Read Galela LUKAS 7 Bible Online

LUKAS 7 - Galela bible

LUKAS 7

¹Me jumaapa kei manaido oowegamakijake Jesus Kapernaum makiida woujo kai.

²Serdado migougu me kidi jakei te-tai me idaana okaija ibo kidaa umina ipa egata me kidi didi umina bokaine dani teetigo.

³Jesusja kei tai mana serdado migougu me kidi juwijake Jahudi ka iboudo ebadikumii, Jesus ediimeete mana, jakei te-tai me kidi beu jaawiine me-tita tijake.

⁴Okei Jesuspa dakii tijake okei bida peu ediimeete mana, „Enaa kojoka eedadai;

⁵inii tuma okai ipa nigai kouja, daana sembahjang owaa nijamigijawita,” etii.

⁶Tijake Jesus okei ma enaimo uwii. Owaa kapauto kijake serdado migougu me kidi ogaane ebadikumii, eteete mana, „Ei, Tuhan, gaagaa te tai, ani nadou peu kouja, kou danite aki ani owaapa wadoujo kai ko.

⁷Okai kouja ani kidaa akeepa jawii nadou peu gaaga. Kodeja mana eni-jokai to, nakei te-tai me kidi beu ke-tita, kateegi.

⁸Ani na mana juwe-tai me kouja, daana serdadoudo maija najuwe-tai. Kou danite ani me idaana ’Uwi’ etipa okai uwii. Daana me idaana ’Mei’ etipa okai mei. Daana nakei te-tai me kidiipa ’Kii kei ti’ etipa okai kei tai to, kateegi,” etii.

⁹Kou mana muto Jesus juwijake eepai. Wouga wakouga tijake eepeete bageepa eteete mana, „Ani kitii, Israil bagee jupi kou dani maakodo gai ibo kodo ani dou beu,” etii.

¹⁰Ebadikumita bagee owaapa wo uwijake jakei te-tai kidi didi beu ki-toojogo edou.

¹¹Wadoutouga Jesus maki katouda uwii, eka ko Nain. Etope-taido ma, me wedaba ma enaimo uwii.

¹²Owaa dimiito kapa kijake bokata me idaana me ka edoki-toojogo, ukame ka enaago joka kidi. Ukame kodo mijáá. Kou makijo ka bageido wedaba okai ma enaimo eepei.

¹³Tuhan edojake ipa egajake eteete mana, „Jege te tai,” etii.

¹⁴Okai mejake edokita kejage winikidou, tijake dokeete bagee joonidaa tai. Tijake Jesus eteete mana, „Ei, jokaagaa, ani katii, anigodou,” etii.

¹⁵Tijake bokata me kidi anigojake animakai, tijake mana go-motii. Tijake ukame kodoopa Jesus jajaikai.

¹⁶Weda peijo meido utoma maida kidaa. Okei Ugatame muta etuwaate mana, „Ibo mana wude-tai inii jupi ewaa keegi!” daana „Ugatameja okai ma bagee nidou mepi!” wegai.

¹⁷Kii mana muto Jesus maida make Judea dokoo ma, kou watija ka makiida ma ugo uwikumii.

¹⁸Kei manaido utoma Jahjaja etope-taido ka Jahja eti-menii.

¹⁹Tijake Jahja etope-tai wija manaa-tijake Tuhanpa ebadikumii, eteete mana, „Aki ki meitagi me wegaigai kidi, mee? inii meena edoutou?” etii.

²⁰Ebadikumita bagee Jesuspa dakii aatijake aeteete mana, „Baptis tei tita me Jahja kidaa akeepa nibadikumijake kateegi mana,’ Aki ki meitagi me wegaigai kidi, mee? inii meena edoutou?’ kateegi,” aetidou.

²¹Okai kou gaa kodo maija me wedaba didi tuma tumaija ma, enija ma Jesus beu jaawii, daana peka wanee bagee wedaba enaa jaawii.

²²Tijake Jesus wo eteete mana, „Ikai aadou ma aajuwai ma aateega agijoudo Jahja aete-auwai. Kou ko, peka wanee bagee peka dou; wajage bagee ita epeepite uwina tai; tomo jago dani bagee oodaa; gapa daba bagee juwii; bokata bagee eenigojawita; daana daba bageepa ajii mana jawudita kodo.

²³Ideide no, ani maida make dimi duwaa-duwaa beu bagee,” etii.

²⁴Jahjaja ebadikumita meija kede auwijake, Jesus meido kedeepa Jahja maida make mana oowegaine go-motii, eteete mana, „Ikii magijo doune gei tapa uwii? Mome tegeena ukija ka bego tijawijake na ko, mee?

²⁵Magijo na ko ikii dogou? Enauto kagaba makita me idaana, mee? Juwidowei, enauto kagaba makijake diiti pagaadagaida umi-tou bagee kede maki jakimake-tai bagee ka owaapa tou.

