Read Galela JAHJA 3 Bible Online

JAHJA 3 - Galela bible

JAHJA 3

¹Parisi ka me idaana eka ki Nikodemus kidi Jahudi ka ibo idaana.

²Okai wanee jato Jesuspa mejake eteete mana, „Ei, Kuduu, inii epi aki ki Ugatameepa make meta ka kuduu kidi. Me idaana ma ego takuu-takuu agijoudo te kei timake, akija kei teige danite, Ugatame kidi okai ma enaimo beu ki-toojogo ko,” etii.

³Tijake Jesus wo eteete mana, „Beu maa kou ani katiine, kou danite me idaana wijaago ma te epamakipi ko, Ugatameja jakimakita makiida te domake,” etii.

⁴Tijake Nikodemus wo eteete mana, „Kawe dani tijake me idaana ibo kijake epamakija? Okai kigi wijaago ukame ka modo duba amoujo kijake epamakija, mee?” etii.

⁵Tijake Jesus wo eteete mana, „Beu maa kou ani katiine, kou danite me idaana uwo ma Roh ma ka te epamakipi, okai Ugatameja jakimakita makiida wadoujo te kimake.

⁶Má jato ka pata agijo ko má jato kodo, daana Roh ka pata agijo ko Roh kodo ko.

⁷Aki ego takuu-takuu te tai, wijaago ma pamakai beu kai peu kateega mana maida make ko.

⁸Ukija pupugu tijake okaija gaijaidaiga uwija, daana aki nemugu to juwii, kodeja kaijaiga meegi, kaijaiga uweegi ko aki ki ewo. Roh ka pamakita bagee maija okai kou dani,” etii.

⁹Tijake Nikodemus eteete mana, „Kawe dani tijake kei manaido ewaa kija?” etii.

¹⁰Tijake Jesus eteete mana, „Aki ki Israil bagee ka kuduu kidi, daana kei mana kei gai beu, mee?

¹¹Beu maa kou ani katiine, inii epi agijo kodo inii wegai. Iniija ka domakita agijo kodo inii pikai. Kodeja iniija ka pikata mana kodo ikii jakimakai beu.

¹²Kou danite makiida ka agijoudo kei katijake aki maakodo te nagape ko, kawe dani tijake maakodo nagamake, epa maida ka agijoudo katipa ko?

¹³Me idaana ma beu waiko epaawado uwita, kodeja epaawado make mijo meta me kidi to, kii ke Me Joka kidi.

¹⁴Musaja gei tapa make ugenija wadouwaawita danite Me Joka maija wadouwaawii beu kai peu;

¹⁵meija maakodo egapi okai duba ajii tai imo to togoo te-tita no te.”

¹⁶Kii dani Ugatame makiida maki utoma umina ipa nigajake kouja okaija enaago Joka mijo niimita. Meija maakodo egapi peu te kijake ajii tai imo to togoo te-tita no te.

¹⁷Ugatameja Joka makiida ebadikumita kou ko makiida maki utoma peu eewiine ko beu, kodeja makiida maki utoma ajii ti-meniine tijake.

¹⁸Meija maakodo egapi, peu eewii beu tita, kodeja meija maakodo te egapi, maakidi, peu eewita, Ugatameja enaago Joka Eka kodo maakodo egai beu kouja.

¹⁹Kii ke peu eewija mana ki, aweida kidi makiida meta, kodeja me tuma ko bunita kidi to ide gai, okeija ka kei titaido ko peu to kouja.

²⁰Meija peu kei tipi aweida kidi ki be gai, daana aweidaapa te mei, okaija kei te-taido kegei-kegei te jate-tijake.

²¹Kodeja enaa kei te-tai bagee kede aweidaapa mei, okeija kei titaido Ugatame duba kei tita kodo ewaa tapa ke-tita.

²²Wadoutouga Jesus kidi etope-taido ma enaimo Judea dokoo uwii. Kouda kodaa okei wa enaimo tojake me baptis etai.

²³Jahja maija Ainun makijo Salim maki kapauto me baptis eti-toojogo, kouda kodaa uwo wedaba kouja. Me mejake okai baptis etai.

²⁴Okai kou gaa kodo Jahja wanee owaa duba amaawii beu gaa kouja.

²⁵Jahjaja etope-tai ma; Jahudi me idaana ma akaije akaate tai, okeitodo witogija mana muto maida make.

²⁶Tijake okei Jahjaapa mejake eteete mana, „Ei, Kuduu, Jarden onee auwe aki ma enaimo aateetega me kidi, akija jawegaatege me kidi, okai na meido baptis eteete, daana me utoma okaapa uweete,” etii.

²⁷Tijake Jahja wo eteete mana, „Me idaana ma tumaana agijo ma te go-motija, kou danite epaawado make te meni-toojogo ko.

²⁸Ikii kede gai, ani Keristus kidi ki beu kiteetega kodaa. Kodeja okai jumaapa ani tiga nabadikumita me kidi.

²⁹Waka bukipi me kidi ki wakaago me kidi. Kodeja waka bukipi me kidi ogeme kidaa joonidoke tijake ejuwijake ko umina ideide timakai, waka ebukipi me kidi mana wuu ejuwijake kouja. Kojoka anija ideide kodo boko duwadoke keega.

³⁰Okai ki wado etige ke-wo beu kai peu, kodeja ani ki mijo daba ke-wo enaa.”

³¹Waiko make mijo meta me kidi utoma agijo utoma wado etige me. Makiida ka me kidi makiida ipuwe, daana makiida ka mana wegai. Kodeja epaawadoopa make mijo meta me kidi utoma agijo utoma wado etige me.

³²Okaija dou ma, juwii ma tita agijoudo mana wegai, kodeja me idaana ma okaija mana jajakimakai beu.

³³Meija okaija mana jakimakipi, Ugatame kidi maakodo no! epaapa timakai.

³⁴Ugatameja ebadikumita Me kidaa Ugatameja mana wegatai. Ugatameja Roh kodo te ebijadojake menita kouja.

³⁵Nakame kidaa Jokame kidi juma doodoo etai, daana utoma agijo utoma okaija gane duba jaekegajawita.

³⁶Meija Joka kidi maakodo egapi, ajii tai imo to togoo. Kodeja meija Joka ki te ejuwipi, ajii tai pijaije te dojake Ugatameja emoge dimi kumi dimi okaija dagimouda tou to.