Read Galela KEI TITAIDO 6 Bible Online

KEI TITAIDO 6 - Galela bible

KEI TITAIDO 6

¹Okai kou wagi kodo etope-taido abuma ke-wado tidaa tijake, Jahudi bagee Gerika mana wega-tai kede Iberani bagee kitigi motigi etai, okeija mijáá jagamoudo agapi gakita ka wudii gaa inimugi etijawita kouja.

²Tijake wija ma gaati kede etope-taido utoma kotuu etijawijake eteete mana, „Inii naija agijo wudiida mana kouja Ugatameja mana wudii ko inimugi te tija.

³Okai kouja, kowaa kei, noogeima, ikii jupi enaa egata bagee me ida pituwo ewitokai, Roh ma dimi boko ma ka ebetume tita, kii kei tai maida kiija douto-tai bagee eewiine tijake.

⁴Kodeja inii ke sembahjang ma, mana wudii ma, to tigoo taitage,” etii.

⁵Okeija etita mana me utoma enaa gajake Stepanus ewitokai, maakodo gai ma, Rohulkudus ma ka ebetume tita me idaana kidi. Daana Pilipus ma, Prochorus ma, Nikanor ma, Timon ma, Parmenas ma, Nikolaus ma. Kii kidi Antiochia makijo ka dijo do-tijake meta me.

⁶Kei kede eti-awitaido jumaapa ejoonijawijake sembahjang jatai, gane okei maida jamakijake.

⁷Ugatameja mana ugo uwikumita. Jerusalim makiida etopetaido umina wedaba kidda tai; daana imam wedaba maija maakodo gai mana kodo jakimakai.

⁸Stepanus kidi jikoo bokouto ma, bida bokouto ma, jaduwajawita kidi me jupi ego takuu takuu agijo ma, ibo dou beu agijo ma kei tigoo.

⁹Tijake sembahjang owaa ka bagee wija wido, kou ko Libertini ka sembahjang owaa ebatijawita kodo, daana Kireni ma Iskandaria ma ka, daana Kilikia ma Asia ma ka bagee, okei joonijake Stepanus akaije ootai.

¹⁰Kodeja okaija dimi boko ma, Roh ma ka wegata mana kodo okei akaije te ootimake.

¹¹Okai kouja meido kii dani wega-tijake okei monoo etai, eteete mana, „Musa ma Ugatame ma ewidogeete mana inii ejuweemege,” etii.

¹²Tijake okei meido kede jigi jigi etai, daana iboudo ma, kapogeije epi bagee ma. Tijake okei Stepanus okogoka etijake ejakimakai. Ejakimakijake ko pika-tai jumaapa ouwii.

¹³Okei puja jakubai bagee ewaa awii, eteete mana, „Kii me kidi te duwajake dáida kiija ma, dijo douja mana ma ewidogigoo teigi.

¹⁴Kii dani wegata mana inii ejuweemege kouja: Nazaret ka me Jesus kidi kiida kiija bogomijawijake Musaja mijo nijamakii makii iniitodo akapaka tijawiitagi mana,” etii.

¹⁵Pika-tai bagee edootaa tijake, Stepanus ebepeka jaetigo-tai me ka ebepeka dani tidoke edou.