Read Galela JAHJA 19 Bible Online

JAHJA 19 - Galela bible

JAHJA 19

¹Tijake Pilatus kidaa Jesus ouwijake godijai etai.

²Serdado kede dogo buda bubukajake dagi maida kobeigido makita jatijawii, daana digijo kagaba jamakijawii.

³Tijake okaapa mejake eteete mana, „Ei, Jahudi ejakimaketai Ibo kidi!” Etijake ganaatabe wagigoo tai.

⁴Pilatus kigeena ma podomijake Jahudi bageepa eteete mana, „Edododou, ani ikeepa oopodomeega, ani okai duba peu tumaana ma jadomakai beu keega ko ikii epi ke-tijake,” etii.

⁵Tijake Jesus podomai, dogo dagi maida ma, digijo kagaba ma maki-toojogo. Tijake Pilatus meido kodoopa eteete mana, „Edodowei, Me kidi,” etii.

⁶Imam iboudo ma, ebadikumita bageido ma edojake emeeme teete mana, „Pija boko maida edajawii! Pija boko maida edajawii!” Emeeme tijake Pilatus okeepa eteete mana, „Ikii kedaa ouwijake pija boko maida edajawii. Ani peu tumaana ma okai maida jadomakai beu keega ka,” etii.

⁷Jahudi bagee wo eteete mana, „Ineepa mana mutoona topa, daana kou mana muto maida make okai bokai beu kai peu, okai akaato ani ki Ugatame Joka kidi wegai kouja,” etii.

⁸Kou mana muto kodo Pilatus juwijake euga weda gai.

⁹Kigeena ma boko petai-tai owaapa wadoujo kijake Jesuspa eteete mana, „Aki ki kaija make?” etii. Kodeja Jesus mana wo etii beu.

¹⁰Tijake Pilatus eteete mana, „Aki mana enii beu, mee? Aki ki ewo, mee? anija kapipikajawii ga-toojogo kapipikajawii to, daana pija boko maida kadajawii ga-toojogo kadajawii to ko,” etii.

¹¹Tijake Jesus wo eteete mana, „Waiko make te kani-toojogo ko aki ki ani maida bida ena ma beu. Okai kouja akeepa naakegajaweegi me kidi peu ko euga ibo kodo,” etii.

¹²Okai kouda kodaa make wado Pilatus epipikajawiine dimi ubai; kodeja Jahudi bagee kedaa kuutaka emeeme teete mana, „Kou danite aki kii me kidi epipikajawipe ko, aki Kaisar ogeme ki beu. Meija akaato jakimake-tai me awipi, okai Kaisar akaije ooteete me kidi,” etii.

¹³Kou mana Pilatus juwijake okai Jesus oopodomai. Okai boko peta-tai animakaida animakai, mogo ka ageida kodaa, Iberani manaidaiga ko Gabata ebatita.

¹⁴Okai kou naago kodo wadouga etigajake petii tita ga-tou naago epeepi timakai naago kodaa, dagi epouda gaa. Pilatus Jahudi bageepa eteete mana, „Edodowei, kijakimake-tai me kidi.”

¹⁵Tijake okei emeeme teete mana, „Eigajawii! eigajawii! pija boko maida edajawii!” Pilatus wo eteete mana, „Kijakimaketai me kidi ani pija boko maida edajawii, mee?” etii. Imam iboudo kedaa wo eteete mana, „Joko ka nijakimake-tai me idaana ma beu topi, Kaisar kidaa to,” etii.

¹⁶Tijake Pilatusja Jesus jaekegajawii, pija boko maida edajawetijake.

¹⁷Okei Jesus kidi ouwii; okai podomijake okai kidaa pija boko dokijake Dagi Mitoo Kotuuda doodouga uwii, Iberani manaidaiga Golgota ebatijawitaida kodaa.

¹⁸Okai kouda kodaa okei Jesus kidi pija boko maida edajawii. Okai aito amouto me ida wija maija, kodeja Jesus kidi jupiida kodaa.

¹⁹Tijake Pilatusja ebijaabija mana pija boko momogiida kodaa makijawii, kii dani ebijamakita mana kodo: „Jesus, Nazaret ka me kidi, Jahudi ejakimake-tai me.”

²⁰Kou ebijaabija kodo Jahudi bagee me wedaba ebatai, Jesus edajawitaida ko maki kapauto kouja. Kou ebijaabija kodo Iberani ma, Rum ma, Gerika ma manaidaiga ebijata.

