Read Galela JAHJA 18 Bible Online

JAHJA 18 - Galela bible

JAHJA 18

¹Jesus kou mana wegajawijake etope-taido ma enaimo uwijake Kidron deego-deego uwo adii. Kouda kodaa tai pogaanaida Jesus ma etope-taido ma wadoujo kai.

²Kodeja eekegajawita me Judas kidi kouda kodaa epi, mijaato Jesus ma etope-taido ma kouda kodaa kotuu tei tita kouja.

³Tijake Judas kidaa serdado imoona oomei, imam iboudo ma Parisi bagee ka ma ebadikumita meido ma enaimo; lampu ma, pito ma, me nokoge-tai woja ma dokijake mei.

⁴Jesus okai maida makeeniipiga manaido epi kouja okei ma akado taine uwijake eteete mana, „Ikii meime eubaate?” etii.

⁵Tijake okei joko eteete mana, „Jesus, Nazaret ka me kidi,” etii. Tijake Jesus eteete mana, „Ani kijoka,” etii. Eekegajawita me Judas kidi maija okei wa enaimo joonidoke ti-toojogo.

⁶Jesusja, „Ani kijoka” etita gaa kodaa okei tokii tidaa tijake makiida apaipu tidaa tai.

⁷Tijake Jesus wijaago eteete mana, „Ikii meime eubaate?” Etijake okei joko eteete mana, „Jesus, Nazaret ka me kidi,” etii.

⁸Tijake Jesus wo eteete mana, „Ani kijoka kiteega kodo. Okai kouja ikii naubaate keetigo ko, kei meido kei uwe-tita naaejaikei,” etii.

⁹Kou dani okaija wegata mana muto kodo kobadoke te-tita, kou ko: Akija naimeetege bageido me idaana ma igai beu wegata mana kodo.

¹⁰Tijake Simon Peterus kataana jago me kidaa juwi-motijake Ibo Imam jakei te-tai me wagijake etikaato gapa jaduwajawii. Kei te-tai me kidi eka ki Malchus.

¹¹Tijake Jesus Peteruspa eteete mana, „Akija kataana kodo awijawii. Naitaija naimita uwaawe kodo ani te naija, mee?” etii.

¹²Tijake serdado imo ma, migougu makii me ma, Jahudi ka ebadikumita bagee ma Jesus ejakijake egadimai.

¹³Edoga kidi Hannapa ouwii, okai Kajafas baakame kouja, kou taun ka Ibo Imam kidi.

¹⁴Kajafas kidaa Jahudi bageepa mana etita me kidi, me idaana kou bagee komoka jaawii bokai enaa mana kodo.

¹⁵Simon Peterus ma, joko ka etope-tai me idaana ma Jesus aepei. Joko ka etope-tai me kidi Ibo Imam kidaa epi; okai Jesus ma enaimo Ibo Imam ka owaa edaage wadoujo kai.

¹⁶Kodeja Peterus juwouda make damoutoopa kodaa joonidoke tai. Tijake joko ka etope-tai me Ibo Imam epi me kidi podomijake damoutoopa douto-tai api kodo ma mana aawegajake Peterus woujo ookai.

¹⁷Damoutoopa douto-tai api kodaa Peteruspa eteete mana, „Beu, mee? aki maija me kiija kitope-tai me idaana kidi,” etii. Tijake Peterus „Beu,” etii

¹⁸Kouda kodaa jakei te-tai bagee ma douto-tai bagee ma kemoo bodija dagumijake oo uwa kouja ootogeete joonidaa titoojogo. Peterus maija okei wa enaimo joonidoke tijake ootogeetigo.

¹⁹Ibo Imam kidaa Jesus etope-taido maida make ma, etopita mana muto maida make ma egaado tai.

²⁰Tijake Jesus wo eteete mana, „Ani ewaa tapa makiida maki utomaapa mana oowegai teemega; ani sembahjang owaa duba ma, Ugatameja owaa duba ma etopei teemega, Jahudi bagee kotuu teigaida kodaa; tumaana agijo ma ani gabo wegai beu.

²¹Magijo ka aki nagaado keege? Najuweigai bageepa anija eteiga mana kodo egaado tai. Anija eteiga mana kodo okei epi kojoka,” etii.

