Read Galela JAHJA 8 Bible Online

JAHJA 8 - Galela bible

JAHJA 8

²Abata didéé okai Ugatameja owaapa wo uwii. Me utoma okaapa mejake okai animakijake etopai.

³Kapogeije epi bagee ma, Parisi bagee ma ka jagamo idaana mogai teetigo ejakimakijake oomei, tijake me jupiida ejoonijawii.

⁴Okei Jesuspa eteete mana, „Ei, Kuduu, kou jagamo kou mogai te-teigaida edomakipe.

⁵Dijo douja manaida kodaa Musaja enimakita, kou dani tija jagamo ko mogo ka wagija. Akija gai ko kawe dani?” etii.

⁶Okei kii mana ki wegai, egaado taine tijake, peu eewiine dimi gajake. Kodeja Jesus mijouga kijake maki maida kipo ka ebijaabija tai.

⁷Tijake okei te duwajake egaado-gaado tai kouja, Jesus joonidoke tijake eteete mana, „Ikii jupi ka peu beu me kidi tiga mogo ka wagii,” etii.

⁸Tijake okai kigeena ma mijouga kijake maki maida ebijaabija tai.

⁹Okei kou mana juwijake me idaana tiga me idaana tiga podomai; me iboudo tiga podomijake muumai tijawii. Tijake Jesus kidi to tojake daana jagamo kodo maija okai jumaapa jooni-toojogo.

¹⁰Jesus wado dojake okai me idaana ma edou beu, kodeja jagamo kodo to. Okai eteete mana, „Ei, jagamo, okei kaija? Me idaana ka ma peu kaawii beu, mee?” etii.

¹¹Tijake jagamo kodaa joko eteete mana, „Me idaana ma beu, Kuduu,” etii. Tijake Jesus wo eteete mana, „Keetigo ani maija peu te kaawiipiga. Ito ko uwijake ito make wado peu te kei tai,” etii.

¹²Kigeena ma Jesus mana oowegajake eteete mana, „Ani ki makiida ka aweida kodo. Meija ani naapepi bunita dubaiga te uwiitagi, kodeja gei tai aweida kodo go-motiitagi,” etii.

¹³Tijake Parisi bagee eteete mana, „Aki akaato mana wegai. Akija wegaate mana kou ko maa mana ko beu,” etii.

¹⁴Tijake Jesus eteete mana, „Kou danite ani akaato mana wegapa maija, anija wegapa mana kodo maakodo. Anija metaida ma anija uwiitaida ma ani epi kouja. Kodeja ikii ke anija metaida ma anija uwiitaida ma ewo.

¹⁵Ikii me tuma ka gaijaidaiga boko petai. Ani me idaana ma boko petai beu.

¹⁶Kodeja kou danite ani boko petapa ko, anija boko petaja mana muto kodo maakodo. Ani kidaa to ko beu, kodeja nabadikumita Naitai kidi ma enaimo.

¹⁷Ikiija dijo douja mana duba ebijamakita, me ida wija ka mana kou ko maakodo mana.

¹⁸Ani ki ani akaato mana wegai, daana nabadikumita Naitai maija ani maida make mana naawegai,” etii.

¹⁹Tijake okei eteete mana, „Akaitai kidi kaija?” etii. Tijake Jesus wo eteete mana, „Ani kii ke ikii ewo, daana Naitai maija ikii ewo. Kou danite ikii ani ki epi naako, Naitai maija ikii epi kija,” etii.

²⁰Kei manaido Ugatameja owaa duba mege awe-tai tapuja watija make etopai. Tijake me idaana ka ma ejakimakai beu, okaija putu tiki beu kouja.

²¹Kigeena ma okai mana oowegaate mana, „Ani kidi uwijake ikii naubaita, daana ikii ke ikiija peu duba bokaita, kodeja anija uwiitaida ko ikii dakii te timake,” etii.

²²Tijake Jahudi bagee ka eteete mana, „Okai akaato wagimakaine, mee? ’Anija uwiitaida ikii dakii te timake’ eneegi kou ko,” wegai.

²³Tijake Jesus wo eteete mana, „Ikii ke wako make. Kodeja ani ki waiko make. Ikii ke kii makiida kiija make. Ani ki makiida make ko beu.

²⁴Okai kouja ani kiteega, ikiija peu duba bokaita. Kou danite ani kii ke okai kii kidi ikii te nagapa ko, ikiija peu duba bokaita,” etii.

²⁵Tijake okei eteete mana, „Aki ki meime?” Etijake Jesus eteete mana, „Magijo taine kitii?

²⁶Mana wedaba ikii maida make kijawegaine daana boko kijaduwajawiine. Kodeja nabadikumita me kidi maakidi. Ani okaapa make juwii mana, okai kou kodo makiida maki utomaapa ani eti-menii,” etii.

²⁷Tijake okei gai beu okaija etita mana kodo Enatobapa maida make ko.

²⁸Okai kouja Jesus eteete mana, „Ikii Me Joka kidi wadouwaawipa to ani ki okai kidi ikii nagaita. Daana anija dimiidaiga to tumaana ma te kei tija, kodeja Naitai natopita danite kei agijoudo ani wegai.

²⁹Nabadikumita me kidi ki ani ma enaimo. Naitai kidaa ani to te najaikai, okai juma dege-dege natijawii agijo ani kei te-tai kouja,” etii.

³⁰Okai kou mana wegajake me wedaba maakodo egai.

³¹Tijake Jahudi ka maakodo egata bagee kedeepa Jesus eteete mana, „Kou danite anija mana ikii bida peu jakimakipa to, beu maa kou, ikii anija kitope-tai kai.

