Read Galela LUKAS 9 Bible Online

LUKAS 9 - Galela bible

LUKAS 9

¹Jesus etope-tai wija ma gaati manaa-tijake enija maida make bida boko jaduwajawii, daana didi tuma tumaija beu jaawe-tijake maija.

²Ugatameja jakimakita makiida mana wudii ma, didi beu jaawii ma te-tita ebadikumii.

³Daana eteete mana, „Ita maida tumaana ma te dokii; bado kopa juwa, agija juwa, goti juwa, mege juwa, kagaba wija na te makii.

⁴Ikii owaanaapa wadoujo kijake kouda tojake kouda kodaa make uwii.

⁵Tijake ti kijakimakai daniija ikii kou makijoopa make podomija gaa kodo, bado maida ka maki puugee kigi atidokii, okei dimi ga-tijake,” etii.

⁶Okei uwijake maki gakita uwina tai. Kiida kouda ajii mana wudeete ma, didi bagee beu jaaweete ma tina.

⁷Wiijago kabuuda maki jakimake-tai me Herodes kidi kei manaido utoma juwii. Okai gaagaa umina, me ino ka Jahja bokata bagee jupi make anigota mana wegai kouja.

⁸Daana me ino ka wegai ko, Elias ewaida keegi. Daana me ino ka wegai ko, tikauwa ka mana wudei tita bagee ka me idaana anigopi.

⁹Tijake Herodes wegaate mana, „Jahja ani ogo eduwaatega, kodeja kii ke meime? okai maida make kei manaido juweete kodo.” Tijake edoune dimi ubai.

¹⁰Eti-awitaido Jesuspa joko mejake okeija kei tita mana kodo eti-menii. Jesus ebukijake okeiniinii maki katouda eka ko Baitsaida ouwii.

¹¹Me wedaba kou mana kodo epi kijake eepei. Jesus meido kodo manaa-tijake Ugatameja jakimakita makiida mana oowegai, daana gai peu bageido didi beu jaawii.

¹²Kou naago uwaataa kijake etope-tai ida wija ma gaati kede Jesuspa mejake eteete mana, „Meido kede uwei neetii, maki okogoudoopa uno umii ma, naija agijo ubai ma te-tita. Inii jakai me beuda kouja,” etii.

¹³Kodeja Jesus etope-taidoopa eteete mana, „Ikii ke naija agijo menii.” Etijake etope-taido eteete mana, „Ineepa goti kemo idibi ma, binei ida wija ma wado beu; kei meido wedaba inii kedaa naija agijo jaeda-uwipe to,” etii.

¹⁴Kei meido jame to ko muto muto to ko muto kouja, kou wado maija.[1]) Tijake etope-taidoopa Jesus eteete mana, „Okei animake-tai etei. Kotoona gaatibeu, kotoona gaatibeu etijake tei,” etii.

¹⁵Tijake etope-taido kou kodo dani tijake meido utoma animake tai etii.

¹⁶Goti kemo idibi ma, binei ida wija ma Jesus motijake epa maida wado dojake mobu ediimai. Utijake etope-taido meidoopa jawude-tijake menii.

¹⁷Okei utoma nojake mobu kai. Utita abu kitaija kodo momotijake edu tapuja wija ma gaati awimakai.

¹⁸Jesus okai kidi to sembahjang teetigo etope-taido okai ma enaimo toojogo. Tijake Jesus egaado teete mana, „Me ka wegai ko ani ki meime?”

¹⁹Etijake wo eteete mana, „Baptis tei tita me Jahja kidi; kodeja me ino ka wegai ko Elias; daana me ino ka ko, tikauwa ka gokobaki tijawiidaiga wegai tita me idaana anigota wegaigai,” etii.

²⁰Tijake Jesus wo eteete mana, „Kodeja ikiija ka ko, ani ki meime?” Etijake Peterus wo eteete mana, „Keristus Ugatameepa make kidi,” etii.

²¹Tijake okai umina bida peu kidi me idaana ma te ete-tijake etimakai.

²²Eteete mana, „Me Joka gaduwai umina beu kai peu, daana iboudo ma, imam iboudo ma, kapogeije epi bagee ma ka ekonijake wagimakai, tijake widaago naago anigou,” etii.

²³Tijake okei utoma kedeepa eteete mana, „Me idaana naapeine gapi, okai akaato dimi te gajake naago gakita okaija pija boko dokijake naapei.

²⁴Meija okai akaato muniine gapi, okai akaato igajawiitagi. Kodeja meija ani maida make okai akaato igajawipi, okai akaato madagajawii.

²⁵Kawo ko enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igajawii juwa, peu kai juwa kou ko.

²⁶Meija ani ma anija mana ma ego nagapi, me Joka maija ego egaitagi, ajiipiidaiga meitagiida, nakameja ka, daana jimubeu jaetigo-tai ka ajiipiidaiga meitagi gaa kodo.

²⁷Beu maa kou ani kitii, jakai me ida wija wido jooni-topai, okei Ugatameja jakimakita makiida dou beu gaa te bokaitai,” etii.

²⁸Kou mana etijake uno waguwo dani umijake Peterus ma, Jahja ma, Jakub ma ouwijake, bagouda sembahjang taine wado uwii.

²⁹Okai sembahjang teetigo ebepeka iginikiniki tidoke tai, daana okaija kagaba umina wakijo ataati tidoke tai.

³⁰Okai kou gaa kodo maija me ida wija, kei ke Musa ma, Elias ma, okai ma mana oojawegai.

