Read Galela JAHJA 13 Bible Online

JAHJA 13 - Galela bible

JAHJA 13

¹Wadouga etigajake petii tita ga-tou naago beu gaa kodaa Jesus kii makiida jaikaine jato, Nakameepa wado uwii putu kidoke gai. Kii makiida kiija okaija bagee ipa egajake kii kidi ipa ga-wo teete momogiida to.

²Wanee jato nootigo gaa Simon jokame Judas Iskariot kidi kegepa Teege ka gokoo atii, eekegajawiine tijake.

³Jesus epi Nakame kidaa utoma agijo utoma okaija gane duba menita, daana okai Ugatameepa make mejake Ugatameepa wado uwii.

⁴Okai nooteida make joonidoke tijake egaupita kagaba bejamotii; uwo wunai kagaba motijake okai má maida epijajawii.

⁵Uwaawe duba uwo no-awijake etope-taido kede bado jawitogai go-motii. Daana má maida epijajawita kagaba kodaa jawunai.

⁶Okai Simon Peterus kidiipa kijake Peterus eteete mana, „Ei, Tuhan, anija bado aki nawitogaije?” etii.

⁷Jesus wo eteete mana, „Anija kei teete agijo kodo ito aki gai beu, kodeja wadoutouga aki gamakaitage,” etii.

⁸Tijake Peterus wo eteete mana, „Umina maakodo anija bado te nawitogai,” etii. Jesus wo eteete mana, „Kou danite ani te kawitogipa ko, ani ma enaimo te kija,” etii.

⁹Tijake Simon Peterus eteete mana, „Ei, Tuhan, bado to ko beu, kodeja anija gane ma dagi ma,” etii.

¹⁰Jesus wo eteete mana, „Uwo buumita me kidi joko ka tine te witogijake bado to witogija, okai umina jimubeu kouja. Ikii maija jimubeu, kodeja ikii utoma ko beu,” etii.

¹¹Okai eekegajawita me kidi epi kouja. Okai kouja okai kou dani wegai, „Ikii utoma jimubeu ko beu.”

¹²Jesus kidaa etope-taido ka bado jawitogimakijake okaija kagaba egaupijawii. Okai animakijake eteete mana, „Anija kijakei keega kou ko ikii gaaga, mee?

¹³Ikii Kuduu, Tuhan, naabateiga, daana ikiija eneiga kou ko maakodo, ani ki okai kii kidi kijoka.

¹⁴Kou danite ani ki Tuhan ma, Kuduu ma kidija ikiija bado kijawitogipa ko, ikii maija bado akawitoge tija.

¹⁵Ani ikeepa komuga kineega kouja, ikii na kei te-tita, anija kijakei keega danite.

¹⁶Beu maa kou ani kitiine, jakei te-tai me idaana okaija ibo ma ko ibo ko beu, daana ebadikumita me maija okaija uwii etita me ma ko ibo ko beu.

¹⁷Kei agijoudo ikii epi kipa, ikii kei tijawipa ko ikii mobu kidaa.

¹⁸Ani ikii utoma maida make wegai ko beu. Anija ewitokita bagee ani epi kouja. Kodeja kapogeije ebijamakita mana kodo koba-tijake, kou ko: Anija goti nota me kidaa koba mani bida aweete.

¹⁹Ani kii mana kidi ito kitii, kei tidoke beu gaa. Kei tidoke tipa ko ani ki okai kidi kijoka ikii maakodo ga-tita.

²⁰Beu maa kou ani kitiine, meija anija ebadikumita me kidi ejakimakipi, okai najakimakai daana najakimakai me kidaa nabadikumita me kidi ejakimakai,” etii.

²¹Jesus kou dani wegajawijake okai kegepa gaagaa umina tijake eteete mana, „Beu maa kou ani kitiine, ikii jupi ka me idaana kiija naekegajawiipagi,” etii.

²²Etope-taido utoma kede akado wegene tai, meime maida make eneegi juwa gajake.

²³Jesusja etope-taido ka me idaana, kii ke Jesusja ei egata me kidi, Jesus etikaato gebo tawanita.

²⁴Simon Peterus kipo tutu etijake kii kidiipa eteete mana, „Egaado tidou, kii me kidi ki meime no?” etii.

²⁵Tijake okai Jesusja boko maida tawanijake eteete mana, „Ei, Tuhan, kii kidi ki meime?” etii.

²⁶Tijake Jesus eteete mana, „Okai kii kidi ki ani tineena tokami-meniipiga me ki.” Etijake okai tineena tokami-motijake Simon Iskariot jokame Judas kidiipa menii.

²⁷Judas kou tine kodo motijake okai duba Teege awidoke tai. Tijake Jesus eteete mana, „Akija kei taine agijo kodo egaa kei tai,” etii.

²⁸Kodeja enaimo noote bagee kede me idaana ma okaija etita mana boko jato kodo gai beu.

²⁹Me ino ka gai ko, Judas potó dokeigi kouja, Jesus okaapa eteete mana, „Ibo naago dijo doune tijake gai peu agijoudo needai,” juwa, daba bagee meniine tijake juwa, eteegi gai.

³⁰Judas kii tine kidi motijake okai egaa podomai. Okai kou gaa kodo wanee gaa.

³¹Judas podomijake Jesus eteete mana, „Ito ko Me Joka kidi ajiipi etijawidoke, daana Ugatame maija okai duba ajiipi etijawidoke.

³²Kou danite okai duba Ugatame ajiipi go-motipi ko, Ugatame akaato duba maija ajiipi etijawiipagi; beu maa, egaa kodaa ajiipi etijawiipagi.

³³Kowaa kei, ani jokaaneido, mijo gaa to ani keetoupiga. Ikii naubaita, tijake ani Jahudi bageepa eteetega danite, ito kou maija okai kou kitii, ’Ani uwiitaida ikii te jawimake’.

³⁴Ija mana mutoona ani kitimakai, kou ko, ikii kede ipa akaga tai. Anija ipa kigai danite, ikii kede ipa akaga tai.

³⁵Okai kou manaidaiga ikii anija kitope-tai kede me jokaija ka kigaitai, kou ko, ikii kede ipa akaga ti-toojogo ko,” etii.

³⁶Tijake Simon Peterus eteete mana, „Ei, Tuhan, aki kaija uwii?” Etijake Jesus joko eteete mana, „Anija uwiitaida aki ito ko te naapemake; kodeja wadoutouga aki naapeitage,” etii.

³⁷Tijake Peterus wo eteete mana, „Ei, Tuhan, magijo ka ito ani te kaapemake? Aki maida make ani bokai enaa,” etii.

³⁸Jesus eteete mana, „Ani maida make bokaije? Beu maa kou ani katii, ajam mana te taipiga, aki kigi wido beu puga nataipageida to,” etii.