Read Galela KEI TITAIDO 28 Bible Online

KEI TITAIDO 28 - Galela bible

KEI TITAIDO 28

¹Inii enaida kijake uwouja okogo eka ko Melite inii gai.

²Kou makiida ka bagee kede needadai umina; okei bodija dagumijake mei enita, geijo ma edi ma kouja.

³Paulus kidi pukugu pija mojake bodija jojawijake jina idaana tani ka podomijake Paulusja gane maida dadoke tai.

⁴Tota bagee kede jina kidi Paulusja gane maida dadoke kodo dojake okei kede wegaate mana, „Beu ma ko beu, me kidi me wagita. Okai maikai duba make pipikadoke kodeja abu pai bokouto kodaa ume-wo te-tijake ejaikai beu,” etii.

⁵Paulus kidi jina kodo bodija duba kigi atijake didi beu tita.

⁶Okeija ka gai ko, okai ejaipagi juwa, mijo boka-taipagi juwa, gai. Kodeja doutou umina tijake okai peu kai beu tijake okeija ka dimi ko akabetoke tijake Paulus kidi ugatame kidi ki egai.

⁷Okai kou kapauto uwouja okogo ka ibo eka ki Pubelius kidaa mudeido. Okai nijakimakijake uno wido neeumiwei enii.

⁸Pubelius nakame kidi gobi ma, emo ba ma ka pakutitoojogo; Paulus edou uwijake sembahjang jatai; gane okai maida jamakijake didi beu jaawii.

⁹Kou kei tijake kou makiida ka didi bageido kede mejake beu jaawita.

¹⁰Okei ibo nijaikai umina; inii komaiga uwiine jato iniija gai peu agijo utoma nijamatakijawii.

¹¹Agoo wido umimakijake inii Iskandaria ka kapal komaiga uwii; kii ke wijaapa Kastor ma Poluk ma imaato tegee edota; oo uwa kou makiida tomakita.

¹²Inii Sirakusa dakii tijake uno wido umidokii.

¹³Kouda make ko bobi-motijake Regium dakii tai. Aweetaa naago kojaa bou pupugu tijake wijaume jato inii Putioli dakii tai.

¹⁴Kouda kodaa inii enakeneka bagee edomakijake uno pituwo okei ma oume-tijake nidiimai. Tijake inii Rum makiida uwii.

¹⁵Kouda ka enakeneka bagee kede inii maida make mana juwijake inii nibukaine tijake Apius akaada te-taida ma, Edataida Wido ma mei. Paulus edojake okai Ugatame nagajaweege etijake kegepa tipinimakai.

¹⁶Inii Rum makiida wadoujo kijake Paulus kidi okai kidaa owaapa ume-tijake ejaikita, ooto-tai serdado kidi ma enaimo.

¹⁷Uno wido umijake Jahudi ka iboudo kede mei etii. Okei kotuu timakijake Paulus eteete mana, „Ei, noogeima, iniija bagee ma, iniija aijaane muumaane ka nijamakita ka iniitodo ma ani jaekagumai beu kodeja Jerusalim makiida najakimakijake Rum ka gane duba kita.

¹⁸Okei igi najakijake najaikaine dimi gai, nagii mana nadomakai beu kouja.

¹⁹Kodeja Jahudi bagee kede be gajake ani Kaisarja boko petaida ediimai beu kai peu; anija bagee ijeije etaine tijake ko beu kodeja.

²⁰Okai kouja ikii jakai mei kidiimeega, mana keewegaine tijake; Israilja kotopijawita dimi maida make ko pute buda ki nagadimimakijake topa ko,” etii.

²¹Tijake okei eteete mana, „Aki maida make mana Judea make inii kapogeije motii beu tita, daana jakai meta bagee kede peu mana aki maida make wegai beu tita.

²²Kodeja akija dimi kodo inii juwiine; kii ka mana kodo kiida kouda ewidogita inii epi kouja,” etii.

²³Okei agapeena jatogijawijake me wedaba okaija owaapa mei. Okai abata make uwaataa to mana kodo jawegakumii, Ugatameja jakimakita makiida mana kodo jawegaate; Musaja dijo douja mana ma, tikauwa ka gokobaki tijawiidaiga wegai tita bageeja mana ma go-motijake Jesus maida make epaapa etijawiine tijake.

²⁴Okaija wegata mana kodo me ino maakodo gai, daana me ino kede maakodo gai beu tita.

²⁵Okei kede akaije akaate tijake uweetigo gaa Paulus eteete mana, „Rohulkudus maa kou tikauwa ka gokobaki tijawiidaiga wegai tita me Jesaja kidaa ebeidaiga ikiija aijaaneepa etita mana ko:

²⁶Kou bageepa uwijake naaetii, Ikii maa kou juwiita, kodeja te gamakai, Daana ikii maa kou douta, kodeja te domakai;

²⁷Kou bageeja ka kegepa ko bida kita kouja; Gapa ko udo kijake gapa daba kita; Peka ko bugumita; Okei peka ka domakai na kojoka, Daana gapa ka juwijake Daana kegepa duba gamakijake Ani beu jaawe-tijake aneepa wouga kai na kojoka.

²⁸Okai kouja, gai, Ugatameja ajii bokouto kou ko ojaa bageepa wo ebadikumita; tijake okei juwiitai.”

²⁹Okai kou mana etijake Jahudi bagee kede uweetigo akaije akaate ma uwii.

³⁰Paulus kidi okai kidaa edata owaa duba taun wija umii; okaapa megoo tei tita bagee utoma okai ebukijake

³¹Ugatameja jakimakita makiida mana kodo eti-menii; Tuhan Jesus Keristus maida make mana kodo uu peu kidi meido etopai, me ka beu te etijake.