Read Galela KEI TITAIDO 25 Bible Online

KEI TITAIDO 25 - Galela bible

KEI TITAIDO 25

¹Pestus kidi okaija dokoo wadoujo kijake uno wido wadouto okai Kaisaria make Jerusalim wado uwii.

²Imam iboudo ma, Jahudi ka iboudo ma, Paulus akaije mana kodo eti-menii.

³Okei Pestus ediimigoo to tai, Paulus Jerusalim manaa-tetita tijake; okei ita maida ewanaine mana kepajawita, wagiine tijake.

⁴Kodeja Paulus kidi Kaisaria makiida ejakimakita okai etii, daana okai maija egaa kodo uwiine.

⁵Tijake eteete mana, „Okai kouja ikii jupi ka ibo bagee ani ma enaimo jamo uwiitage, tijake me kidi peu keetigo ko okei ijeije etai enaa,” etii.

⁶Pestus kidi okeepa uno waguwo juwa, gaati juwa, wado umii beu tijake okai Kaisaria jamo uwii. Aweetaa naago okai boko petaida animakijake Paulus kidi aneepa oomei etii.

⁷Okai mejake Jerusalim make mijo meta ka Jahudi bagee kede ebobi-motijake peu mana wedaba ijeije etai, kodeja mana kodo maakodo juwa, puja juwa, ewo.

⁸Paulus akaato kegaate mana, „Ani Jahudi ka dijo douja mana maida make peu beu; daana Ugatameja owaa juwa, Kaisar juwa, maida make peu beu.”

⁹Kodeja Pestus kidi Jahudi bagee ideide etijawiine tijake Paulus kidiipa eteete mana, „Ide, mee? Jerusalim wado uwijake kouda make ko ani jumaapa boko kaapetai,” etii.

¹⁰Tijake Paulus eteete mana, „Ani ki Kaisarja boko petaida jooni-topa, ani boko napetajaida; kodeja Jahudi bagee maida ani ena ma peu beu, aki kidi na epi.

¹¹Ani peu kei tipa ko, daana peu maida make nagija keetigo ko, ani te boka-tijake ubaate ko beu; kodeja okeija ka ijeije natai manaido kou puja keetigo ko, meena ma okeepa te naekegajawija. Ani Kaisarja boko petaida kadiimai,” etii.

¹²Pestus kidi okaija pika-tai bagee ma mana wegajake Paulus kidiipa eteete mana, „Aki Kaisarja boko petaida nadiimeege; aki Kaisar kidiipa uwiitage,” etii.

¹³Uno wija wido umijake maki jakimake-tai me Agerippa kidi ma, Bernike ma, Kaisaria dakii aatai, Pestus kidiipa oojaumidokaine tijake.

¹⁴Okejai uno ewaga oojaumidokijake Pestus kidi Paulus maida make mana kodo maki jakimake-tai me kidiipa eti-menii, eteete mana, „Ejakimakita me idaana topi, Pelik kidaa ejaikita.

¹⁵Ani Jerusalim toojogo gaa imam iboudo ma, Jahudi ka iboudo ma, okai maida make mana eneemegai, daana boko japetai nadiimai.

¹⁶Anija etii ko, Rum bagee ka me idaana te eekegajawija, kodeja ijeije etita me kidi ijeije eteete bagee ma akado tijake to, akaato mana kodo kega-tita tijake.

¹⁷Okei jakai kotuu timakijake ani kuuto te tijake aweetaa naago boko petaida animakijake me kidi manaa-tai.

¹⁸Ijeije etaine bagee kede joonidaa tijake, anija gata ka peu manaido ijeije etai beu tita.

¹⁹Kodeja okeija ka migaakobe tei tita ijeida maida make akaije ootai mana kodo, daana me idaana eka ki Jesus maida make; kii me kidi bokata, kodeja Paulusja mana ko okai ija topi.

²⁰Ani kei manaido igi jakii kaga gajake okai Jerusalim wado uwii ide, mee? egaado teemega, kouda make ko kei manaido boko peta tita tijake.

²¹Kodeja okai Kaisarja boko petaida nadiimijake serdado kede ejakimakai eteemega, ani Kaisarpa ebadikumiita gaa to.”

²²Tijake Agerippa kidaa Pestus eteete mana, „Ani na kii me kidi mana kodo ejuwaine kodaa,” etijake Pestus wo eteete mana, „Aweetaa aki ejuwaitage kojoka,” etii.

²³Aweetaa naago Agerippa ma, Bernike ma, nadodowei manaidaiga aamejake serdado ka iboudo ma, kou makiida ka me iboudo ma enaimo mana boko petaida kodaa wadoujo kai. Tijake Pestusja mana etijake serdado ka Paulus oomei.

²⁴Tijake Pestus wegaate mana, „Ei, Agerippa ibo kidi, jakai inii ma enaimo meege bagee ma, ikii me kidi edooga, Jahudi bagee utoma Jerusalim makiida ma, jakai ma, okai maida make eneetegai, okai ume-wo ko peu kodo emeeme tijake.

²⁵Kodeja okaija kei tita agijo maida make wagimakija agijo ani ena ma jadomakai beu keega. Daana okai kidaa Kaisarja boko petaida nadiimeemegi kouja ani ebadikumiine.

²⁶Kodeja okai maida make mana anija ibo kidiipa kapogeije ebijaine tijake mana ko beu topa. Okai kouja ani ikii jumaapa oomeega, daana epauto ko aki jumaapa, ei, Agerippa, inii igi ejakimakijake ko, ani ebijaine mana kodo ewaa ke-tita.

²⁷Anija gai ko, ejakimakita me idaana ebadikumijake ijeije etai manaido ewaida jaawii beu kou ko dimi beu kojoka gaaga,” etii.