Read Galela KEI TITAIDO 5 Bible Online

KEI TITAIDO 5 - Galela bible

KEI TITAIDO 5

¹Me idaana eka ki Ananias ma, jagamome Sapira ma, okejaija tumaana agijo kaa aatai.

²Jagamome maija epiidaiga motita megeido paateena makijake, paateena to eti-awitaido jumaapa menigou.

³Kodeja Peterus eteete mana, „Ei, Ananias, magijo ka Teege ka akija-kegepa kadokina tijake aki Rohulkudus puja eukai? tijake maki ageja kodo paateena to makipe.

⁴Kaa tai beu gaa kodo aki ipuwe, beu, mee? Daana kaa tijake maija akija gaja to kei tija beu, mee? Magijo ka kii agijo kegepa duba kei timakipe? Aki meepa puja eukeege ko beu, kodeja Ugatameepa,” etii.

⁵Ananias kou mana kodo juwijake okai mijo boka-tai. Kou mana, kodo juwita bagee utoma weda umina okei maida kai.

⁶Jokaagaido joonijake etonai, tijake edokijake emakigou.

⁷Ibopo tou beu gaa kodaa jagamome wadoujo kai, kei tipa mana juwii beudaiga.

⁸Tijake Peterus eteete mana, „Enidou, maki kodo kei mege kei to aamotipa, mee?” etijake okaija, „Ii, kei to,” etii.

⁹Kodeja Peterus eteete mana, „Kawe dani tijake ikai ena dimi aakepajawijake Tuhanja Roh kodo egaado aateega? Edodou, akuwaka emakeegai bageido damoutoopa topai. Okei juwouda kadokaipigai,” etii.

¹⁰Okai kou gaa kodo Peterus jumaapa okai mijo boka-tai. Jokaagaido wadoujo kijake okai boka-toojogo edou. Tijake edokijake jameme watija emakigou.

¹¹Maakodo gai uguupuguu utoma weda umina tai, daana kou manaido juwita bagee utoma maija.

¹²Dou beu agijo ma, ego takuu takuu agijo ma wedaba, me jupiida eti-awitaido ka gane ka ewaa awii. Okei utoma ena dim to kepajawijake Sulemanja Akagau kotuu tigoo.

¹³Joko kaido me idaana ma okei ma enaimo kai uu beu, kodeja meido kede ibo ejaikai.

¹⁴Daana me umina Tuhan maakodo egai, jame jagamo, amo motii-motii, wado motii-motii te-wado.

¹⁵Tijake didi bagee ita maida oopodomijake, uno umii kejageida ma, eba maida ma emakijake-tai. Peterus jawi-toojogo lo okaija ajá kodo okei jupi ka meena maida kaipiga, mee? titaida ka.

¹⁶Jerusalim bobe ka maki okogoopa make maija meido kotuu timakai. Didi bagee ma enija jago bagee ma oomejake utoma didi beu jaawii.

¹⁷Kodeja Ibo Imam kidi ma, okai ma enaimo bagee ma, kou ko Saduki bagee kede kumi umina gajake joonidaa tai.

¹⁸Okei eti-awitaido ejakimakijake wanee owaa duba amoujo eewii.

¹⁹Kodeja wanee jato Tuhan jaetigo-tai me idaana wanee owaa damo jakebajake epodomijawii, eteete mana,

²⁰„Ugatameja owaapa joonidaa tijake kii ajii tai ka e mana te mana maida make meidoopa eti-menii,” etii.

²¹Kou mana juwijake abata digii Ugatameja owaa wadoujo kijake meido etopai. Ibo Imam ma okai ma enaimo bagee ma mejake pika-tai bagee kotuu timakai, Israil ka iboudo maija utoma, tijake eti-awitaido ebuke-tijake wanee owaapa me ebadikumii.

²²Kodeja ebadikumita bagee mejake wanee owaa duba edomakai beu tijake joko etigou, eteete mana,

²³„Wanee owaa umina jekami-toojogo, daana douto-tai bagee damoutoopa toogai kodeja, inii kebajake amoujo me idaana ma edou beu tipe,” etii.

²⁴Ugatameja owaa douto-tai ibo ma, imam iboudo ma, kou mana juwijake gootoki tidaa tai. Magijo potu taita juwa, gajake.

²⁵Tijake me idaana mejake eteete mana, „Dododou, ikiija wanee owaa duba amaawita kede Ugatameja owaapa meido etopeete jooni-topai,” etii.

²⁶Tijake douto-tai ibo kidi ma, joko kaido ma, enaimo uwijake ebukigou, kodeja peepu etai ko beu, meido mogo ka nigiipigai gajake weda kouja.

²⁷Oomejake pika-tai jumaapa ejoonijawii. Ibo Imam egaado teete mana,

²⁸„Kii ekaidaiga umina te etope-tijake inii bida peu kitimakeetege. Kodeja kiija Jerusalim ikiija etopita mana kodo ikii ugo uwikumeetega, daana kii me kidaa emo kodo inii maida nijadokijawiine kei teete,” etii.

²⁹Kodeja Peterus ma, joko ka eti-awitaido ma, wo eteete mana, „Inii me ma ko Ugatame wo ejuwai ko beu kai peu.

³⁰Iniija aijaane muumaane ka Ugatame kidaa Jesus eenigojawii, ikiija ka pija maida edajawijake wageetega kidi.

³¹Okai kii kidi Ugatameja etikaato gane ka wado etige etijawijake jakimake-tai ma, ajii bokouto duwa-tai ma, ejaikita, Israil bageepa tedemai dimi menijake peudo ipa ejaike-tita.

³²Kei manaido inii kei ke mana jawega-tai kede. Kou dani Rohulkudus maija, Ugatameja ejuwai bageepa menita kidi.”

³³Kou mana kodo juwijake kumi umina egajake wagiine dimi gai.

³⁴Kodeja pika-tai duba ka Parisi idaana eka ki Gamaliel, dijo douja mana etope-tai kidi, me ka ibo ejaikita kidi, okai joonijake mijo gaa epodomijawii etimakai.

³⁵Tijake pika-tai kotuupa okaija eteete mana, „Kowaa kei, Israil bagee, kei bagee maida ikii kei taine agijo epeepite gaadowei.

³⁶Kii wagi ki beu gaa kodaa Taidas ewaa kijake, ani ki ibo kijoka mana wegata. Tijake me muto benumi dani eepeta. Kodeja me ka wagijake eepeta bagee wudepapa tidaa tijake epa beu kita.

³⁷Okai wadouto, Galilea ka me Judas kidi okei me egakita gaa ewaa kijake me ino dani okai maida tawajawii. Okai maija peu kijake eepeta bagee wudepapa tikumita.

³⁸Daana ito ki maija, ani kitii, kei bagee ejaikidokii. Kii mana ma, kei tai ma, meepa make keetigo ko, peu kaita.

³⁹Kodeja kou danite epauto Ugatameepa make keetigo ko, ikii daba te ejaikaita. Kodeja kou danite ikii Ugatame ma akaije ooteete kidoke na kojoka.” Etijake pika-tai kotuu okaiia mana jajuwii.

⁴⁰Eti-awitaido kede manaa-tijake godijai etai. Tijake Jesus ekaidaiga mana te wega-tijake etimakijake ejaikai.

⁴¹Tijake okei pika-tai kotuu jumaapa make ideide ma podomai. Jesus eka maida make peepu etita mana kodo dokimakija no egata kouja.

⁴²Agapi gakita Ugatameja owaapa me etopai, daana me ka owaapa maija, Jesus ki Keristus kidi mana wudii to tigoo.