Read Galela KEI TITAIDO 11 Bible Online

KEI TITAIDO 11 - Galela bible

KEI TITAIDO 11

¹Judea ka eti-awitaido ma, enakeneka bagee ma ka ojaa bagee maija Ugatameja mana ejakimakita mana kodo juwii.

²Peterus Jerusalim wado uwijake, okeitodo duwa-tai mana eepe-tai bagee kede akaije ootai.

³Eteete mana, „Magijo ka aki iniitodo duwai beu bageepa uwijake oonai?” etii.

⁴Kodeja Peterus epautouda make momogiida to kou mana kodo wo eti-menii.

⁵„Ani Joppe makijo sembahjang teetigo. Tijake anija pekaida makidoke tijake dou beu agijo dou. Kou ko, ibo kagaba dani bukaa dokouda butu wijago epa maida make doko doko tigoo mijouwe kai. Tijake aneepa dakii tai.

⁶Ani peka wagimakijake bo wiijago ma, jina ma, neemina agijo ma, bedo ma, ani dou.

⁷Tijake mana wuu juwii, eneete mana, ’Kowaa ke, Peterus, anigou. Wagijake nai,’ eneemegi.

⁸Kodeja anija etii ko, ’Kou dani ko beu, ei, Tuhan. Utoopa juwa, nokii juwa, ani nodou beu kouja,’ eteemega.

⁹Kodeja kigi wijaago epa maida make mana wuu eneete mana, ’Ugatameja pijo awita agijo akija dá taawii,’ eneemegi.

¹⁰Kii dani kigi widaago kei tijake utoma epaawado wado igadoke tai.

¹¹Okai kou gaa kodo maija inii tota owaapa me ida wido dakii tai, Kaisaria make nabukaine ebadikumita bagee.

¹²Okei wa dimi ma te gajake uwe-tijake Roh kodaa nabadikumii. Kei noogei benumi kei maija ani ma enaimo naapei, daana kii me kidaa owaapa inii wadoujo kai.

¹³Tijake okai niti-niimai, okaija owaapa jaetigo-tai idaana joonidoke tijake eteete mana, ’Joppe makijo Simon, eka Peterus eebatita kidi manaa-teete me ebadikumii.

¹⁴Ikii ajii te-tijake mana kiti-kiniitagi, aki ma akija uguwo ma,’ eti-toomegi.

¹⁵Ani mana wegaine go-motijake Rohulkudus okei maida mijouwe kidoke, ineepa edoga kei teetega danite.

¹⁶Tijake Tuhanja enita mana ani wado gai, eneete ko, ’Jahja uwo ka baptis tei tita, kodeja ikii ke Rohulkudus ka baptis kitai.’

¹⁷Okai kouja Ugatameja okeepa maija ojaa menija agijo meni-toojogo, inii niimita danite, inii Tuhan Jesus Keristus maakodo egata gaa; no, ani ki Ugatame akaije ootija, mee?” etii.

¹⁸Okei kou mana kodo juwijake gabo tou. Okei Ugatame muta etuwaate mana, „Kou keetigo ko Ugatameja ojaa bageepa tedemai dimi menii, ajii te-tita,” etii.

¹⁹Stepanus maida make potu tita ka peepu tai mana maida make wudepapa tita bagee kede Feniki ma, Kiperus ma, Antiochia ma, dakii tai. Kodeja joko ka bageepa ugata mana jawudii beu, kodeja Jahudi bageepa to.

²⁰Kodeja okei jupi ka me ida wija wido, Kiperus ma, Kireni ma ka bagee, Antiochia dakii tijake Gerika bageepa maija mana oowegai; okei Tuhan Jesusja ajii mana wudikumii.

²¹Tuhanja gane okei maida kijake me wedaba maakodo egajake Tuhanpa wouga kai.

²²Jerusalim ka maakodo gai uguupuguu kou mana kodo juwijake, Barnabas Antiochia makijoopa ebadikumii.

²³Okai dakii tijake Ugatameja jikoo bokouto kodo dojake ideide timakai. Okai umina etopai, okei bo wejake Tuhan ejakimake-tijake.

²⁴Barnabas kidi enaa me kouja, daana Rohulkudus ma, maakodo gai dimi ma ka ebetume tita me. Me wedaba Tuhan maida kotuu timakita.

²⁵Okai kouja Barnabas Tarsus makijo Saul euba-uwii.

²⁶Edomakijake Antiochia makijoopa oomei. Taun puki kato okejai maakodo gai uguupuguu ma enaimo kotuu timakijake me kotuu wedaba aetopai. Antiochia makiida kodaa make etope-taido edoga kidi „Keristen” eebatita.

²⁷Okai kou gaa kodo mana wude-tai bagee Jerusalim make Antiochia mijo mei.

²⁸Okei jupi ka idaana eka Agabus kidi joonijake Roh gokobaki tijawiidaiga douja dota mana, uwoje makije naidi uwa potu taita mana kodo. Kelaudius tota gaa kou kei tidoke tita.

²⁹Tijake etope-taido kede mana kepajawii, me gakita agijo tota danite Judea ka enakeneka bageepa agaagi meniine tijake ebadikumii.

³⁰Okei kou dani kei tai, Barnabas ma Saul ma ka ganeida maakodo gai uguupuguu douto-tai kedeepa wo jamakijawii.