Read Galela RUM 11 Bible Online

RUM 11 - Galela bible

RUM 11

¹Tijake anija etido mana kodo: Ugatame kidaa okaija bagee ekonita, mee? Umina ko beu! Ani ki Israil ka me kidi, Ibrahimja nakebata kidi, Benjamin epaida ka.

²Ugatameja tika kodaa egata bagee kede okai ekonai beu. Elias maida make ugata mana kodo ikii ewo, mee? okai Ugatameepa Israil ijeije etita gaa kodo, kei teete mana,

³„Ei, Tuhan, akija mana wude-tai bagee kede okei wagimakita; akija jo-kanijaida kodo okei wegee kaatikumita; tijake ani kidi to topa, daana nagiine tijake naubaate,” etita.

⁴Kodeja Ugatameja kawe dani wo etita? „Baal migaakobe etai beu bagee me ida tudjuh ribu ani akaato maida make ejakimakita,” etita.

⁵Kou dani ito kii gaa kidi maija jikoo bokoutoudaiga ewitokita jaikitaija topai.

⁶Kodeja jikoo bokoutoudaiga keetigo ko, kei tija manaidaiga ko beu; kei tija manaidaiga naako, jikoo bokouto kodo jikoo bokouto ko beu.

⁷Kojoka kawe dani na ko? Israil ubaate agijo kodo domakai beu tita. Ewitokita ka kede domakita, kodeja joko kaido kede kegepa bida eewita.

⁸Mana ebijamakita kodo danite: Ugatameja ototita dimi menita, Te doune peka ma, te juwiine gapa ma, Ito kii naago kidi to utuuja.

⁹Daana Daudja mana kou ko: Okeija buka naida kou ko boké jajaikai enaa, Gadi ate-tijake, daana taku tuwaida, Abu japa-tijake ko.

¹⁰Okeija peka ko bunita kai enaa, te do-tijake, Daana okeija matoka kodo tudu tijake tou to.

¹¹Kojoka anija gaado tai mana kodo: Okeija kipo tokuu tita kou ko umina jagii tai, mee? Umina ko beu! Okeija ka kipo tokuu kodaa ajii bokouto kodo ojaa bageepa kai, Israil kede digi edoke-tijake.

¹²Okeija ka kipo tokuu kouja makiida maki utoma epaago eewi-toojogo ko, daana okeebu kou ko ojaa bagee kede epaago eewi-toojogo ko, umina kodaa egakimakijake tiki puki etimakijake ko.

¹³Kodeja ikii ojaa bagee kedeepa ani mana kitii. Ani ki ojaa bagee maida make eti-awita me kidi kouja, anija kei tai agijo maida make kobidoke tai.

¹⁴Ani ma bagee kede digi edokai dimi kodo mabiki etijawii, mee? titaida ka, tijake ino dani kede ajii tai kodoopa emejawii.

¹⁵Israil jamo ejaikai manaida kodaa makiida maki utoma dagi jaduwajawi-toojogo ko, joko ebukai kou ko magijo? Ena ma beu, kodeja bokataida make eenigojawii mana kodo to.

¹⁶Ugatameepa menita didee kodo jimubeu keetigo ko, kemo puki kodo maija jimubeu; daana mani kodo jimubeu keetigo ko, kagoudo kodo maija.

¹⁷Kodeja kago ino dani tuwajawijake aki ki buguwa ka zaitun uti kodo kou komouto kawataki-toojogo ko, tijake zaitun utiida kodaa enaimo aki-didee-didee enaa akaja oogo-moti-toojogo ko,

¹⁸kagoudo maida kodaa ibo puga te tai. Aki ibo puga tipe ko, gai! aki kidaa epa jato kodo ejakimakai ko beu, kodeja epa jato kodaa kajakimakai.

¹⁹Akija wegaipage mana ko, „Kagoudo kodo tuwajawita, ani ki kou komouto nawatakijawe-tita.”

²⁰Kou ko maakodo. Okei maakodo gai beu kouja tuwajawita, kodeja aki ki maakodo gaidaiga to-tai. Kojoka ibo puga te tijake weda gai.

²¹Tota kagoudo kodo Ugatame ejaikai beu keetigo, aki maija te kajaikai.

²²Okai kouja Ugatameja ipa bokouto kodo ma, bida bokouto kodo ma gaadodowei: jagii tita bageepa okaija bida bokouto kodo, kodeja akeepa Ugatameja ipa bokouto kodo, okaija ipa bokouto duba aki pigu ti-toojogo ko. Beu keetigo ko, aki maija kaduwai na kojoka.

²³Kodeja okei maija wo ewatakijawiitagi, okeija maakodo gai beudaiga ume-wo beu ki-toojogo. Ugatame kidi bida jago kouja, wo ewatakijawii ko.

²⁴Aki ki buguwa ka zaitun uti maida make kaduwajawijake munita ka uti maida kawatakijawi-toojogo ko, kou ko aki epauto ka ko beu, umina kodaa tota ka kagoudo kodo okei kedaa utiida wo ewatakijawii ko.

²⁵Ikii ewo ko ani ide beu, ei, noogeimaido, kou boone-boone mana kodo, ikii akaato ibo dimi gai na kojoka; kou ko, Israil paateena otomidoke tita, ojaa bagee mei tiki taitaida to.

²⁶Tijake Israil uguupuguu puki kodo ajii taitai. Kapogeije ebijamakita kodo danite: Sion makiida make pipikajawii me kidi ewaa kaitagi; Jakub maida make dijo beebu kodo wouga jaawiitagi.

²⁷Kou ko anija jatogijawita mana kodo, Okeija ka peu kei titaido ani beu jaawiitaida kodaa.

²⁸Ajii mana jatouga okei jape, ikii maida make; kodeja witokai mana jatouga ipa egata, okeija aijaane kede maida make.

²⁹Ugatameja menija agijo ma, manaa-tai ma jamo te jaikija kouja.

³⁰Ikii tika kodaa Ugatame te juwe kodeja ito kou ipa kijaikita, okeija ka te juwe maida make;

³¹okai kou dani maija okei ke ito kou te juwe, ikii ipa kigata maida make ko okei na ipa bokouto kodo go-tita.

³²Utoma kede Ugatameja te juwe manaida kodaa kugu wagimakita, utoma kede ipa egaine tijake.

³³Ketago no! Ugatameja ugo uweuwe dimi boko ma, epi ma. Okaija dimi dimiija te kegamakija no! Daana okaija kei tai takaa takaija te epitado tija no!

³⁴Meime Tuhanja dimi kodo boko petamakita? Meime mana etijake etopita?

³⁵Juwa, meime agijo menita, tijake abu japaja?

³⁶Utoma agijo utoma okaapa make, daana okai maidaiga, daana okaapa wo kai. Ajiipi bokouto okai ipuwe kii kidi imo to togoo. Amin.