Read Galela KEI TITAIDO 12 Bible Online

KEI TITAIDO 12 - Galela bible

KEI TITAIDO 12

¹Okai kou gaa kodo maki jakimake-tai me Herodes kidaa maakodo gai uguupuguu wija wido peepu etaine tijake etimakai.

²Jahja keneka Jakub kidi kataana ka ogo eduwai.

³Jahudi bagee ideide tita kodo Herodes dojake Peterus maija ejakimakai. Kii ke goti ejajawii beu naago.

⁴Ejakimakijake wanee owaa duba amoujo eewita. Serdado benumi ma gaati, kigeena me ida wii, kigeena me ida wii akapaka-paka edoutou. Wadouga etigajake petii tita ga-tou naago wadouto me jumaapa epodomijawiine tijake.

⁵Okai kouja Peterus wanee owaa duba ejakimakita, kodeja maakodo gai uguupuguu Ugatameepa sembahjang umina jatai.

⁶Herodesja epodomijawiine uno jato kodo Peterus serdado wija jupi uno umi-toojogo. Pute buda wija ka egadimimakita, daana damoutoopa douto-tai kede wane owaa doutoojogo.

⁷Okai kou gaa kodo Tuhan jaetigo-tai idaana joonidoke tijake, kou kuguuda aweida ganidoke tai. Okai Peterus gebo maida ganaatugu etijake matoki eteete mana, „Egaa anigou.” Etijake pute buda gane maida make ukadaa tai.

⁸Jaetigo-tai kidaa eteete mana, „Piti gadimijake bado awii makii.” Etijake kou kei tai. Tijake eteete mana, „Kagaba egaupijake naapei,” etii.

⁹Okai podomijake eepei. Jaetigo-tai kidaa kei teete mana Peterus maakodo gai beu, kodeja bagume dote dani, mee? gai.

¹⁰Edoga ma wijaago ma douto-tai kede aatigamakijake, maki okogo uwe-tai pute damoutoopa dakii aatai. Damo okai kidaa kebadoke tijake okejai aapodomai, tijake ita kato aatigamakai. Tijake jaetigo-tai igadoke tai.

¹¹Peterus gadoke tijake kei teete mana, „Ito ko ani epi, Tuhanja jaetigo-tai me ebadikumijake Herodes ganeepa make, daana Jahudi ka dimi maida make maija napipikajaweegi.”

¹²Okai kou kodo gaawe tijake Marjamja owaapa uwii, Jahja ukame kodo. Kii ke Markus eebatita kidi. Okai kouda kodaa me wedaba kotuu timakijake sembahjang teetigo.

¹³Okai damoutoopa tugu tugu tijake jakei te-tai api idaana eka Rode ejuwaine mei.

¹⁴Peterusja mana wuu epi kijake ideide ka damo jakebai beu. Tibigi amo uwijake Peterus damoutoopa jooni-topi mana kodo okai eti-menii.

¹⁵Okei eteete mana, „Aki enijaanija.” Kodeja etita kidi danite to etigoo. Okei eteete mana, „Okaija aja kidi,” etii.

¹⁶Kodeja Peterus damo tugu tugu tigoo. Okei damo kebajake edou, tijake ego takuu takuu tai.

¹⁷Kodeja gabo to-tijake ganaabego etijake wanee owaa duba make Tuhanja epodomijawita mana kodo eti-menii. Tijake eteete mana, „Jakub ma enakeneka bagee ma eti-menii,” etijake kouda kodaa make ko maki katouda uwii.

¹⁸Awidoke tijake Peterus maida make mana kodo serdado gaagaa umina.

¹⁹Herodes kidaa Peterus eubajake edomakai beu tijake doutotai bagee egaado tai. Tijake wagimake-tijake etimakai. Tijake Judea make Kaisaria mijo uwijake kouda kodaa tou.

²⁰Herodes kidaa Sur ma Sidon ma ka bagee umina emoge egai. Okei ena dimi kepajawijake okaapa mei, tijake kugu duba kei te-tai me Belastus kidi jeu jeu etijake dagi nijaduwai ediimai. Okeija naija agijo kodo jakimake-tai meja makijo maida kouja.

²¹Jatogijawita naago kodo Herodes diiti kagaba makijake jegeenaka animakaida animakai, tijake mana pitokai.

²²Meido kodaa emeeme teete mana, „Kii ke ugata mana godaagi, me ka mana ko beu!” emeeme tai.

²³Okai kou gaa kodaa Tuhan jaetigo-tai idaana ka wagii, okai Ugatame ibo ejaikai beu kouja. Tijake toka ka enojake okai bokai.

²⁴Kodeja Ugatameja mana wudigi tidoke tijake wo gamei jamo gamei tikumii.

²⁵Barnabas ma Saul ma Jerusalim make joko aamei, auwijake aekowaine agijo aekowamakijake. Daana okejai ma enaimo Jahja, eka Markus eebatita kidi oomei.