Read Galela KEI TITAIDO 8 Bible Online

KEI TITAIDO 8 - Galela bible

KEI TITAIDO 8

¹Stepanus wagimakita kou ko Saul kidi ide gai. Okai kou naago kodo Jerusalim makiida ka maakodo gai uguupuguu umina peepu etai potu tidoke. Okei utoma Judea dokoo ma, Samaria dokoo ma, wudepapa timigii, kodeja eti-awitaido ke beu.

²Dijo do-tai bagee kede Stepanus oka emakeete jege umina etai.

³Kodeja Saul kidi maakodo gai uguupuguu peepu umina etai. Owaa gakita wadoujo kijake jame beu jagamo beu ganeuto egojake wanee owaa duba amaawigou.

⁴Wudepapa tidaa tita bagee kede uweetigo mana wudina tai.

⁵Pilipus kidi Samaria ka makijo jamo uwijake Keristus maida make mana eti-menii.

⁶Me wedaba ena dimi kepajawijake Pilipusja mana epeepite dimi gai, okaija ibo dou beu agijoudo kei tita kodo juwii ma, dou ma tijake.

⁷Nokii enija jago bagee wedaba kede enija kuutakaa emeeme tijake podomai. Daana ekogadaa na, wajage ma, wedaba beu jaawii.

⁸Okai kouja kou makiida ideide umina.

⁹Kodeja me idaana eka ki Simon, tika make kou makiida pijaije awe-tai kidi toojogo. Samaria bagee utoma eepa-tai, okai akaato ibo awijake.

¹⁰Okei utoma okai maida to etawajake wegaate mana, „Kii me kii ke Ugatameja bida agijo kidi, kou ko bida bokouto wegaigai kodo.”

¹¹Okei utoma ejakimakai, tika kodaa make okai ego takuutakuu umina etijawii kouja, pijaije manaido maida make.

¹²Kodeja okei Pilipus kidi maakodo egajake Ugatameja jakimakita makiida mana ma, Jesus Keristus eka mana ma, etimenijake okei baptis tai, jame beu, jagamo beu.

¹³Simon maija maakodo gai. Okai baptis tijake Pilipus ma enaimo to tou. Ego takuu takuu agijoudo ma, dou beu agijoudo ma kei tita kodo dojake okai ego takuu takuu tai.

¹⁴Samaria dokoo Ugatameja mana jakimakita mana kodo Jerusalim makiida ka eti-awitaido kede juwijake, Peterus ma, Jahja ma okeepa ebadikumii.

¹⁵Okejai mijo aamejake Samaria bagee sembahjang oojatai, okei Rohulkudus go-mote-tijake.

¹⁶Me idaana maida ma mijouwe kai beu kouja, kodeja Tuhan Jesus eka dubaiga to baptis etita.

¹⁷Tijake eti-awitaija kede gane okei maida aajamakijake okei Rohulkudus go-motii.

¹⁸Eti-awitaija kede gane aajamakijake Roh go-motita mana kodo Simon kidi dojake mege menidou,

¹⁹eteete mana, „Kou bida bokouto kou ko ani naduwajawii; kou danite me idaana gane jamakidopa ko, Rohulkudus gomote-tita kojoka.”

²⁰Kodeja Peterus eteete mana, „Akija mege ki aki ma enaimo peu kai, Ugatameja ojaa niimija agijo kodo mege ka motija gaage kouja!

²¹Kii mana muto kiija aki ma mana kato tou beu, Ugatame pekaida kegepa doodoo beu kouja.

²²Okai kouja akija peu maida make tedemijake Tuhanpa sembahjang ediimai, akija kegepa dimi kodo ipa kajaikija beuje tijake.

²³Ani kadooga kouja, aki ki nokii dimi ka digi kadokijake peu ka kagadimimakijake tope,” etii.

²⁴Tijake Simon wo eteete mana, „Tuhanpa sembahjang natai, akija eneege mana kodo ani maida te ke-tijake,” etii.

²⁵Okejai mana oojawegajake, daana Tuhanja mana aawudikumijake, Jerusalim wado auwai. Samaria ka maki okogo wedaba ajii mana oojawegana.

²⁶Kodeja Tuhan jaetigo-tai idaana kidaa Pilipus eteete mana, „Jamaatouga uwii, Jerusalim make Gaza mijo uwe-tai itaiga,” etii. Kii ita geeta gaata.

²⁷Okai joonidoke tijake ita uwii. Habsji ka me idaana udo gobata me kidi, Habsji jakimake-tai me Kandake ka ibo jakei te-tai kidi, okaija aagijo taagijo jadouto-tai me kidi, okai Jerusalim makiida sembahjang tigou.

²⁸Joko meetigo, kuda komaida animakijake mana wudei tita me Jesajaja kapogeije ebateetigo.

²⁹Tijake Roh kodaa Pilipus eteete mana, „Kou kapauto uwijake kuda koma kidi ma enaimo kai,” etii.

³⁰Tijake Pilipus tibigi uwijake, mana wudei tita me Jesajaja kapogeije ebateetigo juwii. Tijake egaado teete mana, „Aki gaage, mee? ebateege mana kodo,” etii.

³¹Tijake wo eteete mana, „Ani kawe dani gaja, me ka boko te peta-naimi-toojogo ko?” Etijake okai Pilipus ediimai, matakijake okai ma aanimake-tijake.

³²Kapogeije duba ka ebateete mana, kii dani: Domba ogo duwaida dani bukaa ouwita, Daana domba joka ijo bugijaidaapa mana beu kidi danite, Okai kou dani tijake mana godai beu.

³³Okai daba ejaikita gaa boko japetai beu. Okaija wagi ka bagee meija wegamakija? Dimi mana kodo makiida make jamotigota kouja.

³⁴Tijake udo gobata me kidaa Pilipus eteete mana, „Mana wudei tita kidaa kou mana wegai ko, meime maida make enidodou. Akaato maida make, mee? me ino maida make,” etii.

³⁵Tijake Pilipus mana godajake kii kapogeije maida ookajake Jesusja ajii mana eti-menii.

³⁶Okejai ita maida auweetigo gaa uwoopa dakii aatai. Tijake udo gobata me kidaa eteete mana, „Dodou, uwo topi! Baptis natai ko magijo ka wo godoke?”

³⁷Etijake Pilipus wo eteete mana, „Kou danite aki kegepa puki ka maakodo gape ko, enaa kodo ko.” Etijake wo eteete mana, „Ani maakodo gai, Jesus Keristus kidi ki Ugatame Joka,” etii.

³⁸Kuda koma duwajawii etijake okejai wija uwo duba mijouwe aakai, Pilipus ma, udo gobata kidi ma, tijake baptis etai.

³⁹Okejai uwo duba make wadouwe aakijake Tuhanja Roh kodaa Pilipus ebuki-motijake udo gobata kidaa Pilipus edou beu. Tijake ita woja ideide ma uwii.

⁴⁰Pilipus Asdod makiida kodaa me ka edomakita. Koudaiga jawijake maki okogo utoma duba ajii mana wudii. Kaisaria dakii tita gaa to.