Read Galela KEI TITAIDO 22 Bible Online

KEI TITAIDO 22 - Galela bible

KEI TITAIDO 22

¹„Noogeima, daana naitaima, ani ikeepa kegaine mana kodo najuwidowei!” etii.

²Okai Iberani manaidaiga mana wegaate okei juwijake okei umina gabo tou. Tijake Paulus eteete mana,

³„Ani ki Jahudi ka me, Tarsus makiida make napata, Kilikia dokouda, kodeja kii makiida kiija namunita, Gamaliel kidaa epeepite natopijake iniija aijaane muumaane ka manaidaiga, Ugatame umina dijo doune dimi, ikii utoma ito naago topa kodo danite.

⁴Kii Ita epeta bagee kede ani peepu umina etijake wagii; jame jagamo ani buda egadimijake wanee owaa duba amaawii.

⁵Ibo Imam kidi ma, boko peta-tai iboudo ma, mana naawegai bagee kede. Okeepa make ani kapogeije motii, iniikeneka bagee meniine tijake; ani Damsjik makijo uwii, kouda kodaa bagee maija egadimijake Jerusalim oomeine tijake, peu eewe-tita.

⁶Ani ita uweetigo Damsjik kapauto kijake tani dagiida gaa epa maida make awe peijo ka naganimakai.

⁷Ani maki maida apaipu tidoke tijake mana wuu juwii, eneete mana, ’Ei, Saul, Saul, aki magijo ka peepu nateete?’ eneemegi.

⁸Tijake anija wo eteete mana, ’Aki ki meime? ei, Tuhan’ etijake eneete mana, ’Ani ki Jesus, Nazaret ka me kidi, akija peepu nateete me’ eneemegi.

⁹Ani ma enaimo bagee kede awe kodo dou kodeja mana eneete me kidaa mana kodo juwii beu.

¹⁰Tijake anija eteete mana, ’Ei, Tuhan, ani magijo kei tai?’ egaado tijake Tuhan eneete mana, ’Joonidoke tijake Damsjik makiida uwii; kouda make aki kei te-tijake boko kaduwajawita manaido kodo katiita,’ eneemegi.

¹¹Awe peijo kodaa ataati maida make kouja ani peka dou beu tijake ani ma enaimo bagee kede gane nagojake Damsjik makiida wadoujo neekai.

¹²Me idaana eka ki Ananias kidi, dijo douja mana kodo dijo do-tai kidi, daana kouda ka Jahudi bagee utoma ka ibo ejaikita me kidi;

¹³kii kidi aneepa mejake eneete mana, ’Ei, noogei Saul, peka domakidou,’ enijake okai kou gaa kodo maija ani peka edou.

¹⁴Tijake okaija eneete mana, ’Iniija aijaane muumaane ka Ugatame kidaa tika kodaa make boko kaduwajawita, okaija dimi kodo aki ga-tita, daana Maakodo Bokouto kidi edo-tita, daana okaija ebeida make mana wuu kodo juwe-tita;

¹⁵okai maida make aki ki mana jawega-tai kidi kaitage, utoma bageepa, aki dou ma, juwii ma, mana maida make.

¹⁶Tijake ito kou aki magijo doutope? Anigodoke tijake baptis tidou, akija peu kei titaido witogijake, okaija eka kidi manaatijake,’ eneemegi.

¹⁷Ani kouda make Jerusalim wado uwijake ani Ugatameja owaa duba sembahjang teetigo gaa anija pekaida makidoke tai.

¹⁸Ani okai kidi edojake eneete mana, ’Egaa kodo Jerusalim make podomai; akija mana kodo ani maida make okei te kajuwaitai kouja,’ eneemegi.

¹⁹Tijake ani eteete mana, ’Ei, Tuhan, okei kede gai, sembahjang owaa utoma duba maakodo kagai bagee kede ani wagijake wanee owaa duba amaawii;

²⁰daana mana kaawega-tai me Stepanus kidi emo uwijawita gaa kodo ani maija tojake enaa gai, wagita bageeja ka kagaba jadoutojake,’ etita.

²¹Tijake okaija eneete mana, ’Uwii to tai; kiija make poto kaawiine, ojaa bageepa,’ eneemegi.”

²²Kou mana kodoopa to meido kede Paulusja mana kodo ejuwai; tijake mana emeeme tijake kei teete mana, „Kii dani me kidi makiida make eigajawii! okai ume-wo tai ko edou peu.”

²³Okei emeeme teetigo okei kede kagaba wado pi ateete maki puugee maija wadaapu tai.

²⁴Tijake serdado ka ibo kidaa mana etimakai, Paulus kidi owaa duba oomejake godijai ka egaado tai, meido kede magijo maida make emeeme teete kodo gaine tijake.

²⁵Okei Paulus kado buda ka egadimijake kou watija joonitoogi ka serdado migougu kidiipa Paulus eteete mana, „Rum ka me kidi godijai etija, mee? boko petai beu gaa kodaa,” etii.

²⁶Serdado migougu me kidi kou mana juwijake okai serdado ka ibo kidiipa ete-uwijake, eteete mana, „Aki magijo kei taine? Me kidi Rum ka me kidi no!” etii.

²⁷Serdado ka ibo kidi mejake egaado teete mana, „Enidou, aki ki maakidi Rum ka me kidi, mee?” egaado tijake Paulusja „Maakidi” etii.

²⁸Serdado ka ibo kidaa eteete mana, „Ani ki Rum ka me kita mege wedaba ka edajake,” etii. Tijake Paulus eteete mana, „Kodeja ani ki Rum ka napata,” etii.

²⁹Tijake egaado taine bagee kede egaa kodo wo godaa tai; daana serdado ka ibo kidi maija weda gai, Paulus ki Rum ka me kidija okai buda egadimeegi kouja.

³⁰Kodeja aweetaa naago Jahudi ka ijeije eteete mana kodo gaine tijake okai Paulusja buda ekegajake imam iboudo ma, pika-tai bagee utoma kotuu tai etijake Paulus kidi mijo oomejake okei jumaapa eewii.