Read Galela KEI TITAIDO 18 Bible Online

KEI TITAIDO 18 - Galela bible

KEI TITAIDO 18

¹Kou wadouto Paulus kidi Atina makiida jaikidokijake Korintus makiida uwii.

²Jahudi ka me idaana eka ki Akila ma akado tai; okai Pontus makiida ka me kidi, okai kou gaa kodo Italia make meta, jagamome Periskila ma enaimo, Kelaudiusja podomijawita mana maida make, kou ko, Jahudi bagee utoma Rum makiidaapa make podomai. Paulus kidi edou uwii.

³Kei tai agijo ena kidi kojoka okejai ma enaimo oumidokijake okei kei tai; okei kagaba owaa gine-tai bagee kouja.

⁴Sabbat naago gakita Paulus kidi sembahjang owaa duba mana oowegajake me wedaba epaapa etijawii, Jahudi ma, Gerika ma.

⁵Silas ma Timotius ma Makedonia make aamejake Paulus umina kidi meidoopa mana wegagoo to; Jesus kidi ki Keristus kijoka mana kodo Jahudi bageepa etii.

⁶Kodeja meido kede akaije ma, ewidogai ma tijake okaija kagaba kodo mapagi atijake eteete mana, „Ikiija emo kodo ikii kede maida dokeenii! Ani ki peu beu. Ito make wado ani ojaa bageepa uwiita,” etii.

⁷Kouda make uwijake Titus Justus owaapa uwii; kii ke Ugatameepa dijo do-tai me kidi, daana owaa kodo sembahjang owaa watija.

⁸Sembahjang owaa douto-tai me Kerispus kidi, daana okaija uguwo ma Tuhan kidi maakodo egai. Korintus ka bagee me wedaba mana juwijake maakodo gai, tijake baptis tai.

⁹Wanee jato bagume dani dubaiga Tuhanja Paulus eteete mana, „Weda te gai! Mana wegai to, gabo te tojake.

¹⁰Ani ki aki ma enaimo kouja; daana me idaana ma peepu kataine igipugi te katimake. Ani kii makiida me wedaba topa kouja,” etii.

¹¹Paulus kidi taun ebeebe ka wija umidokijake Ugatameja mana kodo etopai.

¹²Galio kidi Achaja dokoo gubernur kijake Jahudi bagee ena dimi kepajawijake Paulus akaije ootai. Okei pika-taidaapa ouwii.

¹³Okei wegaate mana, „Me kidi meido monoo eteete, dijo douja mana kodo akaije manaida Ugatame migaakobe etai mana kodo,” etii.

¹⁴Kodeja Paulus mana godaine jato Galio kidaa Jahudi bageepa eteete mana, „Ei, Jahudi bagee, peepu mana juwa, peu kei tai agijo juwa naako ani kijuwai beu kai peu.

¹⁵Kodeja mana muto kodo ma, ekaido mana ma, ikiija dijo do-tai mana kodo ma kouja, ikii kede boko petai; ani kou dani manaido boko te petaita,” etii.

¹⁶Tijake pika-taidaapa make ebakikumii.

¹⁷Sembahjang owaa douto-tai me Sostenis kidi okei ejakimakijake pika-tai watija make kopa wagii. Kodeja Galio kidi aadaba etijawita.

¹⁸Paulus uno wedaba umidokijake enakeneka bagee kede kojáá tou etijake Sjam dokoo komaiga uwii, Periskila ma Akila ma enaimo. Kenkeria makiida okaija nazar baita Makita mana maida make ijo bugii.

¹⁹Okei Epesus dakii tijake Paulus ejaikidokii, kodeja okai kidaa sembahjang owaa duba wadoujo kijake Jahudi bagee ma mana oowegai.

²⁰Okei neetou ediimijake okai ekonai;

²¹kodeja kojáá tou etijake okai eteete mana, „Ugatame enaa gapi ko ani ikeepa joko meita,” etii. Tijake okai Epesus makiida make komaiga uwii.

²²Okai Kaisaria dakii tijake Jerusalim wado uwii; maakodo gai uguupuguu mana oowegajake okai Antiochia mijo uwii.

²³Okai kouda kodaa uno magoona umijake okai ita uwijake Galatia dokoo ma, Perigia dokoo ma, wokaato kijake etope-tai bagee bo jawejawii.

²⁴Jahudi ka me idaana eka ki Apollos kidi Epesus makiida mei; okai Iskandaria ka me kidi, mana wegai epi, daana Ugata mana topi-motita me kidi.

²⁵Okai Tuhanja mana etopita me kidi, daana kegepa duba umina ei gajake Jesus maida make mana pidou pidou meido etopai, Jahja baptis tei tita mana kodo to epi kidija.

²⁶Okai uu peu kidi sembahjang owaa duba mana wegai gomotii; kodeja Periskila ma Akila ma aajuwijake okejai aabukijake Ugatameja mana euga epeepite boko aapeta-menai.

²⁷Okai Achaja amo uwiine gajake enakeneka bagee kede enaa gajake kapogeije menii, etope-taido kedaa ebuke-tita tijake. Okai dakii tijake Ugatameja jikoo bokoutoudaiga maakodo gai bagee kede okai eedadai umina.

²⁸Me utoma pekaida okai Jahudi bagee kede bida peu daba ejaikai; Jesus ki Keristus kidi ki mana kodo Ugata manaidaiga epeepite boko japetai.