gajake kedaa gaa menipa, má petege gouta? Peu bagee maija peu bageepa kedaa gaa menii, kou dani kodo joko motiine tijake.

³⁵Kodeja ikii ma jape bagee ipa egai, daana enaa agijo jakei tai. Daana joko motiine dimi te gajake menii. Ikiija ka petege ibo kaita kojoka, daana ikii Monika Me ka jokaane kaita. Nagajaweege wegai beu bagee ma, peu bagee ma maida okai bunu enaa kouja.

³⁶Ikii ke ipa gai, Ikiitai na ipa ga-tai danite.

³⁷Ikii me ijeije te etai, daana ikii na ijeije ti kitai. Peu taawii, tijake ikii na peu te keewii Ipa ejaikai, tijake ikii na ipa kijaikija.

³⁸Menii, tijake ikeepa maija kinija. Epeebijado tijake, mijo tagi tita, daana enaida wo bego joko bego tijake, tuumidaa ma, me ka ikiija mutaida kijatuumaitai. Ikii jaebijadojake menii kodo danite, kijaebijadojake amo kiniitai kouja.”

³⁹Okai ena dani awe-tai mana maija oowegai: „peka wanee me ka peka wanee me idaana migougu oomakija, mee? Beu mee? okejai wija komo duba aajagii tija?

⁴⁰Etope-tai me idaana okaija kuduu ma ko ibo ko beu, kodeja me gakita topii agijo tiki tijake okaija kuduu ma ena dani kaitagi.

⁴¹Magijo ka aki keneka ka peka duba jimu puugee jadomakai, kodeja aki kidaa peka duba ka kemoma dou beu?

⁴²Juwa, kawe dani tijake aki kenekaapa eteete mana, ’Kowaa ke, ani keneka, aki peka duba jimu puugee kaadijawiine’, daana aki kidaa peka duba kemoma kodo dou beu kodo? Kowaa ke, matabe bagee! Akija peka duba kemoma badijawii tiga tijake ewaida dojake aki keneka peka duba ka jimu puugee kodo jaadijawii.

⁴³Enaa uti ena ma peu uta te goja kouja. Daana peu uti ena ma enaa uta te goja.

⁴⁴Pija gakita akiuta uta gojake gaja. Ijó pija maida ara uta te duwaja kouja, daana edu maida po te duwaja.

⁴⁵Enaa me okaija kegepa duba ka enaa awiida make enaa agijo podomijawe-tai, daana peu me okaija peu awiida make peu agijo podomijawe-tai. Kegepa duba bokouto kodo ebeiga godajake kojoka.

⁴⁶Magijo ka ikii ’Tuhan, Tuhan,’ naabatai? kodeja anija kitii mana kodo kei tai beu.

⁴⁷Meija aneepa mejake anija mana najuwijake dijo dopi, okai má tuma dani bukaa keemuwakaipiga:

⁴⁸Okai me idaana owaa migita dani bukaa. Komo mijo umina utijake mogo maida kabo makii. Tijake uwo ejajake owaa tapa degidaa tai, kodeja owaa pigi beu, bida bida tijawita kouja.

⁴⁹Kodeja meija juwijake dijo te dopi, me idaana kabo beuda maki maida owaa migita dani bukaa. Uwo kou maida degijake bogomidoke tai, tijake kou owaa umina peu kidoke tai.”