²²Okai kou etijake kouda kodaa joonipi ka douto-tai me idaana kidaa ganaatabe wageete mana, „Aki kou dani tijake Ibo Imam kidi wo etija, mee?” etii.

²³Tijake Jesus wo eteete mana, „Kou danite anija wegaaga mana kodo peu kipa ko, peu kodo enii to tai; kodeja kou danite maakodo kipa ko, magijo ka ganaatabe nateege?” etii.

²⁴Tijake Hannaja Jesus egadimita kidi Ibo Imam Kajafas kidiipa ebadikumii.

²⁵Simon Peterus ootogeete jooni-toojogo gaa. Tijake me ka okaapa eteete mana, „Beu, mee? aki maija okaija kitope-tai me idaana kidi ki,” etii. Okai beu puga eteete mana, „Ani ki beu,” etii.

²⁶Tijake Ibo Imam jakei te-tai me idaana, kii ke Peterus gapa jaduwajawita me kidi kenekame kidaa egaado teete mana, „Beu, mee? taida okai ma enaimo kadopa kidi ki,” etii.

²⁷Tijake Peterus kigeena ma beu puga etijake okai kou gaa kodo ajam mana tai.

²⁸Tijake okei Jesus kidi Kajafas jumaapa make Gubernur owaapa ouwii, abata gaa. Jahudi bagee kede boko peta-tai owaa duba wadoujo kai beu, okei dá beebu te te-tijake, wadouga etigajake petii tita ga-tou naago naine tijake.

²⁹Okai kouja Pilatus podomijake okeepa eteete mana, „Má mana kii me kidi maida ijeije etai?” etii.

³⁰Tijake okei amo eteete mana, „Me kidi peu beu me naako inii akeepa te kaaekegajawi-toja,” etii.

³¹Tijake Pilatus eteete mana, „Ikii kede ouwijake ikiija ka dijo douja manaidaiga boko japetai,” etii. Tijake Jahudi bagee eteete mana, „Me wagimakai mana inii maida tou beu,” etii.

³²Jesusja bokai mana muto etita kodo koba-tijake wegata.

³³Pilatus boko peta-tai owaa duba wadoujo kijake Jesus manaa-tijake egaado teete mana, „Aki ki Jahudi ejakimake-tai me kidi, mee?” etii.

³⁴Tijake Jesus wo eteete mana, „Kii mana kii ke aki kidaa to eneege, mee? me ino ka ani maida make katipai,” etii.

³⁵Tijake Pilatus eteete mana, „Ani ki Jahudi ka me, mee? Aki tuma kodaa, daana imam iboudo keija aki aneepa kaakegajaweegai. Aki magijo kei teemege?” etii.

³⁶Jesus wo eteete mana, „Anija jakimakita maki kou ko kii makiida kiija ki beu. Kou danite anija jakimakita maki kou ko kii makiida kiija naako, nakei te-tai bagee kedaa jape maki-toja, Jahudi bageepa te naakegajawe-tijake. Kodeja ito kou anija jakimakita maki kodo jakai kiija make ko beu,” etii.

³⁷Tijake Pilatus eteete mana, „Aki ki jakimake-tai me idaana, mee?” Etijake Jesus wo eteete mana, „Maakidi akaa eneege dani, ani ki jakimake-tai me idaana. Okai kou maida make ani napamakita, daana okai kou maida kouja ani makiida meta, ani maakodo bokouto mana jawegaine tijake. Maakodo bokouto maida ka bagee utoma kede anija mana najuwe-tai,” etii.

³⁸Tijake Pilatus wo eteete mana, „Maakodo bokouto kodo ko kawo ko?” Etijake okai Jahudi bageepa podomijake eteete mana, „Ani peu tumaana ma okai duba jadomakai beu keega.

³⁹Kodeja ikiitodo topa, wadouga etigajake petii tita ga-tou naago kodaa ani me idaana kijajaikeiga. Jahudi ejakimake-tai me kidi kijajaikai ide, mee?” etii.

⁴⁰Tijake okei emeeme teete mana, „Okai ki beu, kidija Barabbas kidi.” Barabbas kidi moonaa tei tita me idaana kidi.