Read Galela RUM 14 Bible Online

RUM 14 - Galela bible

RUM 14

¹Maakodo gai kogaagije me kidi ebukai, kodeja kawo kou pijo, kawo kou dá kou, akaije akaije taine tijake ko beu.

²Me ino ka gai ko, utoma naija agijo nai pijo, kodeja maakodo gai kogaagije me kidi weta agijo to nai.

³No-tai me kidaa nai beu me kidi daba te ejaikai, daana nai beu me kidaa no-tai me kidi te ewidogai; Ugatameja ebukita kouja.

⁴Aki ki meime? me ino jakei te-tai me kidi ewidogai ko. Okaija ka Ibo jumaapa okai tou to juwa, peu kai juwa. Okai bida peu kidi toutagi, Tuhan kidaa bida eewijake tojawiitagi kouja.

⁵Me ino ka kii naago kou naago ibo jaikai, kodeja me ino ka ko naago utoma ena kidi to. Me gakita dimi duba epaapa timakai.

⁶Naago kodo dijo do-tai me kidaa Tuhan maida make dijo dou. Daana no-tai me kidaa Tuhan maida make nai, okai Ugatame nagajaweege etii kouja; tijake te naine me kidaa Tuhan maida make te nojake Ugatame nagajaweege etii maija.

⁷Inii jupi me idaana ma akaato maida make to ume-wo beu kouja, daana me idaana ma akaato maida make to bokai beu.

⁸Inii ume-wo tipe, Tuhan maida make ume-wo, daana bokape maija, Tuhan maida make bokai. Kojoka inii ume-wo tipe maija, bokape maija, inii Tuhan ipuwe.

⁹Okai kou maida make Keristus bokajake kou wadouto ija kita, bokata bagee ma, ija bagee ma boko jaduwajawe-tijake.

¹⁰Magijo taine tijake aki keneka kidi ewidogai? Juwa, magijo taine tijake aki keneka kidi daba ejaikai? Inii utoma Ugatameja boko petaitagiida jooniitage kouja.

¹¹Kapogeije ebijamakita kouja: Ani topa kouja, Tuhanja mana, kagu gakita aneepa donimakaitai, Daana eta gakita kodaa Ugatame muta etuwaitai.

¹²Kojoka inii me gakita akaato mana kodo Ugatameepa wo etiitage.

¹³Okai kouja ito make wado akawidoge te neetai, kodeja kou dani dimi neegai: Enakeneka kidi wate-wate te jatai, daana taku te jawejawii.

¹⁴Ani epi, daana Tuhan Jesus pekaida ani epaapa timakai, tumaana agijo ma peu ko beu, kodeja peu gata me kidiipa ko peu.

¹⁵Akija naija agijo kodo maida make aki keneka kidi gaagaa tipi, aki ipa takaidaiga kei tai beu teete. Akija naija agijo kodo maida make peepu te etai, okai maida make Keristus jabokata kouja.

¹⁶Kojoka akija enaa gata agijo kodo me ka peu kodo te kagai.

¹⁷Ugatameja jakimakita makiida kou ko naija agijo ko beu kouja, kodeja maakodo bokouto ma, muka-muka bokouto ma, ideide bokouto ma, Rohulkudus kodoudaiga.

¹⁸Meija kou dani Keristus kidiipa ejuwidoke tipi, Ugatameja juma dege-dege etai, daana me ka enaa egai.

¹⁹Okai kouja muka-muka ma, bo wejawii ma, manaido kodo juma doodoo neetai.

²⁰Naija agijo maida make ko Ugatameja kei tai agijo kodo peepu te jatai. Naija agijo utoma pijo to, kodeja me duwaa-duwaa etijaweete nai ko peu.

²¹Enaa kodo ko, mugee te nai juwa, utaadijo te nai juwa, tumaana agijo ma te kei tai kodo, aki keneka kidi taku tuwai agijo kodo.

²²Akija maakodo gai kodo Ugatame pekaida jakimakai. Ideide no! Kei te-tai agijo maida make akaato ego gai beu me kidi.

²³Kodeja me idaana dimi takaida kijake nopi ko, okai peu kai, maakodo gai epauto ko beu kouja. Maakodo gai epauto beu agijo kou ko peu kouja.