Read Galela KEI TITAIDO 9 Bible Online

KEI TITAIDO 9 - Galela bible

KEI TITAIDO 9

¹Kodeja Saul kidi wedaago mana wegaa wegaa; ego akatakime tijawijake Tuhanja etope-taido wagiine tijake Ibo Imampa uwii.

²Damsjik ka sembahjang owaapa kapogeije dokiine tijake ediimai, kou Ita eepe-tai bagee jame jagamo edomaki-toojogo ko buda egadimijake Jerusalim oomeine tijake.

³Okai ita uweetigo Damsjik kapauto kijake okai kou gaa kodaa opa maida make awe peijo ka eganimakai.

⁴Okai maki maida apaipu tidoke tijake mana wuu juwii, kei teete mana, „Kowaa ke, Saul, Saul, magijo ka ani peepu natai?” etii.

⁵Tijake wo eteete mana, „Aki ki meime? ei, Tuhan,” etijake wo eteete mana, „Ani ki Jesus, akija peepu nateete me kidi.

⁶Kodeja anigodoke tijake kou maki okogo wadoujo kai. Kouda kodaa make akija kei taitage mana kati-kaniita kojoka,” etii.

⁷Okai ma enaimo uweete bagee mana tagu joonidaa ti-toojogo, mana ko juwijake kodeja me idaana ma edou beu.

⁸Saul kidi apaipu titaida make anigou. Okai peka kadijake tumaana ma dou beu. Me ka gane egojake Damsjik makiida wadoujo ookai.

⁹Agapi wido okai peka dou beu, daana uwo ma naija agijo ma nai beu.

¹⁰Damsjik makijo etope-tai idaana eka ki Ananias kidi toojogo. Bagume daniidaiga Tuhanja eteete mana, „Kowaa ke, Ananias,” etijake okaija „Ani ki topa ki,” etii.

¹¹Tijake Tuhan eteete mana, „Anigojake eka ko Doodoo itaapa uwijake, Judas owaapa Tarsus ka me idaana eka Saul kidi eubai. Okai sembahjang teete kijoka.

¹²Me idaana eka Ananias wadoujo kijake okai maida gane jamakii kodo bagume daniidaiga doogi, okai peka domaketijake,” etii.

¹³Kodeja Ananias wo eteete mana, „Ei, Tuhan, kii me ki maida make ani mana wedaba juweiga, akija jimubeu bagee kede Jerusalim make peepu umina etei tita mana.

¹⁴Daana kiija maija imam iboudoja bida boko jaduwajawijake akeeka mana kate-tai bagee kede buda egadimaine,” etii.

¹⁵Kodeja Tuhan wo eteete mana, „Uwi, okai kidi anija ewitokita kouja, ojaa bagee ma, maki jakimake-tai bagee ma, Israil bagee ma, jumaapa aneeka naawegakume-tijake.

¹⁶Daana aneeka maida make gaduwagoo agijoudo ani emuwakaita,” etii.

¹⁷Okai kouja Ananias uwijake owaapa wadoujo kai. Gane okai maida jamakijake eteete mana, „Noogei Saul, Tuhan Jesus kidi, aki metaidaiga akeepa ewaa kita kidaa nabadikumeegi, aki peka domake-tita, daana Rohulkudus ka ebetume ke-tijake,” etii.

¹⁸Tijake okai kou gaa kodo maija peka maida make kopu dani gokodidoke tai, tijake okai peka domakai. Tijake okai joonijake baptis tai.

¹⁹Okai noiake bida kai. Tijake naago wija wido okai Damsjik ka etope-taido ma oumidokii.

²⁰Okai kou gaa kodaa sembahjang owaido duba Jesus kidi ki Ugatame Joka kijoka mana wegai.

²¹Ejuwita bagee utoma ego takuu takuu tijake kei teete mana, „Beu mee? kii eka manaa-te-tai bagee Jerusalim makiida peepu etei tita me kidi. Daana okai kou dimi gajake jakai mei, meido buda egadimijake imam iboudoopa ouwiine tijake,” etii.

