Read Galela RUM 15 Bible Online

RUM 15 - Galela bible

RUM 15

¹Inii bida daniido kede kogaagije bagee ka kogaagije kodo eedadai beu kai peu, akaato ideide te ubajake.

²Inii me gakita inii watija ka bagee ideide nite-tijake neekei tai, bo ewejawiine tijake.

³Keristus maija akaato ideide ubai ko beu kouja, kodeja kapogeije ebijamakita kodo danite: Kawidogita bagee ka kawidogai manaido kou ko ani tapa kita.

⁴Tika kodaa ebijamakita manaido kou ko inii nitope-tijake ebijata kouja, inii bo wemakijake ugata kapogeije kodaa kegepa nijamaipajawijake inii dimi kotopijawe-tita.

⁵Bo wemakai ma, maipajawii ma, epauto Ugatame kidaa ikii ena dimiidaiga ume-wo te-tijake kinijawii enaa, Keristus Jesusja komuga niimita kodo danite;

⁶ikii ena kegepaidaiga, ena ebeidaiga Ugatame muta etuwatita, iniija Tuhan Jesus Keristus Nakame kidi.

⁷Okai kouja ikii kede akajakimake tai, Keristus na ikii kijakimakita danite, Ugatameja ajiipi bokouto jatouga.

⁸Ani kitii kouja, Keristus kidi iniitodo duwata bagee eedadetai kita, Ugatameja maakodo bokouto maida make ko, inii aijaane jatogijawita manaido boko jaduwajawiine tijake;

⁹daana ojaa bageido maija Ugatame muta etuwa-tita, okaija ipa bokouto maida make; kapogeije ebijamakita kodo danite: Okai kouja ojaa bagee jupi ani muta katuwaita, Daana akeeka kodo ebetaataa taita.

¹⁰Daana kigeena ma wegata mana ko: Ideide tiwei, ei, ojaa bageido, okaija uguupuguu ma enaimo kodo.

¹¹Daana kigeena maija: Tuhan kidi muta etuwai, ei, ojaa bageido utoma; E bagee te bagee muta etuwai ko enaa.

¹²Daana Jesajaja wegata mana maija: Jisaija mani kodo pakataita, Ojaa bagee kede ejakimakaine tijake ewaa kaitagi me. Okai maida ojaa bagee kede dimi ekotopijawiitai.

¹³Dimi kotopijawii epauto Ugatame kidaa maakodo gaidaiga ideide ma, muka-muka ma boko kijaduwajawii, Rohulkudus bidaidaiga ikii dimi kotope-wo te-tita.

¹⁴Ei, noogeimaido, ani ikii maida make epaapa timakai, ikii enaa agijo ebetume, ikii epi ketago, daana ikii kede akatope enaa.

¹⁵Kou ko kou kodeja ani uu peu kidi ga-kiniine tijake kijaebijapa, Ugatameja jikoo bokouto naduwajawita kouja,

¹⁶ojaa bagee maida make Keristus Jesus jakei te-tai najaikita kouja. Ani Ugatameja ajii manaida kei te-tai kidi, ojaa bagee kede Ugatameepa ekega-menii kou ko okai juma dege-dege ete-tijake, daana Rohulkudus ka jimubeu eewii.

¹⁷Okai kouja ani Keristus Jesus duba kobidoke tai, ani Ugatame jakei te-tai agijo maida make ko.

¹⁸Ani joko ka mana wegai ko uu ko beu kouja, kodeja Keristusja ani maidaiga kei tita manaido, ojaa bagee kede juwetai bagee eewiine, okeija mana kodo ma, kei tai agijo ma.

¹⁹Dou beu agijoudaiga ma, ego takuu-takuu agijoudaiga ma kei tita, Rohulkudus bidaidaiga; tijake Jerusalim make ko Ilirikum kodoopa to ani Keristusja ajii mana kodo wegakumeetega.

²⁰Keristusja eka eebatai beu titaida ani ajii mana kodo wudiine tijake ekowaiga, me ino ka makita kabo maida te migijawiine tijake.

²¹Kodeja kapogeije ebijamakita kodo danite: Okai maida make mana etii beu bagee kedaa doutai, Daana okai maida make juwii beu bagee gamakaitai.

²²Okai kou maida make kouja ani kigi wija wido kidou jawiine kodeja wo nagojawii.

²³Kodeja ito kou ani kii makiida kei tai agijo beu kouja, daana ani taun inoudo kidou jawiine kodaa gajake kouja,

²⁴ani Ispanjol makiida uwiine jato, ani ikeepa umidokiine gaaga, daana ikii kedaa wo naadadai, ani ikeepa tiga mijo gaa kegepa ideide tijake.

²⁵Kodeja ito kou ani Jerusalim uweete, jimubeu bagee eedadai didee menigoune tijake.

²⁶Makedonia ma, Achaja ma, dokoo ka bagee kede ena dimi kepajawijake kouja, Jerusalim makiida daba ka jimubeu bagee kede eedadaine tijake mege kotuu jatimakita.

²⁷Okei kei tai ide ka. Maakidi okei ebé topa; Roh manaida ojaa bagee kede okei didee oogo-moti-toojogo ko, makiida ka agijo oowudii ko enaa.

²⁸Ani kou kei timakijake, daana kotuu timakita agijo kodo jaekegajawijake, ani ikeepaiga Ispanjol uwiita.

²⁹Daana ani epi, ani ikeepa jawiita gaa kodo, Keristusja mobu bokoutoudaiga jawiita.

³⁰Iniija Tuhan Jesus Keristus kidi maidaiga ani kidiimai, ei, noogeimaido, daana Rohulkudus ipa manaidaiga kodaa, ani ma enaimo sembahjangdaiga Ugatameepa naaedimeete umina ekowa-motii;

³¹Judea dokoo ka maakodo gai beu bageepa make pipika doke te-tijake, daana ani Jerusalim eedadai agijo kodo jimubeu bagee kede ide ga-tijake;

³²tijake Ugatame kou dani enaa gapi ko, ani ideide ma kidou jawe-tita, ikeepa dimi maipajawiine gaa.

³³Muka-muka epauto Ugatame kidaa ikeepa keetou to. Amin.