³¹Okejai ajiipiidaiga ewaa aakidaa tijake Jesusja bokaitagi mana Jerusalim makiida tiki atiineegi kodo mana oowegai.

³²Peterus ma, okai ma enaimo bagee ma uno kogi umina kodeja gootoki tijake Jesusja ajiipi agijo kodo dou, daana okai ma enaimo aajoonidaa wija kede maija.

³³Me wija kede aigaine jato Peterusja Jesuspa eteete mana, „Kuduu, inii jakai tope ko enaa no. Inii owaajokaa wido kijamigiipage, ena ki aki ipuwe, ena ki Musa ipuwe, ena ki Elias ipuwe.” Kodeja okai wegaate mana kodo okai ewo.

³⁴Okai kou dani mana wegaatigo jabai kapagu ka eepumimakai. Jabai duba kijake okei weda gata.

³⁵Tijake jabai duba make mana wuu eteete mana, „Kii ke ani Joka didé, anija ewitokita kidi. Okai ejuwai to tai,” etii.

³⁶Mana wuu kodo wegajawijake Jesus kidi to edomakai. Okei gabo tojake edota mana kodo kou naagoudo kodo me idaana ma oowegai beu.

³⁷Aweetaa naago okei bagouda make mijo mejake me wedaba ma akado.

³⁸Me wedaba jupi make me idaana emeeme teete mana, „Ei, Kuduu, ani kadiimai ani joka naaedomakidou, anija enaago joka kidaa.

³⁹Enija ejakimakeigi kouja, tijake okai kou gaa kodo okai emeeme tai. Tijake enija ka juma duwajake etijake ebeida ukouko edidaa, daana gaagaa ma ejaikai.

⁴⁰Akija etope-taido jaemigimakai ediimipa kodeja, okei kaga,” etii.

⁴¹Tijake Jesus wo eteete mana, „Kowaa kei, maakodo te gajake akaije te-tai tuma! Uno magoo keetojake kojáá kidoutouta? Aki joka kidi aneepa oomei,” etii.

⁴²Ita meetigo gaa enija kodaa makiida nakuu etijawijake juma eduwajake-tai, kodeja Jesus kidaa enija kodo emoge etijake joka kidi beu jaawii, tijake nakameepa amo jajaikai.

⁴³Me utoma kede Ugatameja bida agijo kodo ego takuu-takuu timakai. Meido utoma okaija kei teete manaido maida make ego takuu-takuu umina teetigo, Jesus etope-taidoopa eteete mana.

⁴⁴„Kii mana kii ke ikiija gapa duba amoujo awii. Me Joka kidi me ka ganeida eekegajawiitai kouja,” etii.

⁴⁵Kodeja kou mana kodo okei gai beu, okeepa make boonidoke kouja, ewaa taoa te ke-tijake. Daana kou mana kodo egaado tai weda gai.

⁴⁶Okeija kegepa duba akaije mana ewaa kidaa tai; kou ko, okei jupi meime ibo mana kodo.

⁴⁷Okeija kegepa duba dimi kodo Jesus epi kijake, joka idaana ebukijake okai watija ejoonijawii.

⁴⁸Tijake eteete mana, „Meija joka kidi aneeka dubaiga ejakimakipi, okai najakimakai. Daana meija najakimakipi, nabadikumita me maija ejakimakai. Ikii jupi ka mijo daba kidi ki umina ibo kouja,” etii.

⁴⁹Tijake Jahja wo eteete mana, „Ei, Kuduu, me idaana akeeka ma enija emigimakeetigo inii edoomege. Daana inii beu etii, inii ma enaimo kaapei beu kouja.”

⁵⁰Kodeja Jesus eteete mana, „Ikii beu te etii. Akaije ti kitai bagee ikoogei kouja,” etii.

⁵¹Jesus epaawado ebukai putu duwaineega Jerusalim uwiine juma doodoo. Etigo-tai bagee tiga okaapa make ebadikumii.

⁵²Okei uwijake Samaria ka maki katouda woujo kijake unoona dani umidokiine tijake epeepi jatimakaine.

⁵³Kodeja meido kede ebukai beu, okai Jerusalim to juma doodoo kouja.

⁵⁴Etope-tai wija Jakub ma, Jahja ma kou kodo aadojake aeteete mana, „Ei, Tuhan, ide, mee? inii bodija epaawadoopa make mijouwaawijake kei bagee wei kogi etijawii,” aetai.

⁵⁵Kodeja Jesus wouga kijake okejai ewidogai.

⁵⁶Tijake okei maki katouda uwii.

⁵⁷Okei ita jaweetigo me idaana ka eteete mana, „Aki uwiitageida kaapeita,” etii.

⁵⁸Tijake Jesus eteete mana, „Jina mugu topai, daana bedo maija geka topai, kodeja me Joka migo wo makiiaida ma beu,” etii.

⁵⁹Me idaanaapa Jesusja „Naapei” etii. Kodeja me kidi eteete mana, „Najaikai, naitai oka emake-uwii tiga taine kadiimai,” etii.

⁶⁰Kodeja Jesus eteete mana, „Bokata bagee kodaa bokata bagee emake-tita jajaikai. Kodeja aki kidaa Ugatameja jakimakita makiida ka mana wudikume-uwii,” etii.

⁶¹Me idaana ma eteete mana, „Ani kaapeine kodeja anija uguwoopa kojáá tou ete-uwii tiga taine kojoka najaikai,” etii.

⁶²Kodeja Jesus eteete mana, „Meija maki utii agijo jakimakijake matokaato dopi ko, Ugatameja jakimakita makiida maida edou peu,” etii.