²²Kodeja Saul kidi euga bida ke-wo tai, tijake Damsjik ka tota Jahudi bagee kede mana tagu etijawii, Jesus ki Keristus kidi mana epeepite eti-menijake.

²³Uno wedaba umijake Jahudi bagee ka wagiine mana wegai.

²⁴Kodeja okeija wegata mana kodo Saul epi kai. Okei agapi wanee wagiine tijake eda damoutoopa eewanai.

²⁵Kodeja etope-taido kedaa wanee jato ebukijake edu tapuja duba mogo eda maida make mijouwe eewii.

²⁶Jerusalim dakii tijake etope-taido ma enaimo kaine gaado tai, kodeja okei utoma weda egai, okai etope-tai idaana keegi egai beu tijake.

²⁷Kodeja Barnabas kidi ebukijake eti-awitaidoopa ouwii. Saulja ita maida make Tuhan edojake Tuhanja mana oowegata kodo eti-menii. Daana Damsjik makiida make Jesus ekaidaiga uu peu kidi mana wegata kodo maija.

²⁸Okai kouja okei jupi Jerusalim makiida uwina jawina tigoo.

²⁹Tuhan ekaidaiga uu peu kidi mana wudikumii. Okai Jahudi ka Gerika mana wegai bagee ma mana oowegajake mana akaije ootai. Kodeja okei wagiine tijake dimi gai.

³⁰Enakeneka bagee kede epi kijake Kaisaria jamo eumigojake Tarsus makijoopa uwe-tijake ebadikumii.

³¹Okai kouja Judea ma, Galilea ma, Samaria ma ka maakodo gai uguupuguu muka muka kidoke tijake enaidaidai to tai. Tuhan weda egai dimiidaiga ma, Rohulkudus ka agaagiidaiga ma, meido uwina jawina tijake ajaago tidaa.

³²Peterus okei jupi kiida kouda uwina teetigo gaa Lidda ka jimubeu bageepa umidokii.

³³Kouda kodaa me idaana eka Eneas ma akado tai. Okai taun waguwo ekogadaa tita kouja uno umii kejage maida totai.

³⁴Peterus eteete mana, „Kowaa ke, Eneas, Jesus Keristus kidaa enaa kaawii. Anigojake uno umii kejage epeepi tai,” etijake okai kou gaa kodo okai anigou.

³⁵Lidda ma Saron ma maki utoma ka bagee kede dojake Tuhan ejakimakai.

³⁶Joppe makijo etope-tai idaana eka Tabita, kou ko Dorkas kodo toojogo. Okai enaa agijo ma, ipa dimi gajake agijo ma to kei tigoo te-tai.

³⁷Kou naagoudo okai didi tijake bokai. Okei uwo ewitogijake wadojake ka kuguuda edoke-uwii.

³⁸Lidda makijo ko Joppe ma kapauto kouja, Peterus kouja topi mana kodo etope-taido juwijake me ida wija ebadikumii, ediimeete mana, „Ipee te tijake ineepa mei kadiimeegai, nijaetii,” etii.

³⁹Okai kouja Peterus joonidoke tijake okejai ma enaimo uwii. Okai dakii tijake wadojake kuguuda ouwii. Mijáá bageido utoma jege teete okai watija joonidaa. Daana Dorkas okei ma enaimo toojogo gaa ka japuumita kagabaido kodo emuwakai.

⁴⁰Kodeja Peterus okei utoma epodomijawijake bado donijake sembahjang tai. Tijake bokata me doodouga wouga kijake eteete mana, „Ei, Tabita, anigou.” Okai peka kadidoke tijake Peterus edojake animakai.

⁴¹Peterus gane pido atijake ejoonijawii. Tijake jimubeu bagee ma mijaido ma manaa-tijake Dorkas ija kijake okeepa eewii.

⁴²Kou mana kodo Joppe maki utoma ugo uwikumijake me wedaba Tuhan maakodo egai.

⁴³Peterus naago wedaba Joppe makijo tou, sapi kado kei te-tai me idaana eka Simon kidi ma enaimo.