Read Galela RUM 16 Bible Online

RUM 16 - Galela bible

RUM 16

¹Inii paneka Pebe kodo ani wo kijaebadikumeega. Okai Kenkeria makiida ka maakodo gai uguupuguu eedade-tai me kodo.

²Tuhan maida make naaebukai, jimubeu bagee kede ebukija danite, daana okaija ikeepa make gai peu agijo utoma kodo eedadai. Okai na me wedaba eedadita kouja, daana ani maija naadadai.

³Periskila ma Akila ma kojáá aatou; Keristus Jesus maida make aanaakei te-tai bagee kede.

⁴Ani maida make okejai akaato aekegajawita; ani to ko beu, kodeja ojaa bagee jupi ka maakodo gai uguupuguu utoma nigajawita etii.

⁵Okejaija owaapa kotuu te-tai ka maakodo gai uguupuguu maija kojáá tou kiteegi naaetii. Noogei didé Epainetus kidi kojáá tou, Asia dokoo Keristus edoga ejakimakita me kidi.

⁶Marjam kojáá tou, ikii maida make kodekigii tita me kodo.

⁷Anderonikus ma, Junias ma, kojáá aatou; ani ma bagee kede ani ma enaimo nigadimimakita, eti-awitaido jupi ekaago bagee kede, daana ani beu gaa okejai tiga Keristus aajakimakita.

⁸Tuhan duba ani ei egata me Ampeliatus kidi kojáá tou.

⁹Keristus maida make enaimo kei te-tai Urbanus kidi kojáá tou, daana ani ei egata me Istachis maija.

¹⁰Keristus duba enanauto edomakita Apelles kidi kojáá tou. Aristobulus uguwo kojáá tou.

¹¹Ani ma bagee Herodion kidi kojáá tou. Narkisus uguwo Tuhan duba kojáá tou.

¹²Teripena ma, Teriposa ma kojáá aatou, Tuhan maida make kodekigii aatita jagamo wija kodo. Ei egata jagamo Persis kodo kojáá tou, Tuhan maida make umina kodekigii tita me kodo.

¹³Tuhan duba ewitokita me Rupus kidi kojáá tou, daana ukame kodo maija, noukai kita kodo.

¹⁴Asinkeritus ma, Pelegon ma, Hermes ma, Paterobas ma, Hermas ma, daana okei wa enaimo enakeneka bagee utoma kojáá tou.

¹⁵Pilologus ma, Julia ma, kojáá aatou, daana Nerius ma, panekame ma, daana Olimpas ma, daana okei ma enaimo ka jimubeu bagee utoma kede.

¹⁶Ikii kede jimubeudaiga unu akajume tai. Keristusja maakodo gai uguupuguu utoma kojáá tou kiteegai.

¹⁷Ani kidiimai, ei, noogeimaido, akaije akaije mana gou bagee kede gai, kitopita mana kodo ma akaije mana mejawii bagee kede. Okeepa make kokogai.

¹⁸Kei bagee kede iniija Tuhan Keristus kidi ejakimakai beu, kodeja okei kede modo etido tai bagee; okeija ka deega-deega mana kodaa kegepa doodoo bagee puja eukai.

¹⁹Ikii mana jakimakita kou ko me utoma juwii. Okai kouja ani ikii maida make ideide, kodeja ani ide kodaa, ikii enaa agijo kodo gai epi, daana peu agijo maida make jimubeu kodo.

²⁰Ugatame kidi, muka-muka epauto kidi, egaa kodo ikiija bado mijouto Teege tagi kijaatiitagi. Iniija Tuhan Jesus Keristus kidi jikoo bokouto kodo ikii wa keetou to.

²¹Ani ma naakei te-tai Timotius kidi kojáá tou kiteegi; daana ani ma bagee Lukius kidi ma, Jason ma, Sosipater ma, kojáá tou kiteegai.

²²Ani ki Tertius, kii kapogeije ebijata me kidaa kojáá tou kiteega, Tuhan duba.

²³Ani ma maakodo gai uguupuguu utoma oumidokita me Gajus kidaa kojáá tou kiteegi. Maki okogo maida make mege kotuu tita me Erastus kidaa kojáá tou kiteegi, daana iniikeneka Kuartus kidaa maija.

²⁴Iniija Tuhan Jesus Keristus jikoo bokouto kodo ikii utoma keetou to. Amin.

²⁵Bida keewe-tijake Tuhan kidi bida jago, anija ajii mana epeepeidaiga, daana Jesus Keristus maida make wude-tai mana epeepeidaiga; ewaida awita ka boone-boone mana kodo epeepeidaiga, kii wagi kou wagi jawii beu gaa boonimakita;

²⁶kodeja ito kou ewaida kijake tikauwa ka gokobaki tijawiidaiga wegai tita bagee ka ebijata manaidaiga ojaa bageepa emuwakita, Ugatameja imo to togoo ka enimakita mana epeepeidaiga, okei maakodo gai mana kodo jakimake-tita.

²⁷Ena to dimi bokouto jago Ugatame kidi Jesus Keristus kidiidaiga ajiipi bokouto gou, kii kidi imo to togoo. Amin.