³²Ikii maakodo bokouto epi kaita, daana maakodo bokouto kodaa kipipikajawiita,” etii.

³³Tijake okei eteete mana, „Inii ke Ibrahimja nikebata, daana inii me idaanaapa ma jakei te-tijake nijakimakai ko beu. Akaa ’kipipikajawiita’ eneege kou ko kawe dani na ko?” etii.

³⁴Tijake Jesus wo eteete mana, „Beu maa kou ani kitiine, meija peu agijo kei te-tai kipi okai peu kei te-tijake ejakimakita me.

³⁵Jakei te-tijake ejakimakita me kidi owaa duba umina te toja, kodeja joka kidi to umina owaa duba toja.

³⁶Kou danite Joka kidaa kipipikajawipi to, ikii maakodo pipikadaa.

³⁷Ani epi ikii Ibrahimja kikebata. Kodeja ikii nagiine dimi gai, anija mana ikiija kegepa duba amoujo kai beu kouja.

³⁸Ani Naitaipa dojake agijoudo wegai. Daana ikii maija ikiitaipa juwijake kei teiga,” etii.

³⁹Tijake okei joko eteete mana, „Ibrahim kidi iniitai.” Etijake Jesus wo eteete mana, „Kou danite ikii Ibrahim jokaane naako, Ibrahimja kei tita dani ikii maija kei ti-toja kodaa.

⁴⁰Kodeja ito kii nagiine dimi, ani kidi maakodo agijo Ugatameepa make juwijake kitita me kidi. Kii ke Ibrahimja kei tai beu.

⁴¹Ikii kede ikiitaija kei tita agijo kei tai,” etii. Tijake okei eteete mana, „Inii mogai ka ewaa neewii beu. Iniitai ki Ena to, kii ke Ugatame kidi,” etii.

⁴²Tijake Jesus eteete mana, „Kou danite Ugatame ikiitai naako, ikii ani ki ei nagaja. Ani Ugatameepa make mejake topa kouja, daana anija dimiidaiga to mei ko beu, kodeja okaija nabadikumita.

⁴³Magijo ka anija wegaaga mana ikii gai beu? Maakidi, anija mana muto ikii juwii beu kouja.

⁴⁴Ikii ke ikiitai Teege kidiipa make, daana ikiitaija peu dimi gaijaido kodo ikii eepei to. Okai tika kodaa make me wagimaketai me, daana maakodo bokouto jakimakai beu, maakodo bokouto okai duba beu kouja. Kou danite okai puja mana wegapi ko, okaija ijeidaiga wega-tai; okai puja mana wega-tai kouja, daana puja bokouto jago me kidi.

⁴⁵Kodeja ani ki maakodo mana keewegai kouja ikii maakodo nagai beu.

⁴⁶Ikii jupi meija peu maida make ijeije natija? Kou danite ani maakodo mana wegapa ko, magijo ka ikii maakodo nagai beu?

⁴⁷Ugatameepa make meta me kidaa Ugatameja mana juwe-tai. Okai kouja ikii mana juwii beu, ikii Ugatameepa make beu kouja,” etii.

⁴⁸Tijake Jahudi bagee wo eteete mana, „Maakodo juwa, iniija kateege kidi ki, aki Samaria ka me idaana, daana enija jago,” etii.

⁴⁹Tijake Jesus wo eteete mana, „Ani enija jago beu, kodeja ani Naitai kidi ibo ejaikai, daana ikiija ka ko ani nawidogai.

⁵⁰Ani ajiipi natijawii mana ubai beu kodeja; Ena topi kijoka; okai kidaa naaubajake boko petajawii.

⁵¹Beu maa kou ani kitiine, meija anija mana jakimakipi ko, bokai te doutagi imo to togoo.”

⁵²Tijake Jahudi bagee eteete mana, „Maa kou, ito inii epi aki ki enija jago. Ibrahim ma tikauwa ka gokobaki tijawiidaiga wegai tita bagee ma bokata, tijake akaa enii ko, ’Meija anija mana jakimakipi, okai te bokajake imo too toutagi’ eneege kou.

⁵³Iniitai Ibrahim bokata me kidi ma ko aki ki ibo, mee? Daana tikauwa ka gokobaki tijawiidaiga wegai tita bagee utoma bokata. Aki ki meime ma ena dani kaine?” etii.

⁵⁴Tijake Jesus wo eteete mana, „Kou danite ani akaato ajiipi tijawipa ko, anija ajiipi kou ko epa beu. Kodeja Naitai kidaa ajiipi natijawii; ikiija ka Ugatame eebateiga me kidi.

⁵⁵Okai kii ke ikii ke ewo me. Kodeja ani ki epi. Kou danite ani okai ewo kitipa ko, beu maa kou, ani ki ikii dani puja mana wega-tai me. Kodeja okai kii ke ani epi, daana okaija mana ani jakimakai.

⁵⁶Ikiitai Ibrahim kidaa maija kegepa begoo-begoo, anija naago okai doune tijake. Okai dojake ideide timakai.”

⁵⁷Tijake jahudi bagee eteete mana, „Aki pajake ko taun gaatibeu umii beu tope. Aki ki Ibrahim edou, mee?” etii.

⁵⁸Tijake jesus wo eteete mana, „Beu maa kou ani kitiine, Ibrahim beu gaa ani ki tou,” etii.

⁵⁹Tijake okei utoma mogo mou, wagiine tijake. Kodeja Jesus gabo boonidoke tijake Ugatameja owaa duba make podomidoke tai.