²⁶Mee? Magijo ikii do-uwii? Gokobaki tijawiidaiga wega-tai me idaana, mee? Beu maa kou ani kitii, gokobaki tijawiidaiga wega-tai me ma ko akanawa ko beu me.

²⁷Kii dei okai maida make kapogeije ebijamakita: Juwidou, naaetigo-tai me tiga aki jumaapa kaaebadikumii; Akija ita epeepite kaawadiitagi.

²⁸Ani kitii, jagamo ka epajawita bagee jupi Jahja ma ko ibo beu. Kou ko kou kodeja Ugatameja jakimakita makiida ka mijo ka kidi ki okai ma ko ibo.”

²⁹Ejuwita bageido kodo ma, mege kotuu te-tai bagee ma Ugatame maa kou egai, Jahjaja baptis etijake kodo.

³⁰Kodeja Parisi bagee ma kapogeije epi bagee ma Ugatameja dimi okei maida ekonai, Jahjaja baptis etai beu tijake.

³¹„Kii wagi ka bagee magijo dani etijawii juwa, daana okei magijo dani bukaa?

³²Okei jokaido akaada te-taida animakijake okei kede mana akaateete dani bukaa, wegaate mana, ’Inii mitoopi keewijake ikii gaida-gaida beu, Daana inii jiijii kitijake ikii jege beu.’

³³Jahja baptis te-tai kidi mejake goti na nai beu, utaadijo na nai beu, tijake ikiija wegai ko, ’Okai enija.’

³⁴Me Joka nai ma mejake ikiija ka wegai ko, ’Edodowei, nai dimi to, daana utaadijo nojake uneune; mege kotuu te-tai bagee ma peu bagee ma ogeme.’

³⁵Dimi bokouto kodo jokaane ka maa eewita.”

³⁶Parisi me idaana ka Jesus ebukai, enaimo naine tijake. Parisi me kidi owaapa woujo kijake naine animakai.

³⁷Kou makiida peu jagamo idaana toojogo. Jesus Parisi me kidi owaapa noote mana juwijake unu enaa odijo awita tapuja doke-mei.

³⁸Jagamo kodo Jesus bado wouto joonidoke tijake jege tai. Jegeedijo kodaa Jesus bado debeta kijake jagamo kodaa ijo ka jawunai. Okaija bado unu ejumidojake unu enaa odijo jatuumai.

³⁹Kodeja Parisi me Jesus ebukita kidi kou kei tita dojake kegepa duba kei teete mana, „Me kii ke gokobaki tijawiidaiga wega-tai me naako, ewinikidoote jagamo kou ko kawe dani tita jagamo kodo okai epi ki-toja. Jagamo kodo peu kouja.”

⁴⁰Tijake Jesus wo eteete mana, „Ei, Simon, mana mutoona katiine,” etii. Tijake eteete mana, „Ei, Kuduu, enidodou,” etii.

⁴¹„Mege kedaa gaa mene-tai me idaana me ida wija ebé toojogo. Me idaana ebé ko mege muto waguwo. Joko ka kidi ebé ko mege gaatibeu.

⁴²Okejai wija ebé aadai kaga kouja okejai wija jajaikai. Kojoka kei wija kei kawi ka ki euga didi egaipagi?”

⁴³Etijake Simon wo eteete mana, „Anija gai ko, ebé ibo jajaikita me kidi juwa.” Etijake Jesus amo eteete mana, „Akija gaage ko maakodo.”

⁴⁴Jagamo kodoopa wouga wakouga tijake Simonpa eteete mana, „Kou jagamo kodo edooge, mee? Akaa owaapa ani woujo kijake bado witogaine uwo naimai beu tipe, kodeja okai ko jegeedijo ka anija bado debeta tijawijake ijo ka nawunaaga.

⁴⁵Aki unu najumai beu, kodeja ani woujo kipaida make ito to okai te duwajake ani bado unu najumigoo.

⁴⁶Anija migo aki odijo natuumai beu keege, kodeja okai anija bado unu enaa odijo natuumeega.

⁴⁷Okai kouja ani katii, okaija peudo wedaba kodeja, ipa jajaikidokii, okai didi umina gai kouja. Kodeja mijo gaa to ipa ejaikita me mijo gaa to didi gai.”

⁴⁸Tijake jagamo kodoopa eteete mana, „Akija peu awitaido ipa kajaikidokii,” etii.

⁴⁹Tijake enaimo noote bagee okei kede kegepa duba wegaate mana, „Kii me kii ke meime? peudo ipa ejaike-tai kidi,” wegai.

⁵⁰Tijake Jesus kidi jagamo kodoopa eteete mana, „Akija maakodo gai kodaa enaa keege. Kojáá uwii,” etii.