Read Galela KEI TITAIDO 1 Bible Online

KEI TITAIDO 1 - Galela bible

KEI TITAIDO 1

¹Edoga ka kapogeije ani ebijamakeetega, kowaa ke, Teopilus, Jesusja kei tai ma, etopai ma, go-motita manaido kodo.

²Kii kidi wado ebukti-motita naagouda to; ewitokita ka etiawitaido kede Rohulkudus ka bidaidaiga mana etimakijake.

³Okai gaduwajake wadouto, maakidi ija kita okei ga-tita no te mana wedaba okeepa emuwakai; kou ko, okai naago mepiija okeepa ewaa kigoo tita, daana Ugatameja jakimakita makiida mana kodo eti-menita.

⁴Okei ma enaimo ootoojogo gaa, Jerusalim make te podomai etita, kodeja Nakame jatogijawita mana kodo doutou to tai etita. „Ikiija aneepa make juweetega mana kodo,” etii.

⁵„Jahja uwo ka me baptis etei tita, kodeja ikii ke uno magoo dani umijake Rohulkudus ka baptis kitai,” etii.

⁶Okei kotuu timakijake egaado teete mana, „Ei, Tuhan, ito kii gaa ki Israil jakimakita makiida titaaki tijawiine, mee?” etii.

⁷Tijake Jesus wo eteete mana, „Kii wagi, kou wagi uwa jawe gai mana ikiija ka gaja ko beu; kou ko Naitai kidaa boko duwa-jawita mana kodo.

⁸Kodeja ikii bida boko go-motiita, Rohulkudus ikii maida mijouwe kaitagiida make; tijake ikii mana nawega-tai bagee kaita, Jerusalim makiida ma, Judea ma, Samaria ma, kii kidi maki momogiida to.”

⁹Okai kou mana oowegajake, okei edomakeetigo gaa wado ebuki-motita. Tijake okeija pekaida make tá kapagu ka ogaa eewita.

¹⁰Okai uweetigo gaa, okei epa maida wado dootaa teetigo, pokadee kagaba aamakijawita me wija okeepa aajoonidaa tai,

¹¹aeteete mana, „Kowaa kei, Galilea bagee, magijo ka ikii epa maida wado dootaa teete? Kii Jesus kidi, ikeepa make epaawado uweegi kidi, kou dani maija mijo meitagi, okai epaawado uweegi ikii edooga danite,” etii.

¹²Okei metato Jerusalim wo uwii, dimi katouda eka ki Zaitun make, Jerusalim kapauto, Sabbat naago uwii ko pijo ita kodo.

¹³Okei makiida wadoujo kijake, okei wadouto kuguuda okeija to-taida kodaa wadoujo kai. Peterus ma, Jahja ma, Jakub ma, Andereas ma, Pilipus ma, Tomas ma, Bartolomeus ma, Matius ma, Alpius jokame Jakub ma, Simon Zelotis ma, Jakub jokame Judas ma, keido.

¹⁴Okei utoma ena dimi to kepajawijake sembahjang to tigoo tai, jagamoudo ma enaimo, daana Jesus ukame Marjam ma, okaija wenekaaneido ma.

¹⁵Okai kou gaa kodo Peterus kidi enakeneka bagee jupi joonii. Me kotuu timakita bagee ko muto wija dani. Peterus eteete mana,

¹⁶„Kowaa kei noogeima, Ugata mana muto kodo kobadoke tai beu kai peu. Kou ko, tika kodaa Rohulkudus kodaa Daud ebeidaiga Judas maida make wegata mana kodo, Jesus ejakimakaine bagee kede oometa me kidi.

¹⁷Okai inii ma nigakita kouja, daana kei tai agijo kodo duba okai inii ma enaimo akagadime tijawita.

¹⁸Kii me kidi peu agijo ageja ka maki edai. Tijake mijo gootijake duwadoke tijake puto kuwadaa tita.

¹⁹Jerusalim bagee utoma epi kijake, kou maki kodo okeija manaidaiga ebatai ko Akeldama ebatita, kou ko, Emo Makiida.

²⁰Mazmur duba ebijamakita kouja: Okaija to-taida diitu daatuuda, Daana kouda kodaa me te tou enaa. Daana: Okaija kei tai agijo kodo joko bagee ka jago-motii.

²¹Okai kouja inii ma tota bageido, kou ko, Tuhan Jesus inii ma enaimo umi-tou tita gaa,

²²Jahjaja baptis etita gaa make Jesus ineepa make wado ebuki-motita gaa to utuuja, okei jupi ka me idaana inii wa enaimo okai bokata bagee jupi make anigota mana kodo jawega-tai me kai beu kai peu,” etii.

²³Me ida wija ejoonijawii, kii ko Jusuf kidi, Barsabbas eeba-tijake Justus eebateigai me kidi ma, daana Matias ma.

²⁴Tijake okei sembahjang teete mana, „Ei, Tuhan, me utoma ka kegepa epi me, kei wija kei kawi ka ki akija ewitokita kidi niti-niimai.

²⁵Eti-awita kei tai agijo jake-tita, kou ko Judasja jamo jaikita, okai kidaa to-taida uwe-tijake.”

²⁶Okei tipa po momogo tija dani tijake Matias doodouga epogomita. Tijake eti-awita ida ena ma gaati kede ma enaimo eewita.