Read Galela KEI TITAIDO 20 Bible Online

KEI TITAIDO 20 - Galela bible

KEI TITAIDO 20

¹Tetepepe kodo duwajake Paulus kidi etope-taido manaatij ke mana oowegai. Okai ejaikijake Makedonia dokoo uwii.

²Kou maki dokoo wokaato kijake, daana meido kede mana oowegajake okai Gerika makijo dakii.

³Agoo wido umidokijake okai Sjam makijo komaiga uwiine jato Jahudi bagee wagiine mana kepajawijake okai Makedonia metato uwii.

⁴Pirus jokame Sopater, Berea ka me kidi okai ma enaimo; daana Tesalonika ka bagee Aristarchus ma, Sekundus ma; daana Derbe ka me Gajus kidi, daana Timotius kidi; daana Asia ka bagee Tichikus ma, Teropimus ma.

⁵Kei bagee tiga uwijake Teroas makiida kodaa nidoutou.

⁶Goti ejajawii beu naago wadouto inii Pilipi make komaiga uwii; uno idibi umijake inii Teroas makiida okeepa kai. Inii kouda kodaa uno pituwo umii.

⁷Kou dá putu ka edoga naago inii goti utiine kotuu timakijake Paulus kidi mana oowegai, aweetaa naago uwiine tijake; okai mana wegaate wanee ejupi awii.

⁸Inii wadojake kuguuda kotuu timakitaida kodaa lampu wedaba.

⁹Jokaagaa idaana eka ki Eutichus kidi akaadamouda animakijake uno takabeu kai. Paulus kidi wo wegai umina tijake jokaagaa kidi uno pokoma kijake widaago kakade make mijo gootai. Me ka ebukijake boka-toujo.

¹⁰Paulus mijo uwijake okai maida tudumijake ejupugai, kei teete mana, „Weda te gai; ija topi,” etii.

¹¹Okai wadouto uwijake goti utijake oonai. Okai mana oowegai umina tijake awijawii, tijake okai uwii.

¹²Jokaagaa kidi ija kidi okei ouwii; tijake meido utoma kegepa mobu.

¹³Inii tiga kapal koma matakijake Asos makiida uwii, kouda make Paulus ebukaine tijake; okai kidaa kou dani nitijake, okai adaiga uwiine tijake.

¹⁴Asos makiida okai nidojake inii ebukai, tijake inii Mitilene uwii.

¹⁵Inii kouda make komaiga uwijake aweetaa naago inii Chios makiida doodoo kai; wijaume jato inii Samos makiida umidokii, tijake widoume jato inii Miletus makiida dakii tai.

¹⁶Paulus kidi Epesus makiida wokaato kaine, Asia dokoo ipee te taine tijake; Pentakosta naago Jerusalim toune tijake okai tibigi tai.

¹⁷Miletus makiida make meido Epesus uwii etii, maakodo gai uguupuguu douto-tai bagee manaa-taine tijake.

¹⁸Kei bagee okaapa mejake Paulus eteete mana, „Ani edoga kidi Asia dokoo jooneetegaida make ito to utuuja anija ikii jupi umi-tou tei tita ka ijeida kodo ikii epi.

¹⁹Mijo kegepa ma Tuhan jakei tijake, jege ma, daana Jahudi bagee ka kepajawita manaido nagaado tijake ma.

²⁰Ikii epaago keewii manaido ani ena ma boonai beu, kodeja mana keewegai, daana mana kitopai; me kotuu duba ma, owaa gakita duba ma, keewegai to.

²¹Jahudi bagee beu, Gerika bagee beu, eti-meneete, tedemijake Ugatameepa wouga kai, daana iniija Tuhan Jesus Keristus kidi maakidi egai.

²²Ito kou gai, ani ki Roh ka nagadimijake Jerusalim wado uweete; kouda kodaa ani maida makeeniita mana kodo ani ewo;

²³kodeja Rohulkudus kodaa maki gakita duba enigoo to teete, buda ma, gaagaa ma, nadoutopai.

²⁴Kodeja anija dimi mana kodo ani akaato jipugai beu, naekegajawita mana wo ekowaine tijake, daana Tuhan Jesusja naimita kei tai agijo kodo, Ugatameja jikoo bokouto ajii mana kodo wo wegaine tijake.

²⁵Ito kou gai, ani epi, ikii utoma ani uwina titaida Ugatameja jakimakita makiida mana kodo keewegata bagee kede wadaato anija ebepeka te nadouta.

²⁶Okai kouja ito naago ani kitii, me ka emo kodo ani maida nadokijawii beu.

²⁷Ani mana mutoona ma boonai beu kouja, daana Ugatameja e mana te mana kodo keewegakumii.

²⁸Ikii akaato kede gai, daana domba imo kodo maija, okei jupi ikii ke ooto-tai bagee kijaikita, Rohulkudus kodaa, Ugatameja uguupuguu jaemune-tijake, okai kidaa emo kodaa eedamotita uguupuguu kodo.

²⁹Ani epi ani uwijake ko wojake jina ikii jupi meitai, domba imo kodo ipa egai beu bagee kede.

³⁰Daana ikii jupi maija ekoba mana etope-tai bagee ewaa kaitai, me ego-motiine tijake.

³¹Okai kouja doutou to tai; ani taun wido agapi wanee te duwajake jege ma ikii utoma kitopigoo kodo gai.

³²Ito kou ani Ugatame maida keekegajawii, daana okaija jikoo bokouto mana kodo maida, bo kiwejawii bida jago kodo daana jimubeu bagee utoma jupi ikiija didee kijaawii.

³³Ani me ka perak mege juwa, mas mege juwa, kagaba juwa, kibigi te jagai.

³⁴Ikii epi anija gane kidaa anija gai peu agijoudo kei tijaweiga, daana ani ma enaimo bagee ka gai peudo maija.

³⁵Utoma takaida ani komuga kineetega, inii kou dani epeepite ekowajake kogaagije bagee eedadai beu kai peu, Tuhan Jesusja mana kodo gajake, kou ko ’Motii ma ko menii ko euga ideide tija.’ ”

³⁶Paulus kidi kou mana wegajawijake bado donimakijake okei utoma enaimo sembahjang tai.

³⁷Okei jege kodiinaki tijake Paulus ejupugijake unu ejumidou;

³⁸okaija wegaagi mana maida make gaagaa umina tijake, kou ko okaija ebepeka okei wadaato te edoutai mana kodo. Tijake kapal komaidaapa eumigou.