²¹Tijake Jahudi ka imam iboudo kedaa Pilatuspa eteete mana, „’Jahudi ejakimake-tai me’ mana kodo te ebijai; kodeja ’Me kidaa mana ko, ani ki Jahudi ejakimake-tai me’ ebijai,” etii.

²²Tijake Pilatus wo eteete mana, „Anija ebijamakeega mana kou ko ebijadoke tou to,” etii.

²³Serdado kedaa Jesus edajawijake okaija kagaba jamotijake kotuu wii wudijawii, serdado kede me gakita, daana okaija egaupe-tai kagaba kodo maija; kodeja egaupe-tai kagaba kodo puumai beu tita, kodeja kou kodo waiko make wako to ginita.

²⁴Tijake okei kede wegaate mana, „Te neekigibijawijake inii tipa po momogo neetei, okai maida epogomaipagi me kidi motetijake.” Ugata kapogeije kodo koba-tita, kii dani: Okei anija kagaba wudijawita, daana anija egaupe-tai kagaba maida maija okei tipa po momogo tita. Kou dani tijake serdado kedaa kei tita.

²⁵Jesusja pija boko kapauto kodaa ukame ma, ijoobome Marjam ma, kou ko Keleopas jagamome kodo, daana Marjam Magdalena ma joonidaa ti-toojogo.

²⁶Jesus ukame ma ei egata etope-tai kidi ma kapauto aajoonidaa ti-toojogo edojake, ukameepa eteete mana, „Ei, jagamo, aki joka kidi edododou,” etii.

²⁷Tijake etope-tai kidiipa eteete mana, „Edododou, akuukai kodo,” etii. Okai kou gaa kodaa make etope-tai kidaa okaija owaa duba ebukai.

²⁸Wadoutouga utoma agijo utoma tiki keega Jesus gajake ugata kapogeije kodo koba-tijake wegaate mana, „Ani uwo naidi.”

²⁹Kouda kodaa enege utaadijo awita tapuja tojake oobaa duba me ka wagaawii. Mome dani momogiida juku atijake Jesus ebeepa wado menii.

³⁰Jesus enege utaadijo kodo nojake kei teete mana, „Tiki.” Tijake dagi jato mijouga awijake dimi mana kodo wado ekegajawii.

³¹Kou naago kodo epeepi tai naago kouja, má jato pija boko maida Sabbat naago te to-tijake na kidi, (kou naago kodo ibo Sabbat naago kouja,) Jahudi bagee kede Pilatuspa mejake okeija toko mitoo jatuwajake-tai ediimai, daana má jato mijouwe eewiine tijake.

³²Tijake serdado kede mejake edoga ka me kidaa toko mitoo jatuwajake-tai, daana joko ka me kidi maija, Jesus ma enaimo edajawita meija kede.

³³Kodeja Jesuspa mejake okai boka-toojogo edojake toko mitoo jatuwajake-tai beu.

³⁴Kodeja serdado idaana kidaa pute woja ka Jesusja gebo jato enokogi-motii; tijake okai kou gaa kodaa uwo ma emo ma waino tai.

³⁵Edota me kidaa mana jawegai, daana okaija jawegata mana kodo maakodo. Daana okai epi okai maakodo mana wegai, ikii na maakodo ga-tita.

³⁶Kou agijoudo kei tidoke tita, ugata kapogeije kodo kobadoke te-tita: Okaija mitoo ko ena ma te jatuwajawiitai mana kodo.

³⁷Daana ugata kapogeije ka joko ka mana maija: Okei edomakaitai, okeija ka enokogita me kidi.

³⁸Kou wadoutouga Arimatea ka me idaana Jusuf kidi, (okai maija Jesus etope-tai me idaana, kodeja gabo dubaiga, Jahudi bagee weda egajake kouja,) okai Pilatuspa Jesusja má jato mijouwe eewiine tijake ediimigou. Pilatus enaa etijake okai Jesusja má jato kodo motigou.

³⁹Dedaana Nikodemus maija, (tika wanee jato Jesuspa meta me kidi,) mejake takabaka tita unu enaa agijo tuma wija, mur ma gaharu ma dokii, udo ko me ida wija ka dokija dani.

⁴⁰Okei Jesusja má jato motijake enaa kagaba ma unu enaa agijo ka ma etonimakai, Jahudi bagee ka okeitodo emakija dani tijake.

⁴¹Jesus pija boko maida edajawitaida kodaa táí pogaana toojo; kouda kodaa ija ka me oka kodo me idaana ma emakai beu titaida.

⁴²Jahudi bagee ka epeepi tai naago kouja, daana me oka kodo kapauto kouja, okai kouda kodaa okei Jesus emakijawii.