Read Galela JAHJA 21 Bible Online

JAHJA 21 - Galela bible

JAHJA 21

¹Kou wadoutouga Jesus Tiberias pekuuda etope-taidoopa kigeena ma ewaa kita. Okai kii dani tijake ewaa kita.

²Kouda kodaa Simon Peterus ma, Didimus eebatita me Tomas kidi ma, Galilea dokoo Kana makijo ka me Natanael kidi ma, Zabdi jokaija ma, joko ka etope-tai wija ma enaimo toojogo.

³Tijake Simon Peterus eteete mana, „Ani binei muga-uwiine,” etijake joko kaido eteete mana, „Inii uwipage,” etii. Okei uwijake koma matakai. Okai kou uno kodo ena ma mugai beu.

⁴Awe digii kijake Jesus peku watija joonidoke tai. Kodeja Jesus kidi ki etope-taido kedaa egai beu tita.

⁵Tijake Jesus eteete mana, „Ani jokaaneido, binei topai, mee?” etijake okeija „Beu,” etii.

⁶Tijake Jesus eteete mana, „Koma etikaatouga ikiija ka ebai kodo mijaawii, ikii mugaipiga no!” etii. Tijake okei ebai mijaawijake binei wedaba awidaa kouja ebai kodo wado gou kagaa-kagaa.

⁷Jesusja ei egata etope-tai me kidaa Peteruspa eteete mana, „Kii ke Tuhan kidi,” etii. Kii ke Tuhan kidi mana kodo Simon Peterus juwijake okaija kagaba egaupijawii; kagaba beu kouja, tijake okai uwo maida gopuu tai.

⁸Kodeja joko ka etope-taido kede komaidaiga mei, adaida make poto ko beu, gepe watija kouja. Binei ka ebetume ebai kodo okei amo gou.

⁹Okei adaida wadouwe kijake kemoo bodija domakai, daana kou maida binei ma goti ma odi-toojogo.

¹⁰Tijake Jesus eteete mana, „Ikiija ito kou mugaaga binei ida wija dani doke-mewei,” etii.

¹¹Tijake Simon Peterus kidi komaageida wadouwe kijake ebai kodo adaida wado gou, binei ka ebetume; kou ko, wido ma jokagaati ka wido. Umina wedaba kodeja ebai kodo kigibidaa beu.

¹²Tijake Jesus eteete mana, „Nai no! mewei,” etii. Etope-taido kede me idaana ma „Aki ki meime?” egaado tai uu beu; Tuhan kidi ki okei epi kouja.

¹³Jesus mejake goti kodo motijake jawudii; daana binei kede maija.

¹⁴Kii ke kigi widaagouda Jesus kidi etope-taidoopa ewaa kita, okai bokata bagee jupi make anigojake wadouto.

¹⁵Okei nojake Jesus kidaa Simon Peteruspa eteete mana, „Ei, Simon, Jahjaja joka, kei joko kaido kei ma ko aki ki euga ei nagai, mee?” etii. Tijake Peterus wo eteete mana, „Ei, Tuhan, aki epi ani ki ei kagai,” etii. Tijake Jesus wo eteete mana, „Anija domba jokaido naaemunai,” etii.

¹⁶Okai kigi wijaago eteete mana, „Ei, Simon, Jahjaja joka, aki ei nagai, mee?” Etijake Peterus wo eteete mana, „Ei, Tuhan, ani ei kagai ko aki epi.” Etijake Jesus wo eteete mana, „Anija dombaido naaootou,” etii.

¹⁷Tijake okai kigi widaago wo eteete mana, „Ei, Simon, Jahjaja joka, aki ei nagai, mee?” Etijake Peterus gaagaa; kigi wido „Aki ei nagai, mee?” egaado tijake kouja. Tijake Peterus wo eteete mana, „Ei, Tuhan, utoma agijo utoma aki epi; ani ei kagai ko aki epi.” Etijake Jesus wo eteete mana, „Anija dombaido kede naaemunai.

¹⁸Beu maa kou ani katiine, aki jokaida gaa aki kidaa piti gadimijawijake akija dimi gaijaidaiga uwita; kodeja aki adama kipe ko, aki gane mapido tijawijake joko ka bagee ka piti kaagadimijawijake aki be gaidaapa kodaa kadoke-uwiitai,” etii.

¹⁹Kou dani etita, Peterus bokaitagi mana maida make Ugatame ajiipi etijawiitagi mana etita. Kii etijake okai Peteruspa „Naapei,” etii.

²⁰Peterus wouga kijake Jesus ei egata etope-tai me kidi eepeete edou. Okai kidi ki wanee jato nota gaa Jesus boko maida tawanijake tota me kidi, daana mana eteete ko, „Ei, Tuhan, meija kaakegajawiipagi no?” etita me kidi.

²¹Peterus etope-tai me kidi edojake Jesuspa eteete mana, „Ei, Tuhan, me kii ke kawe dani no?” etii.

²²Tijake Jesus wo eteete mana, „Kii me kidi ani meitaida to to-tai gapa ko, aki ma mana kato, mee? Aki ki naapei to tai,” etii.

²³Kou wadoutouga etope-tai me kidi te bokaitagi mana kodo enakeneka bagee jupi ugo uwidoke tita. Kodeja Jesus kou dani mana etii ko beu, etope-tai kidi te bokaitagi mana etii no te, kodeja „Ani meitaida to to-tai gapa ko, aki ma mana kato, mee?” etita mana kodo.

²⁴Kii ka etope-tai kidaa kei manaido utoma wegata; daana kei manaido utoma kapogeije ebijamakita. Daana okaija wegata mana kodo maakodo mana inii epi.

²⁵Joko ka agijoudo wedaba Jesus kei tita; okaija kei titaido utoma kapogeije ebijamaki-toojogo ko, anija gai ko, utoma kapogeije ebijamakitaido kodo makijawii ko makiida maki utoma te tiki.