Read Galela KEI TITAIDO 23 Bible Online

KEI TITAIDO 23 - Galela bible

KEI TITAIDO 23

¹Paulus kidi pika-tai bagee kede peka edomakijake eteete mana, „Ei, noogeima, ani ki Ugatame pekaida enaa dimiidaiga umei tita ito naago to utuuja,” etii.

²Ibo Imam Ananias kidi Paulus watija ka bageepa ebe maida wagei etii.

³Tijake Paulus eteete mana, „Ugatameja kagiitagi, ei, kepo widii tita owaa. Dijo douja manaidaiga boko napetaine tijake animakipe, mee? tijake dijo douja mana akaije kodo nagetijake etija, mee?”

⁴Kouda joonidaa tipai bagee kedaa eteete mana, „Aki Ugatameja Ibo Imam kidi ewidogija, mee?” etijake

⁵Paulus eteete mana, „Ei, noogeima, okai Ibo Imam kidi ani ewo gaaga; kapogeije ebijamakita kouja: Akija bagee migougu me kidi te ewidogai.”

⁶Meido kede amoonaato Saduki, amoonaato Parisi, Paulus edojake okai mana ibo eteete mana, „Ei, noogeima, ani ki Parisi ka me, Parisi bagee ka nakebata; bokata bagee anigou mana dimi kotopijawii maida make ko nagaado teete,” etii.

⁷Okai kou mana wegajake Parisi bagee ma, Saduki bagee ma, akaije akaate tai; tijake pika-taida ko okaakai tijawita.

⁸Saduki ka wegai ko, bokata bagee taanigou mana, daana jaetigo-tai bagee na beu, roh na beu; kodeja Parisija wegai ko, kei utoma topai.

⁹Tijake akaije mana ibo potu tai; Parisi jato ka kapogeije epi bagee me ino kede joonidaa tijake eteete mana, „Kii me kidi peu beu. Jaetigo-tai me juwa, roh juwa, mana oowegaagi keetigo ko, kawe dani?” etii.

¹⁰Akaije kodo ibo kijake serdado ka ibo kidi weda gai, okei Paulus eduwajake taipigai, mee? tijake. Serdado kede bida peu ebukigojake serdado owaa duba eewii etii.

¹¹Kou wanee Tuhan kidaa Paulus watija joonidoke tijake eteete mana, „Weda te gai! Aki Jerusalim makiida mana naawegaatege danite aki Rum makiida maija mana naawegai beu kai peu,” etii.

¹²Abata kijake Jahudi bagee ena dimi kepajawijake baita makii, naija agijo juwa, uwo juwa, Paulus wagijake to te nai mana.

¹³Okei me ida mepiija wado kou mana kepajawijake baita makita.

¹⁴Okei imam iboudo ma, me iboudo ma kedeepa uwijake eteete mana, „Inii ke bida peu baita makijawipe, inii Paulus wagijake to naija agijo te nodoune.

¹⁵Kojoka ikii ma, pika-tai bagee ma, serdado ka ibo kidi neetii, okai ikeepa mijo oomei, okai maida make mana kodo euga epeepite igi jakiine puga tijake. Kodeja okai kapa mei beu gaa kodaa inii wagimakaitage,” etii.

¹⁶Kodeja Paulus amakame kidi okeija kepajawita dimi kodo mana juwijake okai serdado ka owaapa wadoujo kijake Paulus ete-uwii.

¹⁷Paulus kidaa serdado migougu me idaana manaa-tijake eteete mana, „Kii joka kidi serdado ka ibo kidiipa ouwii, okai mana etiine tijake,” etii.

¹⁸Okai ebukijake serdado ka ibo kidiipa ouwijake eteete mana.„Ejakimakita me Paulus kidi mana natijake kii joka kidi akeepa oome-tijake nadiimeegi, mana katiine tijake,” etii.

¹⁹Serdado ka ibo kidi gane egojake okejainiinii ouwijake egaado teete mana, „Aki má mana eniine?” etii.

²⁰Tijake wo eteete mana, „Jahudi bagee kede ena dimi kepajawipai, aweetaa Paulus pika-taida oomei kadiimaine tijake, euga epeepite igi jakiine puga tijake.

²¹Kodeja aki te ejuwai; okei me ida mepiija wado ewaneete, naija agijo ma uwo ma te naine baita makijake, Paulus wagijake to; tijake ito kou okei kei taine gaa epeepi timakijake akija enaa mana kadoutopai,” etii.

²²Tijake serdado ka ibo kidaa joka kidi uwii etijake eteete mana, „Aki kou mana eneege kou ko me idaana ma te etii,” etii.

²³Serdado ka ibo kidi serdado migougu wija manaa-tijake eteete mana, „Serdado muto mepiina ka wii epeepi timakai, daana kuda jago muto gaati ka wija, daana woja jago muto mepiina ka wii, wanee djam Sembilan Kaisaria uwiine tijake.

²⁴Daana Paulusja age kuda maija jajaikai, tijake kojáá peu kidi Gubernur Pelik kidiipa ouwii,” etii.

²⁵Tijake okai kii dani kapogeije ebijai:

²⁶„Ani ki Kelaudius Lisias kidaa enauto Gubernur Pelik kidiipa kojáá kateega.

²⁷Me kidi Jahudi bagee ejakimákijake wagiine jato ani ki serdado ma mejake ejakimakai, okai Rum ka me kidi juwijake.

²⁸Okei akaije ooteete mana kodo ani gaine tijake okeija pika-taidaapa mijo ouwii.

²⁹Okeija ka dijo douja manaido okei akaije ooteete ani dou; tijake wagii juwa, wanee owaa duba ejakimakai juwa, mana ko beu.

³⁰Tijake me ewaneete mana me ka enijake ani okai kou gaa kodo akeepa ebadikumii; akaije ooteete bagee maija aki jumaapa mana pitokai etijake.”

³¹Tijake serdado kede etita danite Paulus ebukijake wanee jato Antipateris ouwii.

³²Aweetaa naago kuda jago bagee Paulus ouwe-tijake ejaikijake serdado kede owaapa metato uwii.

³³Okei Kaisaria dakii tijake kapogeije kodo Gubernur kidiipa menii, daana Paulus maija okai jumaapa oomei.

³⁴Kapogeije ebatijake okai kawi ka maki dokoo ka me kidi egaado tai. Okai Kilikia ka me kidi juwijake

³⁵eteete mana, „Akaije kateete bagee kede mejake akija mana kodo kajuwaita,” etii. Tijake Herodesja ibo owaa duba ejakimakai etii.