Read Galela KEI TITAIDO 17 Bible Online

KEI TITAIDO 17 - Galela bible

KEI TITAIDO 17

¹Okejai Ampipolis ma Apolonia ma wokaato aakijake Tesalonika dakii aatai. Kouda kodaa Jahudi ka sembahjang owaa toojogo.

²Paulus kei teigi danite owaa kodo wadoujo kijake Sabbat naago wido ugata mana kodo oowegagoo.

³Keristus kidi didi gaduwajake bokata bagee jupi make anigou beu kai peu mana kodo boko japetajake epaapa etijawii, kei teete mana, „Ani keewegaate me Jesus kidi ki Keristus kidi,” etii.

⁴Me ino dani mana kodo jakimakijake Paulus ma Silas ma enaimo kai. Kou dani maija Gerika ka dijo do-tai bagee wedaba, daana ekaago jagamoudo ewaa dani.

⁵Kodeja Jahudi bagee kede digi edokijake utoopa ka maje maje bagee kotuu etimakijake makijo kodo tetepepe ewaa awii; okei Jasonja owaa kebadou, eti-awitaija kede meido jumaapa ouwiine tijake.

⁶Edou beu tijake Jason kidi ma, joko ka enakeneka bagee kede ma kou makijo ka iboudo jumaapa ganeuto egojake pitokeete mana ko, „Uwoje makije wedege tikumeete bagee kede jakai maija mejake

⁷Jason kidi ebukai; okei Kaisarja ibo manaido dijo beebu timakijake joko ka maki jakimake-tai me Jesus kidi topi mana wegaate,” etii.

⁸Meido kede ma, makijo ka iboudo kede ma kou mana kodo juwijake gootoki tai.

⁹Jason ma, jokokaidoopa make ma mege needai etijake okei ejaikai.

¹⁰Egaa kodaa enakeneka bagee kedaa Paulus ma Silas ma wanee jato Berea makiida ebadikumii. Okejai dakii aatijake Jahudi ka sembahjang owaa duba woujo aakai.

¹¹Tesalonika ka Jahudi bagee ma ko okei ke dimi enaa bagee; okei mana kodo ideide ma jakimakai kouja, naago gakita ugata mana kodo igi jakigoo tijake, maakodo mee? titaida ka.

¹²Okai kouja me wedaba maakodo gai, ekaago ka Gerika jagamoudo ma, jameido ma.

¹³Kodeja Paulus kidi Berea makiida Ugatameja mana jawegaate mana kodo Tesalonika ka bagee kede juwijake okei kouda kodaa maija mei; okei meido kede kuwei menijake me wedaba emogaago etai.

¹⁴Egaa kodo enakeneka bagee kede Paulus maikaidaapa eumigou. Silas ma Timotius ma Berea makiida aumidokai.

¹⁵Paulus eumigota bagee kede Atina makiida to eumigou; Silas ma Timotius ma egaa aamei naaetii Paulusja etijake okei wo uwii.

¹⁶Paulus Atina makiida okejai kede edoutootigo gaa kodaa kou makiida migaakobe etai ebijaabija umina wedaba dojake kegepa ejai.

¹⁷Sembahjang owaa duba okai Jahudi bagee ma, dijo do-tai bagee ma, mana oowegai; daana naago gakita akaada te-taida kotuu tei tita bagee kede ma.

¹⁸Epikuri ma Stoiki ma mana jakimakita bagee me ida wija wido okai ma akado tijake akaije ootai. Me ino wegaate mana, „Kii mana eneene te-tai kidi má mana wegaine?” wegai. Kodeja joko ka kede kei teete mana, „Okai ojaa ka migaakobe ete-tai agijoudo mana wegaigi ga,” wegai. Jesusja ajii mana ma, bokata bagee anigou mana ma, Paulus oowegai kouja.

¹⁹Okei Paulus ejakimakijake Areopagus kotuuda ouwii, eteete mana, „Akija ija ka mana wegaate ko inii gamake, mee?

²⁰Gai kana mana iniija gapaapa nijadoke-mei kouja; inii kei manaido gaine kodaa,” etii.

²¹Atina bagee utoma, daana dokiwe bagee utoma tumaana agijo ma kei tai beu kodeja ija mana juwii ma, wegai ma, to.

²²Tijake Paulus kidi Areopagus epouda kodaa joonijake eteete mana, „Ei, Atina ka bagee, utoma takaida ani kidooga, ikii migaakobe te-tai dimi to ga-wo.

²³Ani tonaa teetigo gaa ikiija migaakobe ete-tai agijoudo kijadojake ikiija mene-taida kato kii dani mana ebija-tooga: Gai ewo ka ugatame ipuwe. Okai kouja ikii ewoudaiga migaakobe ete-tai kodo, okai kou kodo ani kiti-kiniine.

²⁴Maki ma, kou duba ka agijoudo ma ugajawita Me kidaa epa ma maki ma boko duwajawii kojoka, me ka gane ka migita owaa duba te toja.

²⁵Daana me ka gane ka eedadai kou ko okai gai peu ko beu, okai agijo beu jaijo, okai kidaa inii utoma ija boko niimai kouja, daana ebe puu ma, daana utoma agijo utoma.

²⁶Epauto ki ena to me jokaija e bagee te bagee eugajawita, uwoje makije gamedaa te-tita, okeija umi-wogi to-wogi jaduwajawijake, daana to-taida bedee jamakijawijake;

²⁷okei Ugatame kidi euba-tita, jakido jakido tijake edomakija, mee? titaida ka. Okai inii utoma kedeepa make poto ko beu kodeja.

²⁸Okai duba inii ume-wo ma, mukugu ma, tijake tope. Ikiija ka ugaa go-tai bagee kedaa kei tita danite: Inii kei maija okaija nikebata bagee.

²⁹Inii kei Ugatameja niugajawita kouja, Ugatame kidi ki me ka gane ka kei tita mas ma, perak ma, mogo ma, epoo kodo dimi te neegai, uwo dinita me ka dimi ka kei tita agijo kodo.

³⁰Ewo wagiida ko Ugatameja aadaba tita, kodeja ito kou kiida kouda me utoma tedemai beu kai peu mana kodo etita.

³¹Putu naago kodo gadimimakita kouja, okai uwoje makije ka bageido maakodoudaiga boko petaitagi, okaija boko duwajawita me kidiidaiga, daana kou mana kodo utoma bagee epaapa jatijawii, bokata bagee jupi make eenigojawita kouja.”

³²Bokata bagee anigou mana kodo meido juwijake me ino dani odijai etai. Joko ka kede wegaate mana, „Emino to kou mana kodo inii kajuwaitage,” etii.

³³Kojoka okei jupi make Paulus podomai.

³⁴Kodeja me wija dani okai ma enaimo kijake maakodo gai; okei jupi Areopagus pika-tai me idaana Dionisius kidi ma, jagamo idaana eka ko Damaris ma, daana me ino maija okei wa enaimo.