Read Galela RUM 1 Bible Online

RUM 1 - Galela bible

RUM 1

¹Ani ki Paulus kidi, Jesus Keristus jakei te-tai me kidi; etiawita me ke-tijake mana natita, daana Ugatameja ajii mana maida make aniniinii natijawita;

²ajii mana kodo tika kodaa Ugatameja nijatogijawita, gokobaki tijawiidaiga wegai tita bagee ka ebeidaiga, jimubeu ugata manaida kodaa;

³Jokame kidi maida make, me ma jatouga Daud epaidaiga,

⁴daana jimubeu Roh jatouga Ugatame Joka kidi bidaidaiga ewaida eewita, bokata bagee jupi make anigota manaidaiga. Kii ke e boko te boko nijaduwa-tai me Jesus Keristus kidi.

⁵Okai maidaiga jikoo bokouto nijaduwajawijake eti-awita bagee kede nijaikita, me jokaija jupi meido maakodo gajake juwidoke te-tijake emejawiine, okaaka maida make;

⁶Kei bagee jupi ikii maija Jesus Keristus ipuwe ke-tijake mana kitita.

⁷Ugatameja ipa egata bagee kede Rum makiida kijamakii, jimubeu bagee ke-tijake mana kitita: Jikoo bokouto ma, muka-muka bokouto ma, Iniitai Ugatame kidaa, daana Tuhan Jesus Keristus kidaa boko kijaduwajawii.

⁸Edoga kidi anija Ugatame kidi ani Jesus Keristus maidaiga muta etuwai ikii maida make, ikiija maakodo gai kodo uwoje makije wudigi tikumita kouja.

⁹Ugatame Joka ajii manaida kodaa anija dimi ka jakei te-tai; Ugatame epi ani te duwajake sembahjang kijakimakai, anija sembahjang tija gaa,

¹⁰Ugatameja gata dimiidaiga ita naawadijake ikeepa jawiine kodaa ediimeete.

¹¹Ani kidoune kodaa kogaa umina, ajii manaida ka mana mutoona keewudiine tijake, bo kiwejawiine kodaa.

¹²Kou ko, inii enaimo maakodo gai manaida bo akawejake no te, ikiija maakodo gai ma, anija ma.

¹³Ani ide ikii gai, ei, noogeimaido, ani kigi inoudo ikeepa jawiine gaiga, kodeja ito to wo godoke; ani ikeepa uta duwaine maija, joko ka ojaa bagee jupi danite.

¹⁴Ani ki ebé topa, Gerika bagee maida beu, joko ka bagee maida beu, epi bagee maida beu, ewo bagee maida beu.

¹⁵Kojoka ani jatouga ko, ikii Rum bageepa maija ajii mana kodo kijawudiine kodaa.

¹⁶Ani ajii mana kodo ego gai beu kouja; kou ko Ugatameja bida agijo kodo maakodo gai bagee utoma ajii ti-menija, Jahudi bagee tiga, daana Gerika bagee maija.

¹⁷Okai kou dubaiga Ugatameja maakodo bokouto kodo ewaida awita, maakodo gai epauto ko maakodo ga-wo to, kapogeije ebijata kodo danite: Maakidi me kidi maakodo gaidaiga ajii taitagi.

¹⁸Ugatameja emoge dimi kodo epaawado make nimuwakita, me ka dijo beebu ma, peu ma, maida make, okeija ka peu ka maakodo bokouto kodo mijaapumimakai bagee kede.

¹⁹Ugatame maida make gaja manaido kou ko okeepa ewaida, Ugatameja emuwakita kouja.

²⁰Maki ugamakitaida kodaa make ko okaija te edoja ka ijeida ko ugamakita manaidaiga ewaida gaja, kou ko okaija imo to togoo bida bokouto kodo, daana Ugatame topi kijoka mana kodo. Tijake okei mana tagu.

²¹Okei Ugatame epi kodeja, Ugatame kijoka ibo ejaikai beu tijake muta etuwai beu tita, tijake dimi kodo wogidaa kijake dimi beu kegepa bunita kita.

²²Inii dimi gai epi kijoka mana wegajake dimi beu kita.

²³Peu te kija Ugatame ka ajiipi bokouto kodo okei akapaka tijake peu kija me epoo ebijaabija ti-motii, daana bedo ma, bo wiijago ma, neemina te-tai agijo ma ebijaabija.

²⁴Okai kouja, okeija kegepa ka kibigi dimiidaiga peu kei te-wo tijake Ugatame eekegajawii; tijake okei kede ma jato jimu anijawii.

²⁵Ugatameja maakodo mana kodo okei puja mana akapaka tijawijake ugata agijo kodo migaakobe etai, Ugajawita me kidi komouto, muta etuwaja kidi imo to togoo. Amin.

²⁶Okai kouja nokii ka kikija epauto maida Ugatame eekegajawii; jagamoudo maija kei tija agijo kodo te kei tija agijo akapaka tijawii.

²⁷Daana jameido maija jagamo ma tou kodo jaikijake okei kede kikija epauto akaate; kii ke, jame kidaa jame maida nokii agijo kei tai, tijake peu kodo abu pai mana akaato maida dokijawii.

²⁸Okei Ugatame ejakimakai ko be gai kouja, nokii dimi maida Ugatame eekegajawii, te kei tija agijoudo wo kei taine tijake.

²⁹Okei e peu te peu te-wo; wo uwe, kibigi dimi, me peu eewiine dimi; digi edokai kugo dokita, me wagii, akawage, puja, peu dimi ga-wo, gabouga me ka peudo ewegai,

³⁰me eduwai, Ugatame be egai, epa beu, ibo puga, nadodowei, peu agijo ewaa awii, nakame ukame te ejuwai,

³¹dimi beu, togijawita mana mijo apumijawii, ipa beu, boko peu.

³²Ugatameja mana kodo, kou dani kei te-tai bagee kede bokai enaa mana kodo okei epi kodeja, kou dani kei te-tai to ko beu; kei te-tai bagee kede juma dege-dege etai.