Read Galela JAHJA 9 Bible Online

JAHJA 9 - Galela bible

JAHJA 9

¹Okai jaweetigo me idaana epamakitaida make peka wanee me edou.

²Tijake etope-taido egaado teete mana, „Ei, Kuduu, meija peu kei tita? Kii me ki, mee? nakame ukame ka kei tijake okai epamakitaida make peka wanee kiija,” etii.

³Tijake Jesus wo eteete mana, „Kii me ki peu kei tai ko beu, daana nakame ukame ko beu, kodeja Ugatameja kei tai agijo okai maida emuwake-tijake.

⁴Aweida toja gaa nabadikumita meja kei tija agijo inii kei tai beu kai peu. Wanee kaita, tijake me idaana ma te kei timakija kodaa.

⁵Ani makiida toja gaa, ani makiida ka aweida kodo,” etii.

⁶Okai kou mana wegajawijake maki maida epoge tuwajawii, tijake kou maki kodo epoge kodaa debee awijake, debee maki ki peka wanee meja peka maida widii jatai.

⁷Tijake eteete mana, „Siloam uwo komo duba witoge-uwii.” (Me manaida awi-toojogo ko Ebadikumita.) Tijake okai witogeuwijake okaija peka kodo enaa kijake joko mei.

⁸Tijake okai ma ena makijo ka bagee ma, me ino ka ma okai ediime-diime teetigo edota bagee kedaa edojake kei teete mana, „Beu, mee? kii ke animakijake diime-diime tei-teetegi kidi ki,” wegai.

⁹Tijake me ino ka wegai ko, „Kii ke okai kidi.” Daana me ino ka wegai ko, „Beu, okai dani ka me idaana,” wegai. Tijake okai kidaa eteete mana, „Ani ki okai kii kidi,” etii.

¹⁰Tijake okei eteete mana, „Aki kawe dani tijake peka domake?” etii.

¹¹Tijake okai joko eteete mana, „Me idaana eka ki Jesus kidaa maki debee awijake anija peka maida widii natijake eneete mana, ’Siloam komo duba witoge-uwii’ enipi. Daana ani kouda kodaa witoge-uwijake ito ko domake,” etii.

¹²Tijake okei egaado teete mana, „Kii me kidi ki kaija?” etii. Tijake okaija „Ani ewo,” etii.

¹³Tijake jukumaato peka wanee me kidi ki okei Parisi bagee jumaapa ouwii.

¹⁴Okai kou naago kodo Jesus maki debee awijake peka domake tijake kei tita kou ko Sabbat naago kodaa.

¹⁵Tijake Parisi bagee kigeena ma etidou, okai kawe dani tijake peka enaa jawipi mana. Tijake okai wo eteete mana, „Okai debee maki peka maida widii natijake daana ani witogijake domakipa,” etii.

¹⁶Tijake Parisi bagee me ino ka eteete ko, „Kii me kii ke Ugatameepa make ko beu, Sabbat naago dijo dou beu kouja,” wegai. Daana me ino ka wegai ko, „Kawe dani tijake peu me idaana kou dani ka dou beu agijo kei tija?” wegai. Tijake okei kede akaije tai.

¹⁷Okai kouja jukumaato peka wanee me kidiipa eteete mana, „Kii me kidi maida make aki kawe no eniipage, akija peka enaa kaawipi kouja?” Etijake okai joko eteete mana, „Okai ki Ugatameja gokobaki tijawiidaiga weg-tai me kidi ki,” etii.

¹⁸Okai jukumaato peka wanee daana ito ko peka domake Jahudi bagee maakodo gai beu tijake nakame ukame manaa-tai.

¹⁹Tijake okei egaado teete mana, „Kii ke ikai joka, epamakitaida make peka wanee aeneega kidi, mee? Kawe dani tijake ito ko okai domake?” etii.

²⁰Tijake nakame ukame ka aeteete mana, „Inai epi, kii ke inai joka, daana epamakitaida make peka wanee,

²¹kodeja kawe dani tijake ito ko domake inai ewo. Daana meija peka enaa jawipi inai ewo. Okai kidi egaado, okai ibo kijoka, okai kidaa mana kitiipagi,” aetai.

²²Nakame ukame kou dani mana aawegai kou ko Jahudi bagee weda aagajake. Jahudi bagee ena dimi kepajawii kouja, meija kii ke Keristus kidi wegapi ko, okai Jahudi ka sembahjang owaa duba make eemigimakaine tijake.

²³Okai kouja nakame ukame ka aawegaate mana, „Okai ibo kijoka okai kidi egaado tai,” aetita.

²⁴Tijake kigeena ma jukumaato peka wanee me kidi okei manaa-tijake eteete mana, „Ugatame to muta etuwai. Inii epi me kii ke peu me kijoka,” etii.

²⁵Tijake okai wo eteete mana, „Okai peu me juwa ani ki ewo. Kodeja mana kato to ani epi. Jukumaato ani peka wanee, kodeja ito ani domake,” etii.

²⁶Tijake okei eteete mana, „Magijo kakei tipi? Kawe dani tijake okai peka enaa kaawipi?” etii.

²⁷Tijake okai joko eteete mana, „Ani kiteega kodo ko, kodeja ikii juwii beu. Magijo taine kigeena ma juwiine? Ikii maija okaija etope-tai kaine, mee?” etii.

²⁸Tijake okei ewidogijake eteete mana, „Aki ki okaija katopetai me, kodeja inii ke Musaja nitope-tai bagee.

²⁹Inii epi Ugatameja Musaapa mana etita. Kodeja kii me kii ke kaijaiga meta juwa inii ewo,” etii.

³⁰Tijake okai wo eteete mana, „Kowaa kei, ani gai kana, okai metaida ikii ewo eneega, okai ki anija peka enaa naawipi kodaa.

³¹Inii epi Ugatame kidaa peu kei te-tai me ka mana te jajuwija. Kodeja Ugatame migaakobe ete-tai ma, daana okaija dimi kei te-tai bagee ma to jajuwija.

³²Maki ewaa awitaida make kii dani mana inii juwii beu tope, epamakitaida make peka wanee me kidi peka enaa jaawii mana kou no te.

³³Okai Ugatameepa make beu naako, tumaana agijo ma te kei timakija kodaa,” etii.

³⁴Tijake okei wo eteete mana, „Aki maakidi peu duba kapajawita. Aki ki inii nitopaine, mee?” etii. Tijake okei eemigimakai.

³⁵Kii me kidi eemigimakita mana kodo Jesus juwijake, okai ma akado tijake eteete mana, „Aki Ugatame Jokame kidi maakidi egai, mee?” etii.

³⁶Tijake okai eteete mana, „Kii kidi ki meime? Kuduu, ani maakidi egaine no,” etii.

³⁷Tijake Jesus wo eteete mana, „Aki edooge ki, daana aki ma mana kaawegaate me, okai kii,” etii.

³⁸Tijake okai wo eteete mana, „Ei, Tuhan, ani maakodo kagai,” etijake okai migaakobe etai.

³⁹Tijake jesus eteete mana, „Boko duwajawiine tijake makiida meta. Te domake bagee domake-tijake, daana domake bagee kede peka wanee ke-tijake,” etii.

⁴⁰Tijake Parisi bagee wija wido Jesus ma enaimo kou mana kodo juwijake eteete mana, „Inii maija peka wanee bagee, mee?” etii.

⁴¹Tijake Jesus wo eteete mana, „Kou danite ikii peka wanee naako ikii peu beu, kodeja ikiija ka ko ’Inii domake’ wegai kouja, ikiija ka peu kodo tou to,” etii.